Borgmesteri nassuiaavoq: Taamaattumik imigassamik tuniniaasarneq unitsinniarparput

Nanortalimmi angut 37-nik ukiulik toqungasoq sisamanngornermi nassaarineqarpoq, politiillu inuit sisamat tamatuma kingorna tigusaraat, toqutsisimasutullu unnerluutigalugit.

Kommune Kujallermi borgmesteri Malene Vahl Rasmussen (D) Sermitsiamut oqarpoq pisimasoq tamanna pissutigalugu imigassamik inerteqquteqalerneq atuutilersoq, kommunimilu tamarmi tallimanngornermi unnukkut tamanna, atuutilerpoq.

- Ermusip sippunneqarnera ajuusaarnaqaaq. Nanortalimmi pisut pissutigalugit ajornartoornermi upalungaarsimasut qaammat kingulleq aallartippavut. Taakkuuppullu taqqavunga aallartinneqartuartut, Malene Vahl Rasmussen oqarpoq.

Taassuma itisilerpaa Nanortalimmi innuttaasunit illoqarfimmilu inuussutissarsiortunit saaffigineqarsimalluni.

- Innuttaasut naammatsissimapput, namminneq aalajangersimalluinnartumik iliuuseqartoqarnissaa kissaatigaat, borgmesteri oqarpoq.

Sooq kommune tamarmi inerteqquteqarfigineqassava?

Kommune Naalakkersuisunut, kommune tamakkerlugu Nanortalik kisiat pinnagu imigassamik inerteqquteqalernissamut qinnuteqarsimasoq taanna nassuiaavoq. Ajornartorsiummi Nanortalimmi kisimi piunngilaq.

– Sapinngisarput tamaat iliuuseqarpugut. Taamatut ingerlaannarsinnaanngilagut, aamma sulisutta taamaattoqaannassappat suliassaq nammassinnaanngilaat, Malene Vahl Rasmussen oqarpoq nangillunilu:

- Aaqqissuussaanitsinni pinaveersaartitsinermik suliaqarnissamut assaat naammattut piginngilavut, iliuuseqarnerit taamatullu pinartunik suliaqartarnerit piujuarmata. Angerlarsimaffiup avataanut inissiinermut aningaasartuutit amerliartuinnarput, aamma paasivarput inissiinerni amerlasuuni iliuusissatut pilersaarusiortoqarneq ajortoq — tamanna aningaasaqarniarnermik aningaasaqarniarnikkut ajornartorsiornermik pissuteqarpoq.

Namminersornerullutik oqartussat akisussaaffimmik tigusinerat ajornartorsiutinik aaqqiisimanngillat

Kommune Kujallermi meeqqat, inuusuttut innarluutillit pillugit suliassaqarfik Namminersorlutik Oqartussanit maannakkut ingerlanneqarpoq, taakkualu kommunimit suliassiissutigineqartut unitsissimavaat. Unitsitsisoqaraluartoq pissutsit pitsanngoriartornerat takuneqarsinnaasimanngitsoq, ajornartorsiummillu aaqqiiniarnissamut aqqut suli takisuujussasoq, Borgmesteri oqaluttuarpoq:

– Missingersuutit 2027-mut maanna suliarileruttorpavut, angerlarsimaffiullu avataanut inissinneqartartut suli amerliartornissaat ilimagineqarpoq. Tamannalu isiginngitsuusaarisinnaajunnaarparput, allannguisoqarnissaami pisariaqarpoq, tamannalu maanna aallartippoq, Malene Vahl Rasmussen oqarpoq.

Taassuma erseqqissarpaa inerteqquteqarneq siunissaq ungasinnerusoq eqqarsaatigalugu, aaqqiissutaanngitsoq:

- Inerteqquteqalernerup nalaani ataavartumik aaqqiissutissamik nassaassaagut.

Ammaqqinnissamut piumasaqaatit aalajangerneqassapput

Imigassamik tuniniaasinnaaleqqinnissamut atatillugu qanoq taamaaliortoqarsinnaanersoq pilersaarusiorneqaleruttortoq, killiliinerillu arlallit malinneqarnissaat naatsorsuutigineqartoq borgmesteri oqarpoq:

- Inerteqqut qaqugu atorunnaarsinneqarumaarnersoq, aalajangersimasumik ulluliinikuunngilagut. Iliuuserisavut aalajangiisuussapput sumi tuniniaaneq ammaateqqinneqassanersoq, borgmesteri oqarpoq.

Meeqqat inuusuttullu pillugit nalunaarutit politiinullu aggersarneqarsimasut amerlassusaat nakkutigilluarneqartut, aamma meeqqat qanoq atugaqarnersut kommunip maluginiarnerujumaarpa, tamannalu ammaaqqinnissamut sunniuteqarsinnaasoq, taanna itisiliivoq.

Imigassamik inatsit sukannersoq siornatigut akerlerisimavaa

Malene Vahl Rasmussenip 2020-mi Inatsisartunut ilaasortatut imigassaq pillugu inatsit sakkukillisinniarlugu siunnersuuteqarpoq, tamannalu akuerineqarpoq.

Allatut taamanikkut isiginnittaaseqarnini, nassuerutigaa:

- Uagut (Demokraatit, aaqq.) tunngavilersuiuaannarpugut: Kiffaanngissuseq akisussaaffiup ataani.

- Kiffaanngissutsilli akisussaassuseqanngitsumik atorneqarnera takuneqarsinnaappat, taava kiffaanngissusermik atuineq meeqqanut ajoqutaasinnaavoq.

- Tamanna aamma kiffaanngissuseqarnerulersitsivoq pisortat aningaasaataannik atuinermik aallaaveqartumik, tamannalu akueriinnarsinnaanngilarput, Malene Vahl Rasmussen oqarpoq.