Borgmesteri uuliasioqatigiiffiup pisortaanut: Oqariartuutigineqartoq sorleq Kalaallit Nunaanni innuttaasut upperissavaat?

Borgmesteri Avaaraq Olsen Tunumi Jameson Landimi uuliasiornissamik pilersaarut pillugu oqallinnermut maanna akuliuppoq. Amerikamiut suliffeqarfiutaata Greenland Energy Companyp suliniut pillugu assigiinngitsunik marlunnik oqariartuuteqarnera ajornartorsiutaasoq taanna isumaqarpoq.

Uuliasiorfiliornissaq piffissami kingullermi soqutigineqartorujussuuvoq, ilaatigut Greenland Energy Companymi pisortaanerup Robert Pricep aamma 80 Milemi pisortaanerup Olga Solovievap Ittoqqortoormiini innuttaasunik ataatsimiititsineranni.

Aammattaaq suliffeqarfik Amerikami tv-kkut aallakaatitsisartoq tusaamasaq Dr. Phil suleqatigalugu annertuumik nittarsaassivoq, taanna Tunumi uuliasiorneq pillugu aallakaatitassiani arlalinni saqqummiisartuulluni.

Suliffeqarfiup oqariartuutaa Jameson Landimi milliardilikkaanik nalilinnik uuliaqarsinnaaneranik oqariartuummut akerliulluinnarpoq, taamaattumillu borgmesterip Avaaraq Olsenip Robert Pricep Ittoqqortoormiini innuttaasunut akissutaani oqaatigineqartut tupigusuutigai.

Avaaraq Olsen oqaluttuaq sorleq Kalaallit Nunaanni innuttaasut upperissaneraat aperaaq:

- Robert Price, Jameson Landimi oqaluttuarisaanermi pingaarutilimmik uuliaamik nassaartoqarnissaanik amerikamiunut oqaluttoq upperineqassava?

- maluunniit Robert Price, ilumut uuliaqarneranik ilisimasaqartoqannginneranik kalaallinut oqaluttoq upperineqassava?, Avaaraq Olsen allakkamini ammasuni allappoq. Taanna kommunip nittartagaani takuneqarsinnaavoq.

Borgmesteri: Innuttaasut uppertikkuminartuunngillat

Borgmesterip Ittoqqortoormiini innuttaasut uppertikkuminartuunnginnerat tikkuarpaa:

- Taakku nalunngilaat misissuineq nalorninartoqartitsisoq. Nunap iluani misissuineq imaannaanngitsoq nalunngilaat.

- Taakkuli paasinngisaat tassaavoq nunani allaneersunut oqalutsillutit sooq imminut tatigineruleraluttuinnarnerit, kalaallinullu oqalukkaangavit taamaattanngitsoq. 

Ittoqqortoormiini najukkami ataatsimiititaliap siulittaasua Hans Brønlund Robert Price apeqquterpassuarnik akissutissarsissaanngisaminik aperineqarsimasoq, aamma najukkami ataatsimiititaliap siulittaasua innuttaasut eqqunngitsumik oqariartorfiginiarneqarsimasut misigaluni, innuttaasunik juunip qulingani ataatsimiititsinerup kingorna Sermitsiamut oqarpoq.

Greenland Energy Company Nasdaq-imi børsimi ukioq manna nalunaarsorneqarpoq. Ingerlatseqatigiiffik tuluit ingerlatseqatigiiffiannik 80 Milemik suleqateqarpoq, taanna Jameson Landimi misissuinissamut akuersissutaateqartoq. Ingerlatseqatigiiffiup ilisimatitsissutigaa Jameson Landimi qillerinerit ukiaru aallartinneqassasut. Aatsitassanut naalakkersuisoqarfimmit ingerlatseqatigiiffik atortunik nunamut inissiinissamut taamaallaat akuersissuteqartoq paasissutissiissutigineqarpoq.