Erngup nukinganik nukissiorfiliornissaq ajornartorsiortoq: Suliarinnittussarsiorneq taamaatinneqarpoq

Utoqqarmiut Kangerluarsunnguanni erngup nukiganik nukissiorfiup allilerneqarnissaanut sanaartornerup annertuup ingerlannissaa ajornartorsiorpoq.

Namminersorlutik Oqartussat suliffeqarfiutaat NunaGreen, suliniummik ingerlatsisussaq, tamakkiisumik suliariumannittussarsiuussinermut atatillugu ataasiinnermik neqeroortoqarsimasoq marlunngornermi nalunaarpoq.

Pitsaassutsimut nalilersuinermi neqerooruteqartut pingasuusimagaluarput, taamaattorli taakkunani marluk neqeroorutertik tunuartippaat.

NunaGreen isumaqatiginninniareerluni neqeroorutigineqarsimasut amerlassusaat unammillerneqarpallaarneranut takussutissaasut, aamma NunaGreenip sanaartortitsisuunermini navianaateqarsinnaanera pilerinanngitsoq naliliipput.

Alliliineq 3 milliardit koruunit missaanni akeqassasoq siusinnerusukkut nalilerneqarpoq. Taamaalillunilu Kalaallit Nunaanni sanaartornerni aatsaat taama annertutigisumik sanaartortoqassaaq.

AAMMA ATUARUK

Utoqqarmiut Kangerluarsunnguanik alliliinissamut Danmarkip naalagaaffia qularnaveeqqusiivoq

Kinguaattoorpallaannginnissaq ukkatarineqartoq

Aqquserngup sanaartornissaanut piareersarnerit suli ingerlapput, NunaGreen naapertorlugu maannakkut kinguaattoornerup annikinnerpaaffissaanut killilerneqarnissaa pingaarnertut anguniarneqarluni.

Neqeroorutigineqartup isumaqatigiissuteqarnissamik suliniullu aallartinnissaanut kinguneqartinnissaa anguniarlugu NunaGreeni aalajangersimalluinnarluni suliaqartoq, NunaGreenip pisortaa Aviaaja Karlshøj Knudsen oqarpoq:

- Tamanna iluatsinngitsoormat, unammilleqatigiinnissaq tunngavissinnerullugu suliassarlu patajaannerusumik ingerlallugu, suliap ingerlaqqinnissaa aaqqissuutissagipput pingaaruteqarpoq, Aviaaja Karlshøj Knudsen oqarpoq nangillunilu:

- Peqatigisaanik sanaartugassami taamatut angitigisumi aarlerinaataasut qulaajarnissaat annertuumik ukkataraagut, taamaalilluni taanna patajaatsunik tunngavilimmik inuiaqatigiinnullu iluaqutaasumik piviusunngortinneqarsinnaassalluni.

Aasaq nallertinnagu suliniut qanoq ingerlanersoq sukumiinerusumik nalunaarutigissallugu, NunaGreenip naatsorsuutigaa.