Biskoppi naalagiaqatigiinnermi politikerinut: Misilittarneqarsimaqaasi 

Inatsisartunut Naalakkersuisunullu ilaasortat kalaallisoorlutik Annaassisitta Oqaluffianut ingerlaaqatigiissinnarlutik ukiaanerani sulinertik aallartitsinnagu naalagiaqatigiittarput. Ukioq manna aamma taama pisoqarpoq.

Nalunaaqutaq quliniit naalagiaqatigiinnerat aallartittarpoq, naalagiarnermilu palasiuvoq nunatsinni biskoppi Paneeraq Siegstad Munk.

Taanna politikerit ataatsimiilinnginneranni oqaluussissutimini ima ilaatigut oqarpoq.

- Suliffissinni oqallisileraangassi, ilaannilluunniit ajunngitsussaq piniarlugu aalajangiisaqartaraangassi silarsuup ileqquatut sakkortuumik pineqartarpusi. Ukiunilu kingullerni socialmediat atorneqarnerani ajornanngitsuararsuuvoq tuukkatut ittunik toraarlusi aallartitsivigineqartarnersi. Nersorpassi tunniusimallusi taama sulinissaq qinersimagassiuk.

Nunatta nunanit tamalaanit ukkatarineqarnerani nunatsinni innuttaasut toqqissiviilliorneq ilaatigut nalaattarpaat, tamannalu politikerinut annertunerusumik piumasaqarnermik nassataqarsimasoq oqaluussissummini ilaatigut oqaatigaa.

Tassunga ilanngullugu qinuneq, pisuni artornarsinnaasuni iluaqutaasartoq eqqaasissutigaa.

- Ukiumi kingullermi misilittarneqarsimaqaasi, ilaanni timip eqqissiunnaarutigisaanik, ilaquttanut sunniuttumik suleruloortariaqartarsimavusi, aammali nunagisamut asanninnersi soorlu kimittorsarneqarsimasoq. Ulluni ulapaarfiusuni qinuneq nukissamik aallerfiusinnaavoq. Oqaasissat nalugaanni Ataatarpooq naammattarpoq. Taannaavoq ullumi eqqaasitsissutigerusutara, biskoppi oqaluussissutimi ilaani taama oqarpoq.

Ukiaanerani ataatsimiinnerup aallartinngilaattaani naalagiaqatigiinnermi tussiutip normu 639-ip, “Naalannagaartoq Guuterput-aa”, naggasiutigineqartarnera ileqquuvoq.