Christa Pike toqumit aniguisoq — eqqartuussissuserisoq naapertorlugu maanna pisussinnaalerpoq

Christa Pike ukiut qulikkuutaat arlallit matuma siorna toqutsisimasutut toqumut eqqartuunneqarsimasoq, sapaatip-akunnerani kingullermi USA-mi toqutaanissaa iluatsinngitsoorpoq, maannalu taanna pisuleqqippoq.

Eqqartuussissuserisuata taama oqarsimanera BBC-mit saqqummiunneqarpoq.

Pike 50-inik ukiulik sapaatip-akunnerani kingullermi pingasunngormat toqunartumik pentobarbitalimik marloriarluni kapuummik kapitinnini anigoreerlugu maanna suli napparsimmavimmiippoq.

- Ullumi siullerpaamik pisuppoq kisianni inini qimanngilaa. Ungasissumukanngilaq, eqqartuussisuserisoq Stephen Ferrell pingasunngornermi unnukkut tuluit tusagassiorfiannut oqarpoq.

Pike toqqaannartumik oqaloqatigisimannginnerarpaa allanillu tusarsimallugu. Pike suli eqqarsartaatsikkut paatsiveerusimaarpoq, aamma “ajunnginnerulerlunilu ajornerulertarpoq”, taanna oqarpoq.

Pike eqqarsarluarsinnaarpianngitsutut aamma sumukarnerminik puigulertortartutut oqaluttuaraa.

Napparsimmavimmi anersaartuummik ikiuuteqarluni uninngareersoq, eqqartuussisuserisua marlunngormat ilisimatitsivoq ilisimmarsimasoq oqalussinnaasorlu.

Ferrellip Pikemillu illersuisut allat toqumik pillarneqarnera inuunermi sinnerani misiliummik iperagaasinnaajunnaarluni paarnaarunneqarnissaanut sakkukillisinneqarnissaa kissaatigaat.

Pike 1995-imi atuaqatiminik 19-inik ukiulimmik Colleen Slemmerimik toqutsisimasutut eqqartuunneqarpoq. Pike taamanikkut 18-inik ukioqarpoq. Ukiut 200-t sinnerlugit Tennesseemi arnamik toqumut pillaasoqarsimanngilaq, maannalu Pike ukiuni taakkunani siullerpaajulluni.

Angut 46-nik ukiulik USA-mi Texasimi toqumut pillarneqarsimasoq pingasunngornermi kapuummik kapineqarpoq. Pikemik toqutseriaraluarnerup iluatsinngitsoortup kingorna siullerpaamik toqumut pillagaasumik toqutsisoqarluni.

USA-mi Tennesseemi aamma naalagaaffinni allani toqumik pillakkanik toqutsinissamut atugassat pissarsiariniarneqarnerat ajornartorsiutaavoq.

Nutaarsiassaqartitsivik Reuters naapertorlugu EU-mi naalliutsitsinermut toqutsinermullu atortunik nioqquteqarnermut inerteqquteqarneq pissutigalugu nakorsaasiorfissuarnit pissarsiarineqarsinnaanngillat, taamaammallu suliffeqarfiit minnerit pisinarfigineqartariaqarlutik.

USA-mi naalagaaffinnit 50-iusunit 23-ni toqumut pillaaneq atorunnaarsinneqareerpoq.

RITZAU