Broberg akissutissamik ujaasivoq: Naalakkersuisut Nato-mi ataatsimeersuarnermi sooq peqataanngillat?

Naalakkersuisut Haagimi Nato-p aasaq manna ataatsimeersuarneranut sooq peqataanngillat?

Naleqqap siulittaasuata Pele Brobergip apeqqut taanna qaammatini sisamani akissutissarsiniarlugu utaqqivaa. Tamaalilluni §37-lu naapertorlugu apeqqutit nalinginnaasumik ullut suliffiusut qulit qaangiutsinnagit akineqartartussaanerannut piffissaliussaq qaangerujussuarneqarpoq.

Pele Broberg marlunnik apeqquteqarpoq, ilaatigut Danmarkip, USA-p allalluunniit Naalakkersuisut peqataaqqunagit kaammattorsimaneraat apeqqutigalugu.

USA-p præsidentiata Donald Trumpip Kalaallit Nunaannik ukioq upernaarlu soqutiginninnermik oqariartuuteqaqattaarnerani ataatsimeersuarneq pivoq. Oqariartuutit Kalaallit Nunaata aqunneqarnissaanik pigilerusunneranillu nipeqartut nunat suleqatigiinnerinut unammilligassanik kinguneqartut.

USA-p oqaloqatiginissaanut piareersimasoq

Nunanut allanut tunngasunut naalakkersuisoq Vivian Motzfeldt (S) Nato-p ataatsimeersuarnissaanut peqataanissaminik taamaatitsinera Sermitsiami juunimi allaaseraarput.

AAMMA ATUARUK

Kalaallit Nunaata USA-llu akornanni naapinnissaq suli pissanngikkallarpoq

USA-p nunanut allanut ministeria Marco Rubio ataatsimeeqataassammat Kalaallit Nunaanniit USA-miillu nunami attuumassuteqanngitsumi naapeqatigiinnissaq naalakkersuisup neriuutigalugu oqariartuuteqaraluarpoq.

Vivian Motzfeldt taamaani ilaatigut ima oqarpoq:

- Isumannaallisaaneq illersornissarlu pillugit USA-mik oqaloqatigiinnissamut piareersimavugut, kisianni tamanna sioqqullugu amerikamiut Kalaallit Nunaannik piginnittuunissamik aqutsilernissamillu oqaluuserinninnerminnik unitsitsisariaqarput, Vivian Motzfeldt oqarpoq.

Piffissaliussaq akunnattoq

Naalakkersuisoq ataatsimeersuarnissamut peqataasinnaajunnaartoq ataatsimiinnissaq sioqqullugu nalunaarutigineqarpoq. Peqataasinnaajunnaarnermut "piffissaliussaq akunnammat" tunngavilersuutigineqarluni.

- Ilumoorpoq periarfissarsioraluarpugut USA-mik naapitsisinnaanissatsinnut, tamannali maanna pisinnaasimanngilaq, suliassaqareeqigamalu ullorsiutikka malillugit nunatsinni suliakka nangippakka. Taamaattorli nunarput sinnerlugu Haagimiittoqarpoq, taamaammallu ataatsimeersuarnermi susoqarnera qanimut malinnaaffigaarput.

Naalakkersuisoq tusagassiuutinut oqaaseqarnikuugaluartoq Pele Brobergip apeqqutai pisortatigoortumik akineqanngillat, naak Inatsisartut Naalakkersuisunut arfineq-pingasoriarlutik eqqaasitseqattaarsimagaluartut.

NATO-mi ataatsimeersuarnermi qallunaat ministeriisa Kalaallit Nunaannut tunngasut oqaluuserisimaneraat partiip siulittaasuata aamma paaserusuppaa.

Naalakkersuisut oqaaseqartinniarlugit Sermitsiamit sulissutigaarput.