Canada Frankrigilu Kalaallit Nunaannut attaveqarnerulerniarlutik sinniisoqarfiinnik ammaasut

Frankrigip Canadallu kalaallit qaninnerulerniarlugit Issittumilu sakkutooqarnerulerniarlutik  Nuummi tamarmik immikkut sinniisoqarfissaminnik  tallimanngorpat ammaassapput.

Canadap nunanut allanut tunngasunut ministeria Anita Anand Nuummukarluni sinniisoqarfissap ammarneqarnera malunnartikkiartussavaa.

AAMMA ATUARUK

Canadap nunanut allanut ministeria konsuuleqarfimmik ammaajartorluni Nuummukalersoq

Sermitsiaq naapertorlugu nunanut allanut tunngasunut ministerip tikeraarnermini Kalaallit Nunaata nunanut allanut tunngasunut naalakkersuisua Vivian Motzfeldt ataatsimeeqatigissavaa.

Anita Anandip Sisamanngornermi Danmarkip nunanut allanut ministeria Lars Løkke Rasmussen (M) ataatsimeeqatigaa.

Lars Løkke Kalaallit Nunaannut angalaqatigiissallugu Instagramimi sisamanngornermi unnukkut allappoq.

Generalguvernørip Jens-Frederik naapissagaa

Tuluit kunngeqarfiata Canadami sinniisaa, generalguvernøri Mary Simon, sinniisoqarfiup pisortatigoortumik ammarneqarnerani aamma peqataassaaq.

Kalaallit Nunaata naalakkersuisuisa siulittaasuat Jens-Frederik Nielsen aamma naapissavaa.

Frankrigip sinniisoqarfittaarnissaa præsident Emmanuel Macronip Kalaallit Nunaannut juunimi ukioq kingulleq tikeraarnerani saqqummiunneqarpoq.

Frankrigip kalaallinut qaninnerulerusunnera taamani oqaatigineqarpoq.

- Ilissinnut qaninnerujumalluta Nuummi aallartitaqarfeqalissallugu aalajangiupparput, Macron oqarpoq.