ECB-p erniat attatiinnarpai aningaasallu naleerukkiartorsinnaanerat tikkuarlugu
Kangiani Qiterlermi sorsunneq aningaasat naleerukkiartornissaannut ilimanaateqarnerulersitsisoq ECB naqissusiivoq. Taakku erniat 2 procentimiitiinnarnissaat aalajangiusimavaat.
Christine Lagarde tassaavoq Den Europæiske Centralbankip (ECB) præsidentia, maanna oqaatigineqarpoq, aningaasat nalikilliartornerat qaffariarsimasoq.
Foto: Heiko Becker/Reuters/Ritzau Scanpix
Europami aningaasaateqarfik qitiusumik inissisimasoq (ECB) sisamanngornermi ataatsimiinnermi erniat 2 procentiuinnarnissaat aalajangiusimavaat.
Aningaaseriviup qitiusup tusagassiuutitigut nalunaarutigaa.
Aningaasat naleerukkiartornerat aamma ineriartornerup annikinnerulernissaa aarlerinartoq aningaaserivimmiit tikkuarneqarpoq. Tamanna Kangiani Qiterlermi sorsunnerup nukissiuutillu akitsoriartornerata kingunerisaanik pissutsit ineriartornerat eqqarsaatigalugit isigineqassaaq, allassimavoq.
ECB-p aningaasat naleerukkiartornerat ineriartornerlu piffissami aggersumi malinnaavigissavaa, taamaalillunilu aningaasanut politikkini naleqqussassallugu.
Danske Bankimi aningaasaqarnermut pisortaq Las Olsen naapertorlugu, ECB-p ernianik nalunaaruteqarnerata kingorna erniat qanoq pineqassanersut suli ilisimaneqanngilaq.
- Qanoq pisoqassanersoq nalunarpoq.
- Aningaaseriviup nukissiuutit akitsorneri aningaasat naleerukkiartornerannik aamma ineriartornerup annikinnerulerneranik kinguneqarumaartut nalunaarutigaa, tamannalu erniat nikerarnerannik kinguneqarsinnaalluni, Las Olsen allakkatigut akissuteqarluni oqarpoq.
Europami Qitiusumik Aningaasaateqarfiup akit qaffannerat erniat qaffannerinik iliuuseqarfigisinnaanerat "ilimanaateqarluartoq" ilanngullugu oqaatigaa.
Philip Jagdip, Sampensionimi piginneqataassutsinut pisortaq, ECB-p erniat nikisinnaveersaarniarnerat "tupaallannarnerpaajunngitsutut" taavai.
- Europami aningaasat naleerukkiartornerat ajortumut ingerlagaluartoq, 2023-milu septembarimili aatsaat taama qaffasitsigilersimasoq, soorunami ECB-p eqqumaffigilluinnarpaa. Kangiani Qiterlermi ineriartorneq tamatumalu Europami aningaasaqarnermut sunniutai maannakkut erseqqinngillat, oqarpoq, nangillunilu:
- Taamaattumik Christine Lagardep suleqataasalu erniaqartitsinerup qaffannissaa aalajangertinnagu pissutsit utaqqivaat.
/ritzau/
