Digitalimik ineriartortitsinermut ministerip EU-mi inuit nittartakkatigut attaveqaqatigiittarfiini inerteqquteqalerneq ilassigaa

Ajornartorsiutip imaannaanngitsup aaqqiiviginarneqarnerani alloriarneq pitsaasoq.

Meeqqat inuit nittartakkatigut attaveqaqatigiittarfinni ajoqusiisinnaasunik uerinartortalinnik ingalassimatinniarlugit kommissioni siunnersuuteqarumaartoq, EU-kommissionip siulittaasuata Ursula von der Leyenip pingasunngornermi siusinnerusukkut nalunaaruteqareersorlu, digitalimik ineriartortitsinermut ministeri Christina Egelund (M) taama oqarpoq.

- Europami ajornartorsiut tamanna maannakkut aamma sammineqarmat iliuuseqarfigineqarneralu nuannaarutigaara, Christina Egelund oqarpoq.

"Kids Act" naapertorlugu meeqqat 13-it ataallugit ukiullit inuit nittartakkatigut attaveqaqatigiittarfinnut, taamatullu meeqqat 13-iniit 14-it tungaanut ukiullit namminneq nittartakkanut isersinnaajunnaarsinneqassapput.

Danmarkimi naalakkersuisut assigiinngitsut inuit nittartakkatigut attaveqaqatigiittarfiini, sumiiffiit ilaanni imminut ajoqusernissamut nakuusernermullu kajumissaariffiusuni, ukiunut killiliinissamik sulissuteqartarput.

Meeqqat 15-it inorlugit ukiullit inuit nittartakkatigut attaveqaqatigiittarfinnut isernissaat inerteqqutiginiarlugu, aamma angajoqqaat meeqqaminnut 13-iniit 14-inut ukiulinnut nittartakkatigut atuiffissanik pilersitsisinnaannginnerat, naalakkersuisoqatigiit toqqammaviat junimeersoq aallaavigalugu allassimavoq.

Tassa EU-Kommissionip siunnersuutigisaanit sukanganerusoq.

- Angajoqqaajusut aalajangiinerat apeqqutaalluni, 13-14-inik ukiullit arlaannik akuersissuteqarpata tamanna inuusuttut akornanni tatineqarnermik kinguneqarsinnaavoq.

- Isumaqarpunga inersimasut akisussaassuseqartut aalajangertariaqartut 15-inik ukioqalernissaq killeqarluinnartoq, ministeri oqarpoq.

Christina Egelundip tikkuarpaa eqqaamasariaqaripput inuit nittartakkatigut attaveqaqatigiittarfii inunnut allanut attaveqarluarnissamut iluamik iluaqutaanngitsut.

- Nittartakkami ajoqusiisinnaasunik, imminut ajoqusernissamut kajumissaarisunik, nakuusernermik peqquserlunnermillu imalinnik ulikkaarpoq. Tamakku meeqqat inuusuttullu peqqissumik inuuneqarnissaannut kissaatigisatsinnut naapertuutinngilluinnarput, oqarpoq.

Christina Egelundip ilanngullugu oqaatigaa inuusuttut inuit nittartakkatigut attaveqaqatigiittarfinni nuanniitsunik ajoqutaasunillu naapitsisinnaanerannut tunngatillugu ukiunik killilersuinissaq ajornakusoorsinnaasoq.

Inuusuttut 15-ileereersimasut inuit nittartakkatigut attaveqaqatigiittarfianni atuisinnaalernertik pissutigalugu aamma ajornartorsiulersinnaapput, namminneq nittartakkatigut atuiffiit pilersissinnaavaat, tamannalu aamma tatineqaatigisinnaavaat.

- Taamaattumik ajornartorsiut ukiunut killilersuinikkut imaluunniit niaqqumik killuinikkut aaqqinneqarsinnaanngilaq. Technologinik suliffeqarfissuit inatsisinillu unioqqutitsisunik imalinnik piiaasalernissaannut tatineqartuartariaqarput, oqarpoq.

- Paasissutissat ajoqusiisinnaasut aamma pinngitsuuisinnaajunnaarsitsisartut peerneqarsinnaanerat, tassa algoritmit piffissamik tillinniarnermik siunertaqartut, akiornissaat pillugu nunap inatsisaani peqqussutigineqarsinnaanersoq, danskit naalakkersuisuini misissorpavut, oqarpoq.

Christina Egelund isumaqarpoq technoliginik suliffeqarfissuit nittartakkaminni inuit attaveqaqatigiittarfiinik neqerooruteqartartut maanna "nalissaqanngitsumik periarfissaqalersimasut suleqataalluartutut takutitsinissaminnik, akerlianik pinnatik“.

- Inuppassuarnik atuiffigineqartumik atuisuutitsinermi akisussaaffimmik pitsaavallaanngitsumik isumaginnipput, ministeri oqarpoq.

- Technoligimik suliffeqarfissuit akisussaaffeqarnerulernissaata tungaanut uagut nammineq akisussaaffipput ingerlatiinnassavarput — tassa meeqqanut inuusuttunullu ajoqutaasinnaasunik peersitsisarnissarput, Christina Egelund oqarpoq.

RITZAU