Tasiilami peqqarniitsumik alianartumillu siorna aasakkut pisoq Eqqartuussisoqarfik Sermersuumi Nuummiittumi marlunngormat ullaakkut aallartinneqarpoq.
Arnaq 55-inik ukiulik savimmik kapineqarluni 2025-mi juunip 26-ani toquvoq, politiillu arnaq 25-nik ukiulik toqutsisimasutut pasineqartoq tigusaraat. Suliami anaanaasoq paniusorlu pineqartut marlunngornermi eqqartuussivimmi paasinarsivoq.
Tasiilami peqqarniitsumik alianartumillu siorna aasakkut pisoq Eqqartuussisoqarfik Sermersuumi Nuummiittumi marlunngormat ullaakkut aallartinneqarpoq.
Arnaq 55-inik ukiulik savimmik kapineqarluni 2025-mi juunip 26-ani toquvoq, politiillu arnaq 25-nik ukiulik toqutsisimasutut pasineqartoq tigusaraat. Suliami anaanaasoq paniusorlu pineqartut marlunngornermi eqqartuussivimmi paasinarsivoq.
Unnerluussisussaatitaasoq arnaq inuusuttoq toqutsisimasutut ukiuni arfineq-pingasuni pineqaatissinneqarsimasunut inissiisarfimmiittussanngortinneqartariaqartoq isumaqarpoq. Taassuma pinerluffigisani angerlarsimaffimminni 75-it missiliorlugu kaporsimagaa unnerluussummi atuarneqarsinnaavoq.
- Sequnngeriarlunga kapivara
Paniusup arni kapisimallugu oqaluttuaraa. Arnap inuusuttoq nassuiaanerminni misigissutsimikkut pikkunartorsiornera takuneqarsinnaavoq. Anaanaasup savik aariarlugu kapeqqusimasoq taassuma oqaluttuaraa.
- Toqussaginga oqaqattaarpoq. Taava sequnngeriarlunga marloriarlugu kapivara. Niquatigut seeqquatigullu.
Arnap kingornatigut anaanani arlaleriarluni savimmik kaporsimallugu aamma uppernarsarpaa. Saviinnaasimagunanngilaq. 75-it missiliorlugu unnerluussisussaatitaasup kapisisimaneraaneranut arnaq pisuunnginnerarpoq.
Tasiilami angerlarsimaffimmi nalliuttorsiornermut atatillugu imigassartortoqarnerani taama pisoqarpoq.
Sanili politiinut sianeqqugaa
Suliami ilisimannittut qaaqquneqarpata unnummi tassani qanoq pisoqarsimanera paasisaqarfiginerunissaa naatsorsuutigaarput, nalunngilarpulli inuit marluk savilersortoqarnerani najuuttut.
- Taava sanilitsinnukarlunga anaanaga kapisimanerariarlugu politiinut sianeqquakka. Nalaasaarfimmut ingillunga utaqqivakka, arnaq inuusuttoq oqarpoq.
Anaanaasoq savimmik kapineqareernermi kingorna suli uumasimagunarpoq, napparsimmavimmukaanneqarpoq unnuarlu taanna toqusutut nalunaarutigineqarluni.
Arnap inuusuttup anaanani toqukkusussimanerlugu uppernarsanngilaa. Toqutsisimasutut pinngitsuutinniarlugu illersuisuip tunngavilersuutigissagunarpaa, taassumami toqutsinissani siunertarisimanngimmagu. Uterfigissavarput.
