Borgmester nassueruteqarpoq: Tasiilami iluarsiisoqassappat suliassarpassuaqarpoq

Avaaraq, sikorneruit Tasiilarlu ukiut qulit qaangiuppata takorloorukku suut takusinnaavigit?

- Qaqqat isigaakka, seqineq tarrikkiartorpoq. Ilaqutariippassuit aneerput pisarnertut. Inuit qiimapput. Isigisara taanna allaanerungaanngilaq ulluinnarni massakkut takusartakkanniit.

- Kisianni inuit suli amerlanerusut ineqalernikuupput namminneq, suliffeqarput assigiinngitsutigut, aalisarneq ingerlalluarpoq, fabrikkimi sulisoqarpoq, kisianni aamma ilinniartoqarpoq assigiinngitsunik. Takusara illoqarfik torerpoq, aamma torertarami. Pinngortitaa taanna immikkuullarissoq nukissamik aallerfiusoq innuttaasut tulluusimaarutigerujussuaraat isigivara. Ilaqutariit suli amerlanerit nukittornikuupput, angerlarsimaffiullu avataanut inissinneqartartut ikilerujussuarnikuullutik, Avaaraq oqarpoq.

Tassaapput Kommuneqarfik Sermersuumi borgmesterip Avaaraq Olsenip Tasiilaq pillugu takorluugai. Takorluugaali piviusunngussappata aana apeqqut pingaarutilik: Illoqarfik takorluugaatut ilissappat qanoq iliortoqartariaqarpa?

Inissiat aallartiffittut

Avaaqqap isumaa malillugu aallartiffissaq ersarippoq, tassa: Inissiat.

Aqqaneq-marluullutik ineqatigiipput, aniguiniarnissarlu imaannaanngilaq

Tasiilami inissaaleqineq peqqutigalugu kinguaariit arlariit najugaqatigiittariaqartartut allaaserinikuuarput. Inuuniarnikkut ajornartorsiutit inissaaleqinerlu imminnut ataqatigiittut borgmesteri isumaqarpoq.

- Ilaqutariit toqqissisimasumik angerlarsimaffissaqanngikkaangata ajornartorsiutit pilertarput. Taamaammat taakkua ataqatigiittorujussuartut isigivakka. Inissianik sanaannaavinnissaq pisariaqarpoq aningaasat annertugaluartut, Avaaraq oqarpoq.

Tasiilami sanaartorniaraanni allanut sanilliullugu piffissaq sivisunerusoq atorneqartarpoq. Atortussat umiarsuakkut tikiseqqaartariaqarput, ukiullu ilarujussuani umiarsuaqarneq ajorpoq. Taamaammat piffissaq qaninnerusoq eqqarsaatigalugu containerit inissiatut atugassat aaqqiissutissatut isigai. Piffissaq ungasinnerusoq eqqarsaatigalugu inissianik sanaartortoqartariaqartoq.

Isumaginnittoqarfiup suliassai ikilisariaqarput

Inissaaleqinerli unammillernartut ilagiinnarpaat. Tasiilami meeqqat affaat kommunip inunniik isumaginnittoqarfianit ukiut qulit matuma siornatulli suli suliassaqarfigineqarput. Pissutsit taamaanneri allannguiffiginiarlugu kommuni nunaqavissunik atorfinitsitsivoq ilinniaqqinnissaannillu neqeroorfigalugit. Taakkua saniatigut kommuni meeqqanut ilaqutariinnullu politikkimik nutaamik 2035-p tungaanut atuuttussamik pilersitsivoq. Taassuma meeqqat kisiisa ikorfartornagit, ilaqutariit tamarmik tapersersorneqartarnissaat qulakkiissavaa.

- Meeraq illikartinneqarpat ilaqutariit tukiinnarnagit, nammineertiinnarnagit ilaqutariit taakkua nukittorsarneqassapput meeqqat utertinnissaanut piareersarlugit. Siornatigut taamaannikuunnginnami.

ATUARUK AAMMA

Sanaartorneq containerillu Tasiilami inissianik amigaateqarnerup akiorniarneranut ikiuutaassapput

Meeqqat 30-t sinneqartut angerlarsimaffimmik avataannut inissinneqarsimasut politikki taanna tunngavigalugu qaammatit arfinillit ingerlaneranni angajoqqaaminnut angerlartinnqarsiapput. Kommunilli kisimi suut tamaasa allanngortissinnaanngikkai borgmesteri naqissusiivoq.

- Innuttaasut piumassuseqartariaqarput, takusinnaavarpullu taanna piumassuseq assukulooq saqqummeriartortoq, borgmesteri oqarpoq.

Illoqarfinnut anginerusunut nutserneq 

AAMMA ATUARUK

– Illoqarfik ineriartortoq, taava maaniiginnassagaluarpunga. Maannakkulli kissaatigaara Kitaaniikkusunnerullunga

28-nik ukiulik Moses Nuko siornatigut naapitarput illoqarfik ineriartunngimmat Tasiilamiikkusunngilaq.

