Disko Linep umiarsuaq innaallagiatorlunilu ikummatissatortoq atorunnaarniaraa

Disko Linep umiarsuaa ikummatissartorlunilu innaallagiatortoq Maliina Ittuk ukiorpassuarni kinguaattoorfioreerluni siorna oktobarip 20-ani Qaqortumut tikippoq. Umiarsuarli qanittukkut atorunnaassasoq, Disko Line tallimanngornermi ullaakkut tusagassiuutitugut nalunaarummi ilisimatitsivoq.

Qaqortumi mittarfik upernaaru apriilip 16-ani ammarneqarpat umiarsuup atorunnaarnissaa aalajangerneqarsimasoq, Disko Line ilisimatitsivoq.

AAMMA ATUARUK

Maliina Ittuk kiisami naammassineqarluni tikiunneqartoq

Umiarsuaq ingerlalluarsinnaaqqullugu umiarsualivimmi atortut pisariaqartut qulakkeernissaat iluatsissimanngitsoq Disko Line paasissutissiivoq. Ilaatigut taliffissaq, nunami innaallagiammut aqqut isumannaatsumillu inissiffissaq pineqarlutik.

Silarlutsillugu umiarsuaq ajoqusinnginniassammat unnuami nuuttariaqartarnera arlaleriarluni pisimavoq. Umiarsuarmi inuttanut tamanna unammillernartoqarluni.

Disko Line naapertorlugu umiarsuup kiffartuussinissaanut isumaqatigiissut mittarfittaarpat qaangiutissaaq. Tamatuma kingorna susoqarumaarnersoq suli paasineqangilaq.

Maliina Ittuk Disko Linep ilaasartaataani 113-inik ilaasoqarsinnaalluni annerpaavoq. Umiarsuup sanaartorneqarnera ingerlalluarani katillugit ukiut arfinillit sananeqarnikuulluni. Umiarsuaq ikummatissartorlunilu innaallagiatorpoq, tassa aamma innaallagissamik ingerlasinnaavoq.