Enhedslistenip Amerikamiut suliffeqarfiutaat Palantir Danmarkimi inerteqqutaalersikkusuppaa

Enhedslistenip Amerikamiut suliffeqarfiutaat Palantir isertortumik paasiniaasartunut softwere-rimik pilersuisoq piffissami sivitsortumi, ilaatigut Danmarkimi isertortumik paasiniaasuni aamma atorneqartoq, isornartorsiorsimavaa.

Qarasaasianut programmit Palantirimeersut Danmarkimi naalagaaffiup politiivini, politiit isertortumik paasiniaasartuini pisortallu allaffeqarfiini inerteqqutaasariaqarput.

Taama isumaqarpoq Enhedslistenip politikkikkut oqaaseqartartua, Pelle Dragsted.

Partiip aasaanerani ataatsimiinnissaa sioqqullugu taama nalunaaruteqarpoq.

Partii taanna qiterlermiit saamerlermut naalakkersuisooqatigiinni tunngaviuvoq.

Aningaasanut inatsisissatut ukioq manna isumaqatiginninniarnernut, atatillugu danskit oqartussaasui software-mik Palantirimeersumik danskinit europamiulluunniit sananeqarsimasumik taarserneqarnissaanut aningaasaliisoqassasoq, Enhedslistenip piumasaraa.

- USA-p Danmarki Kalaallit Nunaallu pillugit paasissutissanik mianernartunik Palantiri atorlugu pissarsiniarsinnaanera ernummatigaarput. Tassani pineqarput qarasaasiatigut oqartussaaneq nammineersinnaanerlu. Trumpimut taassumalu naalakkersuisuinut sanngiitsutut inissisimassanngilagut, ilisimavarput paasissutissat mianernartut tatisinermut atuisartut, Dragsted oqarpoq.

Amerikamiu pisooq Peter Thiel, Palantirimik pilersitseqataasoq, USA-p præsidentianik Donald Trumpimik tapersersuisutut ilisimaneqartoq, taanna oqarpoq.

USA-p præsidentiata piffissami sivitsortumi Kalaallit Nunaata tiguarnissaa kissaatigaa.

Dragsted isumaqarpoq Trumpip Palantirilu imminnut qanippallaartut. Palantirip USA-mi naalakkersuisunut paasissutissanik misissuinermut programmit tuniniartarpai.

Dragstedip isumaqatigilluinnarpaa aqaguinnaq Palantirip programmii taarserneqarsinnaanngitsut.

- Naalagaaffiup politiivinut, Palantirip atortuinik ullumikkut atuisunut, ajornartorsiortitsinngitsumik soorunami tamanna pissaaq. Allanilli periarfissaqarpoq, Dragsted oqarpoq, innersuussutigalugulu Tysklandip Frankrigillu franskit atortuat Palantirimut taarsiunneqarsinnaasoq misissortaraat.

- Uaguttaaq aamma tamanna misissorsinnaavarput. Tamanna ullormiit ullormut pisinnaanngilaq, annertuumik ajornartorsiutaavoq Danmarkip qarasaasiatigut atortui sakkortunerpaat, tassa politiit qarasaasiaasa programerneqarnerat Trumpimit atornerlunneqarsinnaassappata, Dragsted oqarpoq.

Aamma Spaniami Tuluit Nunaannilu teknologiikkut oqartussaaneq tunngavigalugu piffissami kingullermi Palantirip taartigisinnaasaanik misissuisoqarpoq.

Enhedslistep aningaasanut inatsisissatut isumaqatiginninniarnermi Palantirimik inerteqquteqarnissaq piumasaqaataani pingaarnerpaajunngilaq, Dragsted oqarpoq:.

Isumaqarporli siunnersuut pimoorullugu naalakkersuisunit misissorneqarumassasoq.

RITZAU