– Inuusuttuunermut inuttullu ineriartornermut ilaavoq allamik misileerusunneq, inuusuttut Tasiilamiitiinnarniarlugit kommuni qanoq iliorsinnaanersoq aperineqarami Avaaraq taama akivoq. Nammineerluni aamma imminut assersuutigivoq, Narsami peroriartorpoq maannalu Nuummiilluni.

Tasiilami ineriartorneq pisariaqartoq aallartissappat innuttaasut aalajangeeqataanerusinnaanerat pisariaqartoq borgmesterip oqaatigaa. Taamaammat ukiuni tulliuttuni Tasiilamut periusissiamik suliaqarnermi innuttaasut peqataassapput.

- Innuttaasut namminneq aalajangissavaat illoqarfimminni susoqassanersoq.

Sumiiffimmi oqartussaassuseqarnerunissaq avaqqunneqarsinnaanngitsoq Avaaraq Olsenip nassuerutigaa. Oqartussaaffiit Nuummiikkunnaarlutik Tasiilamut utertiortorneqassapput.

- Eqiterussineq aqqutissaanngilaq. Oqartussaaffeqarfiit utertiortortariaqarpagut,

Avaaraq oqarpoq.

Nunap immikkoortortaani pisortaqalerlunilu ingerlatsinermi qanittukkut pisortaqalerpoq. Taamaaliornikkut assersuutigiinnarlugu nunaqarfiit ilaanni majuartarfiliortoqassappat Nuummut saaffiginnittoqartariaaruppoq.

- Oqartussaaffeqarfiit utertiortortariaqarpagut ineriartortitsissagutta, Avaaraq naqissusiivoq.

Kulturi aallaavigalugu aaqqissuussinerit

Inuuniarnikkut ajornartorsiutit Tasiilaannarmi takussaanngillat. Issittumi sumiiffinni allani, soorlu Alaskami Canadamilu assingusunik nalaataqarfiusunik assersuutissaqarpoq, ilaasali aningortaraat aamma uppernarsaatissaqarpoq. Alaskami suliniut Qungasvik assersuutissanut ilaavoq. Inuusuttut sumiiffimmi kulturi inooriaaserlu aallaavigalugit suliniuteqarfigineqarput. Assersuutigalugu piniariartittarnerisigut, sanalutsittarnerisigut tapersersorteqartinneritigullu kinaassusaat nukittorsarneqarlunilu neriuuteqalersinneqartarput aamma ataatsimoornermut peqataatinneqarnerulertarlutik. Sumiiffinni ileqqut sakkussallu aallaavigalugit suliniuteqaraanni inuiaqatigiinni ineriartorneq pilersartoq misissuinerit takutippaat.

Taakkua eqqarsaatigigaanni qanoq isumassarsiorfigineqarsinnaappat?

- Atuarfiit eqqarsaatigiinnarlugit pinngortitaq kulturerpullu atuartitsinerni atorneqarsinnaapput. Kisianni aamma meeqqanut ilaqutariinnullu politikkerput eqqarsaatigalugu ilaqutariinnik nukittorsaanermi atorluarneqarsinnaapput. Ilaqutariinnullu neqerooruterpassuatta ilaat pinngortitamiinnermik aallaaveqareerput.

Tasiilami inuusuttut kulturikkut illuat Igdlo Avaaqqap assersuutigaa.

- Qimmeqarnissartik kissaatiginikuuaat. Qimminut atassuteqarneq ilarpassuisa annaanikuuaat. Taava inuusuttut kulturikkut illuanni qimmitaarnikuupput, taamaaliornikkut kinaassusertik inerisaqqippaat, Avaaraq oqarpoq.

Borgmesteri nalunaaquttap akunnerata aappaa avillugu oqaloqatigereerlugu borrgmesteri suli oqaasissaqarpoq.

- Ajornartorsiutit ukkatarineqakkajuttarput. Kisianni ineriartortitsissagutta arlalinnik iliuuseqartariaqarpugut, taakkua ilagaat oqartussaaffinnik utertitsiortuineq, Avaaraq oqarpoq.

Naalakkersuisuujunnaaqqammisoq Maasi Pedersen peqatigalugu innuttaasunik aasaq ataatsimiititsinertik aamma eqqaavaa.

- Maasi oqariasaarpoq innuttaasunut: “Immissinnut tulluusimaarutiginiaritsi. Inissisimaffissi ajortortaqaraluarluni allaninngaanniit ajornerunngilasi.” Taava ilai tupaallalaartukuluupput taama oqariartormat, Avaaraq oqaluttuarpoq.

Maasip taama oqareernerani inuit eqqarsarpasillutik nipaallisimanerat borgmesterip eqqaamalluarpaa – tamannalu allannguiniarnerup aallartiffiata ilaattut isigalugu.