Ellen Schärfe taaneqarnerpaat sisamaattut inissippoq: Uattut ittunik pisariaqartitsisoqarpoq

Nunatsinni qinersiviit matoqqammitsiartut kisitsinerit inerneri saqqummillattaalerneranni kikkut qinerneqanerpaanersut erseriartuaarpoq.

Naleqqap ilaasortaatitaqalernissani qulakkeerpaa, ilaasortaaffiullu aappaa Naalakkersuisunut ilaasortanit marluusunit IA-meersumut Demokraatineersumullu unammissutaalerput.

Aterli alla nuillattaarpoq, tassa Ellen Schärfe Atassummeersoq.

Qineqqusaartut 27-t akornanni 1553-inik qinerneqarluni taaguunneqarnerpaat sisamaattut inissippoq. Folketingimut ilaasortanngunngilaq, taamaattorli Atassutip siuariarujussuarneranut peqqutaaqataalluni, partiimi 2022-mi 3,7 procentiniit ukioq manna 10,7 procentinut qaffariarluni.

- Maniguuttorujussuuvunga sineriammiilu tapersersorneqarnera qujamasuutigingaarlugu, tamannami aamma politikkikkut soqutiginneqqilerninnut uppernarsaataavoq, Atassutillu politikkikkut inissisimaneranut pisariaqartinneqarnera malunnarpoq, oqarpoq.

Atassutip siuariartornera – qinersisartunilu partiini suli minnerpaajugaluartoq –naalagaaffeqatigiinnermut nunamilu namminermut politikkimut qanoq inissisimanera innuttaasut paasiartuleraat, Ellen Schärfe isumaqarpoq

Aningaasarsiutigiinnarlugu politikkeriorusunngitsoq

Ellen Schärfe siullermeerluni qinigassanngortinngilaq - naak politikkikkut sulinera ukiorpaaluit matuma siorna pigaluartoq. Atassut sinnerlugu Folketingimut ilaasortatut kingullermik 1998-imi qinigaavoq.

Qanorli ililluni qinersisartunit ukiorpassuarni politikkimut akuliusimanngikkaluartoq suli eqqaamaneqartoq?

- Isumaqarpunga inunnik oqaloqatiginnissinnaanera, inuillu kisiisa pinnagit, aamma piviusorsiortutut politikkikkut sammisassat avataanni pissutsit qanoq ittuunersut ilisimasaqarfiginerat peqqutaaqataasoq.

- Imminut qinersisartunullu aningaasarsiutiginiaannarlugu politikkeritut inissisimaannarniarnanga neriorsorpunga. Politikkimik suliaqarunnaarlunga pissutsit piviusut paaserusullugit innuttaasutut inissisimanissara aamma pingaartinnikuuara, oqarpoq.

Qinersisartunit tapersersorneqarluaraluarluni Ellen Schärfe Atassummeersunilluunniit allamik Folketingimut ilaasortanngortoqanngilaq. Qinersisartulli naggataasumik takussanngilaat.

- Maanna politikkimut uteqqippunga, qularutigineqassanngilaq Inatsisartunut qinersisoqarpat atima qineqqusaartut allattorsimaffianiinnissaa, oqarpoq.

Innuttaasut qitiutinneqassapput

AAMMA ATUARUK

Ukiut 15-it ingerlaneranni qinersiartortut aatsaat taama amerlatigipput

Atassutip qinersinermi angusarissaarnera Ellen Schärfep kisimiilluni peqqutaasutut inissiffigerusunngilaa. Partiip politikkia, naalagaaffeqatigiinnermik naligiissitsisumik aammali Kalaallit Nunaanni inuiaqatigiinnik naligiissitsisumik siuarsaasuusoq, pingaartippaa.

Ilaatigut innuttaasut qitiutinneqarnerannut tunngatillugu. Inatsisit amerlasuut Danmarkimi inatsisinit aallaaveqartarput, taakkulu Kalaallit Nunaanni atuutsinneqarput, tamannalu iluarsineqartariaqarpoq.

- Kalaallit ileqqutoqaat, kulturiat oqaatsillu, naleqartitaallu eqqarsaatiginerusariaqarpavut. Pissutsit kalaalinngorsarneqassanngillat, namminerli kinaassutsitta inatsisinut ilanngunnissaa aallartittariaqarparput, paasiuminarnerutillugu naleqqunnerutillugulu, Ellen Schärfe oqarpoq.

Taamaattoqartilluguli innuttaasut peqataalernissaat aamma pisariaqartoq oqarpoq. Qinersisinnaasut 52 procentii marlunngornermi taasiartorput, tamannalu Folketingimut qinersinermi amerlagaluartut suli ikippallaartut, Atassummi politikkeri isumaqarpoq.

- Isumaqarpunga sumiiffippassuarni qinersiartortut taama ikitsiginerat ernumanartoqartoq, taamaattumik inuit kaammattorpakka peqataaneruleqqullugit.

- Sumummi iluaqutaassava qinersisimanngikkaannimi qinersinerup inernera isumakuluutiginissaa?