Borgmesteri innuttaasumut: Sianiik, kanngusaarut aamma ajorsartuaannartoq

Sermitsiap Avannaata Kommuniani kommunip timigissartarfiit ingerlataanni timigissarneq ukiumut inummut ataatsimut 50 koruuneqalertoq sapaatiummat allaaseraa. Allaaserisaq taanna inoqatinut attaveqaammi, Facebookkimi, inuit ilaannit siammarterneqarpoq.

Siammarterisut ilaannut Ilulissani innuttaasoq oqaaseqarfissami allataqarpoq. Taassuma Avannaata Kommuniani kommunalbestyrelsimi amerlanerussutillit ukiumut akigititassatut aalajangigaat unammilleqatigiinneq pillugu apeqquserpaa.

Tamanna Avannaata Kommuniani borgmesterip, Lars Erik Gabrielsenip (S), Facebookkimi arajutsisimanngilaa. Oqaaseqarfissamilu innuttaasup uparuaataanut akuliuppoq. Borgmesterip innuttaasoq oqaaseqartoq pillugu oqaatsit ilaatigut makkua atorpai "Sianiik, kanngusaarut aamma ajorsartuaannartoq" 

Ilinniagaa apeqquseraa

Lars Erik Gabrielsenip innuttaasup illersuisutut ilinniagaa kikkut tamat takusinnaasaannik aamma apeqquserpaa. 

AAMMA ATUARUK:

Avannaata Kommuniani timigissarneq ukiumut 50 koruuniinnaqalertoq - akeerutitsiniarneq naapertuutinngilaq

Innuttaasup taama ilaatigut allaffigineqareernermi kingorna borgmesteri aperaa isornartorsiorneqarnini saperneraa. 

Sermitsiap illuatungeriit attaveqarfigai. Innuttaasup illersuisutut ilinniarsimasuunini Sermitsiamut nassuiaatigaa. Taamaalilluni borgmesterip apeqqusiinera illuatungilerpaa. Taamali pineqarnini sorsuakkiarineqassanngitsoq kissaatigaa.

- Suliaq una tamanut ammasumik assortuussutigineqalernissaa, inunnik ataasiakkaanik saassussisoqarnissaa imaluunniit inuit ataasiakkaat pillugit oqallinneq ingerlaqqinnissaa kissaatiginnginnakku aallaqqaammut erseqqissaatigeqqaarusuppara, innuttaasoq Sermitsiamut allappoq.

Innuttaasup kinaassusaa aaqqissuisoqarfimmit ilisimaneqarpoq.

Ilisimasaqannginneraasoq

Taassuma borgmesterip pasilliutai taaguutitullu atugai tamat attaveqatigiittarfiini kikkunnit tamanit, aamma borgmesterimit atorneqartarnissaat tulluartuusorinngilaa.

Borgmesterip Facebookkimi allataanut ilaavoq illersuisoq pineqartoq atorneqartarnissaanik innuttaasunut innersuussisarniarani, tassani suliat tamamik illersuisup "ilisimasaqannginnera" tunngavigalugu ajorsartartussaanerat allaaseraa.

Taama allaatigineqarneq innuttaasup imaannaanngitsutut nalilerpaa, inissaminiissorinagulu.

Sermitsiap borgmesteri sooq oqaatsinik taama ittunik atuilluni allannersoq pillugu itisiliinissaanik noqqaaffigaa. Taannalumi aamma allakkatigut akissuteqarpoq.

- Akissutissara naattunnguuvoq aamma oqaaseqarfingeqqinnaviarnangu. Inuttut nammineq nalunnginnissutsinni taamatut allakkama, piffissaq sivittorpoq FB kkut pissusiluutinik siammartiterisarnera inuata, aammalu ukiut arlalissuit malinnaaninni takusinnaajuaannarsimavara kommunimut, atorfilittanut ,borgmesterimullu qanoq pissusilersortarnera, nammineq inuata siammartertangai aallaaviupput takinerunanilu, Lars Erik Gabrielsen Sermitsiamut allappoq.

Borgmesterip nalunnginnissutsimini allannermini suut pinerlugit itisilinngilai.

Pisortatigut suliassanngortoqarsinnaasoq

Innuttaasup borgmesterimit Facebookkikkut taama pineqarnini tulluartuusorinngilaa. Taamaammallu suliaq pillugu Avannaata Kommunianut saaffiginnissuteqarsimalluni aamma allappoq. Innuttaasorlumi saaffiginnissimasoq Avannaata Kommunia Sermitsiamut uppernarsaavoq. 

Innuttaasup qanoq akineqarnissani allaaserisap suliarineqarnerani suli utaqqivaa. Suliarli suliassartaqarneruleriaannaavoq. Suliarmi oqartussaasunut attuumassuteqartunut innuttaasup ingerlateqqinnissaa matoqqatinngilaa.