Elite Sport Greenland ernumavoq

Elite Sport Greenlandip kalaallit timersortartut, pikkorivissut, nunatsinniittut nunattalu avataaniittut tapersersugarai. Kattuffik aningaasanik aningaasanut inatsit aqqutigalugu ilaatigut aamma pissarsiaqartarpoq. Naalakkersuisut aningaasanut aappaagumut inatsisissatut siunnersuutaanni peqatigiiffik ukioq manna 3.2 millionit koruuninik pissarsisoq, aappaagu 2.2 millionit koruuninik pissarsissaaq. Tassalu aningaasalerneqarnera millionimik ataatsimik ikilisussanngorataannaavoq.

Tamanna kattuffiup isorigaa, siulersuisuni siulittaasoq tusagassiorfinnut nalunaarpoq. Aningaasaliinikillisoqassappat tamanna timersortartut malugissagaat, Elite Sport Greenland naliliivoq.

- Aningaasatigut sinaakkutit siunnersuutigineqartutut aalajangiusimaneqarpata, tamanna Elite Sport Greenlandip timersuutit kattuffiinik maanna suleqatigisaminik tapersersuinissamut periarfissaanut toqqaannartumik sunniuteqassaaq, peqatigisaanillu tapersersuilluni suleqateqarnernik nutaanik aallartitsinissamut periarfissat killilerneqassallutik, Elite Sport Greenland allappoq.

Elite Sport Greenland Kalaallit Nunaanni timersortartut kattuffii suleqatigalugit, timersuutini assigiinngitsuni pikkorivissunik ineriartortitseqataasarpoq.

Naalakkersuisoqatigiit: Timersornermut aningaasaliissutit ikippallaarput

Naalakkersuisoqatigiinnissamut isumaqatigiissutitut tunngaviusoq alakkaraanni, timersornermut tunngasunik allassimasoqarpoq. Naalakkersuisoqatigiit isumaqatigiissutaanni allassimasut naapertorlugit timersornermut aammalu pikkorivissut timersornerannut aningaasat ikippallaat atorneqarput. 

- Inuiaqatigiittut nunatullu timersornermut tamarmiusumut pikkorinnersallu timersornerannut aningaasat ikippallaartut atortarpagut.

- Pikkorinnerit nunatsinni timersortarnerat aamma pitsanngorsaavigineqartariaqarpoq, Naalakkersuisoqatigiit isumaqatigiissumminni ilaatigut allapput. 

Oqaatsit taakkua maanna iliuusaasumut, tassa aningaasaliinikillinerunissamut naapertuuttuunersut oqallisigineqarsinnaavoq.

Pitsaasumik ingerlaannarnissaq qulakkeerneqassappat aningaasaliissutaasut aamma naleqquttuusariaqartut pikkorivissunik suleqateqartartut isumaqarput. Taamaattumik aningaasaliissutaasut aningaasanut inatsisip pingajussaaneerneqannginnerani naammagisimaarsinnaasaminnut inissinneqarnissaat neriuutigaat.

- Elite Sport Greenland isumalluarpoq naatsorsuutigalugulu aningaasanut inatsisissaq pillugu isumaqatigiinniarnerni aggersuni timersortartunik pikkorinnerpaanik aallussinerup nukittorsarneqarnissaanut politikkikkut soqutiginnittoqassasoq, taakkua allapput.

Angusarissaartut

Taakkua tapersersugaat, peqatigiiffiup naliliinera naapertorlugu, ukioq manna pitsaasunik angusaqartut ilaatigut tassaapput, Ukaleq aamma Sondre Slettemark ukiuunerani OL-imut peqataasut, angutit assammik arsarlutik nunanut allanut unammisartut, Amerika Avannarlermi Caribiamilu pissartanngorniunnermi pitsaanerit aappaattut inissittut aammalu sulorarluni nunanut allanut unammisartoq, Maluk Tiger Christoffersen,  kalaallit sulorartartut akornanni siullersaalluni Danmarkimi sulorarnermi ligami qaffasinnerpaami unammisartunngortoq.

Pitsaasunik angusaqartarneq ineriartornerlu tamanna ingerlaannartariaqartoq siulittaasoq isumaqarpoq.

- Maannamut nunanut allanut unammisartoqarneq qiviaraanni tulluusimaarutissarpassuaqarpugut. Timersortartutta nunanullu allanut unammisartut takutittarpaat nunat tamalaat akornanni unammineranni unammillersinnaassuseqartugut. Ineriartornerlu taanna pitsaasoq ingerlatiinnartariaqarparput, Angutinnguaq Hegelund-Tittussen oqarpoq.