Danmarki Greenland Airportsimut tapiissuteqarpoq, innuttaasunullu aningaasaqarnikkut ilungersunartorsiortunut ikiorsiissuteqarluni

Marlunngornermi Danmarkimit Kalaallit Nunaannut aningaasaliissutit arlallit pillugit isumaqatigiissummut ilassummik isumaqatigiissuteqartoqarpoq.

Taama Naalakkersuisut tusagassiuutinut nalunaarummi ilisimatitsipput.

Aningaasaqarnermut Naalakkersuisoq Aqqaluaq B. Egede (IA) aningaasaqarnermullu ministeri Peter Hummelgaard, Kalaallit Nunaat imminut napatittoq pillugu sinaakkutitut isumaqatigiissutip ineriartorteqqinneranut atatillugu isumaqatigiissummik atsiortuupput.

Aningaasaliissutit ataasiakkaat takussutissiami tulliuttumi takuneqarsinnaapput. Tassani ukiumut 200 mio. kr-t ukiuni pingasuni aggersuni kalaallit napparsimasut katsorsarneqarnerannut immikkoortinneqarput. Isumaqatigiissut ilaatigut danskit peqqissutsimut ministeriata Nuummut qanittumi tikeraarnerani nalunaarutigineqarpoq.

Tamatuma saniatigut aningaasat annertuut Greenland Airports Internationalimut, Nuummi mittarfimmik Ilulissanilu mittarfissamik nutaamik piginnittuullunilu ingerlatsisumut immikkoortinneqarput. Danskit naalagaaffiat ingerlatseqatigiiffimmi piginneqataavoq.

Greenland Airports International piffissami pineqartumi 400 mio. kr-nik pissarsissaaq. 

Taamattaaq kalaallinut innuttaasunut ikiorsiissutissanut 45 mio. kr-t immikkoortinneqarput. Aningaasat ukioq manna atugassanngortinneqassapput.

Ilulissani imeqarfimmut killeqarfik nuunneqassasoq

Tamatuma saniatigut 92 mio. kr-t pilersuinermit immikkoortumut, pilersuinermik suliffeqarfik namminersorlutik oqartussanit pigineqartoq aqqutigalugu 92 mio. kr-t pingaarnersiorneqarput, taakkulu ullutsinnut naleqqunnerusumik patajaannerusumillu nukissiuuteqarnikkut attaveqarnermut ikiorsiissutaassapput, kiisalu 55 mio. kr-t Ilulissani imermik pilersuinermik suliniutinut immikkoortinneqarput.

Isumaqatigiissummi 55 mio. kr-t taakku Ilulissani imeqarfiup killeqarfiata pioreersup illoqarfimmik inuussutissarsiornermillu ineriartortitsinermik nunaminertanik atugassanngortitsinissaq siunertaralugu nuunnissaanut annikillisinnissaanullu aningaasalersuutaanissaat allassimavoq.

– Taakkununnga aningaasaliissutit siunissami imermik pilersuinerup annertusisinnaanera siunertaralugu Kangerluarsuup Qinnguani imeqarfiusinnaasumik misissuinernik aallartitsinissamut atorneqassasut, isumaqatigiissummi ilanngullugu allassimavoq.

Naggataagut 20 mio. kr-t Qaqortumi immami itisuumi umiarsualivissamik Ittoqqortoormiinilu mittarfissamik misissueqqaarnissanut immikkoortinneqarput. Suliap ingerlaqqinnera suliniutinillu aningaasalersuinerit Kalaallit Nunaanni naalakkersuisoqarfinnit Danmarkimilu ministereqarfiit attuumassuteqartut akornanni ataqatigiissarneqarnissaa isumaqatigiissummi allassimavoq.

MELLEMRUBRIK: Naalakkersuisoq nuannaartoq

Ukiup ataatsip matuma siorna Naalakkersuisut siulittaasuat Jens-Frederik Nielsen (D) ministeriunerlu Mette Frederiksen Kalaallit Nunaat imminut napatittoq pillugu sinaakkutitut isumaqatigiissummik ukiuni 2026-mit 2029-mut agguataakkanik 1,6 mia. kr-nik anngaasartalimmik atsiorput.

Ulloq manna isumaqatigiissutip immikkoortuani 2-mi 1,2 mia. kr-t atugassanngortinneqarput. Isumaqatigiissutip immikkoortua 1 februaarimi atsiorneqarpoq, 185 mio. kr-llu atugassanngortinneqarlutik.

Aningaasaqarnermut Naalakkersuisup Aqqaluaq B. Egedep isumaqatigiissutip immikkoortuata 2-p maanna naammassineqarnera nuannaarutigalugu oqarpoq:

”Peqqinnissaqarfimmut immikkoortumi isumaqatigiissutikkut kalaallit napparsimasut Danmarkimiittarnerannik ataavartumik aaqqiissutissap tungaanut alloriarpugut. Taamattaaq 2030-p kingorna aningaasalersuinerup isumaqatigiissutiginera pitsaasorujussuuvoq. Taamattaaq isumaqatigiissuteqartugut illuatungeriit peqatigiilluta sinaakkutitut isumaqatigiissummi suliniutit allat nangittumik atuutilersinnissaannik aningaasalersuinermik malitseqartitsinissarput naammagisimaarnartorujussuutippara, taamaalillutik taanna pisariaqartinneqavissunik takutitsisuussalluni.”