Danskit Venezuelamiittut kaammattorneqarput qimagutissasut
Venezuelami pissutsit ilungersunartuupput. Danskit tassaniittut qimagunnissaannik nunanut allanut ministeriaqarfimmit kaammattornqarput.
Venezuelap præsidentiata, Nicolás Madurop, USA pasillerpaa tunuartitaanissaminik nunallu tiguarneqarnissaanik pilersaaruteqarnerarlugu.
Asseq (Toqqorsivimmit): Gaby Oraa/Reuters
Nunanut allanut ministereqarfik kaammattuivoq danskit venezuela-miittut tamarmik, nuna qimassallugu eqqarsaatigisariaqaraat.
Nunanut allanut ministereqarfiup innuttaasunik sullissivia attaveqaqatigiittarfik X aqqutigalugu taamak allappoq.
Kaammattuineq pissuteqarpoq, nunap amerikap kujataaniittup isumannaallisaanikkut naatsorsuutigineqarsinnaannginneralu.
Tamanna pissutalluni nunap killeqarfiisa silaannartaatalu matuneqarsinnaanerat aarlerinaateqarpoq, ministereqarfik allappoq.
Nunanut allanut ministereqarfiup innuttaasunik sullissivianiit kaammattuineq nittartakkami nassuiaateqarpoq. Tassani erserpoq, timmisartuutileqatigiiffiit arlallit timmisartuussinerminnik unitsitsisimasut.
Venezuelamiiginnaraanni, qulakkeerneqassaaq nerisassat, imeq, nakorsaatit benzinallu naammattut sillimmatigissallugit.
Aammattaaq mianersornissaq pingaaruteqarpoq, Venezuelami oqartussaasut nunanit allaneersunik pissutissaqanngitsumik tigusarinnissinnaanersat aarlerinaateqarmat.
Ulluni amerlasuuni parnaarussaasinnaanissaq aarlerinaateqarpoq, soorlu isertortumik paasiniaasimanermut pasilliineq tunngavigalugu, nunanut allanut ministereqarfik nittartakkamini allappoq.
Kaammattuineq pivoq, Venezuelami præsidenti, Nicolás Maduro, tallimanngornermi unnuakkut umiarsuaq uuliamik assartuut Venezuelamit pigineqartoq USA-mit tiguarneqarsimammat, Maturo naapertorlugu pinerluttuliornikkut.
Trumpip aqutsisoqarfiata qaammatini arlalinngortuni Venezuelamut sakkortuumik tatisivoq, nunap immikkoortuani sakkutooqarnikkut annertusaalluni.
Amerikamiut sakkutuuisa Caribiap Imartaani imaatigut angalasut pasineqartut arlallit qaartartumeerpaat, tamannalu inuit 90-it missaannik toqumik kinguneqarpoq.
Trump-ip sisamanngornermi tusagassiortunut Illorsuarmi Qaqortumi oqarpoq USA-p nunamiittut pasineqartut ilanngullugit akiorniarlugit aallartissasoq, Reuters allappoq.
Præsidentip siornatigut nunami saassussinissat ilimasaarutigereerpai, kisianni sumi qaqugulu pissanersoq nalunarallarpoq.
Trump-ip aqutsisoqarfia oqarpoq Caribiami saassussinermi USA-mut ikiaroornartunik eqqussuinerit unitsinniarnissaat siunertarineqartut.
Illuatungaani Nicolás Madurop oqaatigaa USA tunuartitaanissaminik pilersaaruteqartoq, tamannalu siunertaralugu USA-p Venezuelap sineriaata qanittuani sakkutooqarnikkut annertusaalluni piareersartoq.
Nunanut allanut ministeriaqarfiup innuttaasunik sullissivianit toqqaannartumik nassuiaateqartoqanngilaq sooq danskit Venezuelamiittut qimaguteqqullugit kaammattuuteqartoqarnersoq.
Danmark Venezuelami aallartitaqarfeqanngilaq.
