Ernereernermut atatillugu sulinngiffeqarnermi aningaasaateqarfimmit tapiiffigineqartut 2024-mi marloriaammik amerleriarput
Ernereernermut atatillugu sulinngiffeqarnermi aningaasaateqarfik 2021-mi pilersinneqarpoq, tamatumalu kingorna erninermut atatillugu ikiorsiissutisisut amerlisimapput. Taakkua amerlanersaat arnaapput.
Angutit ernereernermut atatillugu sulinngiffeqarnermi aningaasaateqarfimmit tapiissuteqarfigineqartut sapaatip-akunneri pingasuinnaat sulinngiffeqarput. Naatsorsueqqissaartarfiup kisitsisaataani nutaami takuneqarsinnaapput.
Assi: Leiff Josefsen
Suliffeqarfimmi namminersortumi sulisartoq erninermut atatillugu sulinngiffeqarpat, sulisitsisup ernereernermut atatillugu sulinngiffeqarnermi aningaasaateqarfimmit Amaammit tapiissuteqarfigineqarsinnaavoq, suliffeqarfik aningaasaateqarfimmut akiliuteqartarpat.
Taamaalilluni suliffeqarfik sulisuminut naartunermut, erninermut, ataataanermut angajoqqaajunermullu atatillugu sulinngiffeqartunut imaluunniit paaqqutarinninnermut qitornavissiartaarinninnermullu atatillugu sulinngiffeqartunut akissarsianut aningaasartuutit ilaannut aningaasatigut matussusernissaannut tapiiffigineqarsinnaavoq.
Suliffeqarfiit tapiissutinik pisartagallit amerliartupiloorsimapput — ukiup ataatsip ingerlanerani marloriaammik amerlisimallutik.
Suliffeqarfiit aningaasaateqarfik aqqutigalugu 2023-mi sulisuminnut 107-inut ernereernermut atatillugu sulinngiffeqarnermi aningaasaateqarfimmit tapiiffigineqarput. 2024-milu 216-iullutik.
Tamanna Naatsorsueqqissaartarfiup kisitsisaataani takuneqarsinnaavoq.
Aningaasaateqarfik 2021-mi pilersinneqarmalli, sulisitsisut amerlanerusut aningaasaateqarfik pillugu ilisimasaqalersimanerat pissutaasimagunarpoq.
Meerartaarnermut atatillugu sulinngiffeqarnermi ullormusianik pisartut ikileriarsimapput. 2024-mi meerartaarnermut atatillugu sulinngiffeqarnermi ullormusianik 563-inik tunisisoqarsimavoq. Ukiumut siulianut sanilliullugu inuit 156-inik ikinnerupput.
Arnanut aningaasat amerlanerusut
Ernereernermut
atatillugu sulinngiffeqarnermi aningaasaateqarfimmit taperneqartartut
amerlanersaat arnaasut, Naatsorsueqqissaartarfiup kisitsisaataasa takutippaat. 2024-mi tunineqartut 69 procentii arnaapput.
Tassani 2023-miit 2024-mut amerliartornerpaapput, tassa 2023-mi arnat 66-iusut ukiup tulliani 150-iulerput.
Angutit akissarsiaminnik matussusuuvigineqartut amerlanersaat angajoqqaatut sulinngiffeqartuupput, taamaattumik 2024-mi angutit tallimat taamaallaat akissarsiaminnik utertitsissutigineqartut angajoqqaatut sulinngiffeqarput.
Suliffeqarfiit 2024-mi qanoq amerlatigisunik aningaasartuutiminnik matussusiivigineqarsimanersut takussutissiami aamma takuneqarsinnaavoq. Angajoqqaatut sulinngiffeqarneq sapaatit-akunneri pingasuinnaasarmata aningaasarsiaat aamma ikinnerusarput.
Angutit 63-it 0 koruunit 39.999 koruunillu akornanni aningaasarsiaqarsimapput, arnallu arfiniliinnaat taakku assinganik aamma aningaasarsisimallutik.
Aningaasanik tunniunneqartut amerlanerpaartaat 160.000 koruuniupput. Angut ataaseq taama amerlatigisunik tunineqarpoq, arnallu 80-it taama amerlatigisunik tunineqarlutik.
Sulisoq erninermut atatillugu sulinngiffeqarnermini sulisitsisup
tapiiffigineqarneranit, akissarsiaminit annerusunik
akissarsiaqarsinnaavoq. 2024-mi akissarsiaq qaffasinnerpaaq
nalunaaquttap akunneranut 135 koruuniuvoq.
Sulisut qassit ernereernermut atatillugu sulinngiffeqarnermi aningaasaateqarfimmit tunineqarsimasut taakkualu amerlassusaat, uani takuneqarsinnaapput. Aningaasanik tunineqartut nalunaarsorsimaffiisa ilaat marluk angutitaqanngillat, aningaasammi taakku angutinit pissarsiarineqarsimanngillat.
Kisitsisit: Naatsorsueqqissaartarfik.
