Australiami aallaasersortoqarnera politiit peqqarniisaarniarnertut taavaat
New South Walesimi naalagaaffiup nunap immikkoortuani naalakkersuisuisa siulittaasuat nalunaarpoq, saassussineq sissami pisimasoq inuiaqatigiinnut Juutinut saassussinerusimasoq.
Annaassiniartut australiami inuk aallaasersortoqarnerani eqqugaasimsoq ikiorpaat.
Assiliisoq: Mark Baker/Ritzau Scanpix
Australiami politiit Sydney-p qanittunnguani Bondi-mi sissami aallaasersorneq peqqarniisaarniarnertut oqaatigaat.
Politiit tusagassiortunik katersortitsinermi danskit nalunaaqutaat malillugu ullup qeqqata missaani nalunaarutigaat.
Chris Minns, New South Walesimi naalagaaffiup nunap immikkoortuani naalakkersuisuisa siulittaasuat, aamma nalunaarpoq saassussineq inuiaqatigiinnut Juutinut saassussinerusimasoq.
Ikinnerpaamik inuit aqqaneq marluk toqutaasimasut nalunaarutigineqarpoq. Tamatumalu Inuit 29-it ikilerneqarsimasut nalunaarutigineqarpoq, taakkununnga politiit marluk ilaallutik.
Toqutaasuni saassussisut ilaat ataaseq toqutaaqataavoq. Pinerluttoq alla ikilerneqarpoq politiillu tigusarisimagaat, politiinit nalunaarutigineqarpoq.
Pissutsit arlallit tunngavigalugit Australiami politiit pissutissaqarluartutut isigaat peqqarniisaarniarnermik tunngaveqartutut misissuinerup ingerlanneqarnera.
Politikommissæri Mal Lanyon tusagassiortunik katersortitsinermi taamak oqarpoq.
Taassuma naliliinera tunngaveqarpoq sakkunik nassaarsimanermik, aammalu aallaasersorneq Juutit qaamaneq pillugu nalliuttorsiorneranni hanukkah-p ulluani siullermi pimmat.
Australiap ministeriunera, Anthony Albanese, aamma tusagassiortunik katersortitsinermi taamatut nalunaaruteqarpoq.
- Australiami Juutit hanukkahip ulluani siullermi saassunneqarnissaat siunertarineqarsimasoq qularutissaanngilaq, taanna oqarpoq.
Ministeriuneq nassuiaavoq Australiami juutit isumannaatsuunissaat qulakkeerniarlugu pisariaqartinneqartut tamaasa atussallugit.
- Australiamiut Juutinik saassussineq Australiamut tamarmut saassussineruvoq, Albanese oqarpoq.
Israeliup præsidentia, Isaac Herzog-ip, saassussineq assuaraa, taassumalu "Juutit saassunneqarnerat naakkittaatsuliornerusoq" taavaa.
Taama allappoq nutaarsiassaqartitsivik AFP.
- Piffissami matumani Sydney, Australiami, qatanngutivut, peqqarniisaarnianit taqissinartunit saassunneqarsimapput, Jerusalemimi aaqqissuussinermi oqalugiarnermini taanna oqarpoq.
Taassuma Australiamut kaammattuutigaa "antisemitismip (juutinik akeqqersimaarnerup) annertusiartuinnartup australiamiut inuiaqatigiinnut ajoqutaasup akiorneqarnissaa".
