Dr. Phil TV-mi aallakaatitassiami: Jameson Landip USA-p nukissiornermut tunngatillugu siunissaa allanngortilluinnarsinnaavaa

Amerikamiup inooriaaseq pillugu siunnersuisartup tusagassiuutitigullu ilisimaneqartup Dr. Phil-ip uuliasioqatigiiffik Greenland Energy Company, tuluit suliffeqarfiutaat 80 Mile suleqatigalugu Jameson Landimi uuliasiornissamut akuersissutaateqartoq, suleqatigilerpaa. Taakku „Kalaallit Nunaanni uuliasiorneq“ pillugu tv-kkut aallakaatitassialiorput.

Nageqattaartuni aallakaatitassiaq siulleq Dr. Phil-ip YouTubemi oqaloqatigiilluni aallakaatitanut quppernerani takuneqarsinnaalereerpoq, maannalu 4.380-eriarluni isiginnaarneqareerluni.

Issittumi misigisassarsiorneq pinerata nalaani filmiliarineqartoq

Immikkoortumi 44 minutsinik sivisussuseqartumi Dr. Phil-ip Greenland Energy Companymi pisortaq Robert Price siulersuisuinilu siulittaasoq Larry Swets Kalaallit Nunaanni pilersaarutit pillugit apersorpai.

Robert Pricep ilanngutassiami ilaatigut qillerinerit marluk pilersaarutigineqartut, uuliasioqatigiiffiup atortussat sulisullu tamarmik Jameson Landimut apuutereerpata oktobarip sapaatit-akunnerini siullerni marlunni pisussatut naatsorsuutigineqartut, oqaluttuarai.

Dr. Phil-ip filmiliaq taanna „Issittumi misigisassarsiornertut“ åinerata nalaani filmiliarineqartutut taavaa: - Qillerut nunamut pulappat najuutissaagut. Tamakku tamaasa ilissinnut takutissavagut, taanna oqarpoq nangillunilu:

– Apuuteqqaanniunnermi matumani ajorsarnissarput akissaqartinngilarput. Nunat tamalaat Kalaallit Nunaanni uulia piumasussaavaat, tassami Kalaallit Nunaanni pisut Kalaallit Nunaanniiginnarneq ajorput.

Prudhoep Kangerluanut assersuukkaa

Robert Pricep Jameson Land Alaskami Prudhoe Baymut, Jameson Landip allorniusani sanimukartuni inissisimaffiata nalaaniittumut uuliamillu annertuumik aamma nassaarfiusimasumut, arlaleriarluni assersuuppaa.

- Uuliasiorfimmi Prodhoep Kangerluaniittumi uulia nappartat 13 milliardit sinnerlugit tunisassiarineqarpoq, ullumikkullu aningaasat nalingat malillugu 1,3 milliardit dollarinik naleqarpoq, Robert Price oqarpoq nangillunilu Jameson Land annerusinnaagaluartoq oqaatigaa.

- Aamma Jameson Land tamaat pigaarput; 2 millionit hektarit, oqarpoq Jameson Landimilu uuliamik nappartat 13 milliardit sinnerlugit imaqarsinnaasut nalunaarusiami arlaannaannulluunniit attuumassuteqanngitsumi missiliuunneqarsimasoq innersuussutigaa.

Kalaallit Nunaanni innuttaasut

Dr. Philip siulersuisut siulittaasuat Larry Swets uuliap Kalaallit Nunaanni innuttaasunut qanoq sunniuteqassanersoq aperaa, ilaatigut “Trumpip Kalaallit Nunaata pisiarerusullugu oqartarnera tusartareerparput, taamaakkaluartoq Kalaallit Nunaannut tamanna naleqartorujussuuvoq, ilaa?” oqaatigalugu.

– Assut. Qillerinermi uuliamik annertuumik nassaartoqassappat tamanna innuttaasunut pingaaruteqarluinnassaaq. Tamannalu suliniummut kajungilerninnut pissutaasut ilagaat. Aningaasaliisartutut soorunami aningaasarsiornissaq siunertaraara, kisiannili aamma allanik anguniagassaqarpoq. Nunarsuarmi politikki inunnullu tunngasut, Larry Sweets oqarpoq. Kalaallit Nunaanni inuit amerlanersaat takornariartitsinermik, aalisarnermik piniarnermillu inuussutissarsiuteqartut nunamilu innuttaasut 'qasusuillutik, eqqissillutik ilakkuminartuusut' ilanngullugu oqaatigaa.

AAMMA ATUARUK

Dr. Phil Kalaallit Nunaanni uuliasiorneq pillugu tv-mi aallakaatitassialiussasoq

– Attaveqaasersuutilli suliffissallu amigaataapput. Atortorissaaruteqanngimmat aserortoqassagaluarpat nammineerluta aallertariaqassaagut.

Uulia kangerlummukaanneqassasoq

Uulia niuerutaasussamik nassaartoqassagaluarpat Jameson Landimiit qanoq assartorneqassanersoq aallakaatitami aamma eqqartoqarneqarpoq.

– Uuliasiornermi gassisiornermilu Amerikamiut isumassarsiorsinnaanerat apeqquserneqassanngitsoq ilikkarnikuuara. Kangerlummi sissaminngaanniit kilometerinik tallimaannarnik ungasitsigisumiippugut, uuliamillu imaatigut assartuisinnaassaagut — taannalu ullormi ataatsimi angalanerinnaavoq. Tuniniaaviit amerlanersaat Europamiipput, tamannali aamma USA-mi tuniniaavinnik ineriartortitsisinnaavoq.

TV-mi tiguartinnartoq

Dr. Phil naggasiivoq:

– Aningaasat dollarsit milliardillit sikup ataaniipput. Nunarsuarmi sumiiffiit peqqarniissinnaasut ilaat. Angutip ataatsip nassaarfigisinnaasorisaa. Taamaaliortariaqarnera, pinngortitamut qanoq sunniuteqarsinnaanera, Kalaallit Nunaannut nunarsuullu sinnerani nukissiornermik tunisassiornermi qanoq sunniuteqarsinnaanera oqallisigineqarsinnaajuaannarpoq. Sunali qillernera oqallisigineqarsinnaanngilaq. Malinnaaffigalugu tiguartinnassaaq.

Ingerlatseqatigiiffiup pilersaarutai naapertorlugit qillerivimmut atortussat Montrealimiit Nuuk Islandilu aqqusaarlugit Jamesonlandimut septembarimi assartorneqassapput, oktobarimilu sapaatip-akunnerini siullerni marlunni qillerinerit aallartissallutik.

Uuliasioqatigiiffik atortussiaanngitsunik allanik nunamukaassisinnaanersoq aatsitassanut naalakkersuisoqarfimmit suli akuerineqanngilaq. Uuliasiorluni qillerisoqalersinnaanera aamma suli akuersissutigineqarani.