Erseqqinngitsumik toqunartulik peerli

Taamaattuartuupput taakku uagullu, qanorluunniit pigaluarutta, illuatungaani kalaallit akileralugit qallunaat, pingaartumik naalagaaffeqatigiinnerup qinngarsuinertai qaffakaalillaraangata, ingasattangaaramik soorlumi Nunap isuani malissuit qaartarlualillaraangata.

Tamanna misigikataqaarput, kingullertigut spiralilersuisimanermut tunngasumi, pingaartumillu nalunaarusiat saqqummermata. Aamma misigaarput piviusulersaarut ”Kalaallit Nunaata kuultia qaqortoq” aallakaatinneqariarluni DR-mi kasiiligaammat: Inerteqqutaavoq! (Ersinngitsumik toqunartulik).

Taamatut ingerlajuarsinnaavugut saammaassinnaanngissuseq orsersorlugu.

Kinguneri soqqusaatsut , misigissutsinut, oqaatsinut, avoqqaarlernernullu tunngasut qarasaaqqanni paarusaartarput sivisuumik. Aap, misigissutsitigut nungullarsaatit soorlu tassa toqunartut ersinngitsut, peroriartornitsinni, inersimasutut inuunitsinni utoqqalinitsinnilu atortuarsimasagut. Ilaatigut inunnik misigittaatsunngortitsisut attaveqaqatigiinnermilu soqqusaatsumik pissuseqalersitsisut. Tassa toqunartoq. Toqunartoq ersinngitsoq, timip ajoqussua.

Nappaatitut

Aammaluunniimmi inuit ilinniarluarsimasut imminnut illersortunut akuuleraangamik ingasaavillutik killissaminnik qaangiisaramik – akerleriinni illuttut akornanniittut. Tassami tarnikkut sorsuunnersuaq ajorluinnartoq inunnik illersugassaminnik toqqaareersimasunik taamatut pissuseqalersitsisarami. Ilaanni allaaneq ajorami virusi tuniluuttoq atugaasoq, iluamik eqqarsinnaajunnaarsitsisumik ilungersulaarsinnaajunnaarsitsisumilluunniit.

Ullut ilaanni naakkittaannersuaq qatsulluinnaraanni tusanngunartunik oqalunnersuaq, isummersornikkut nikikkusunnginneq akerartuinerlu ”qamillugit” qasuersilaarnissaq pisariaqalersarpoq. Aserorsaaneq akuuffigineqaqisoq qanoq isumaqarpiartoq paaserusukkukku kammattaat, silassorilluinnangaarami Silassorissuusiamik atilik nassuiaavoq, tassagooq aserorsaanermik nalaanneqarsimasut tassaapput inuit eqimattalluunniit makitasoorsuanngoraluttuinnartarput, soqqusaallutik, eqqarsartaatsiminni, oqaatsiminni iliuutsiminnilu taakku saassutaralugit. Taamaattunik ilaqartuarneq qasunaq aamma naamatsinnaq, ilorraap tungaanut aallartikkusunnaq katsorsaanissarlu orniginaq.

Illit siulliugit

Ajornartorsiut sorpajuttut pinngikkaluarlugu immaqa imminut aperisariaqarpoq, piffissanngunnginnersoq naalagaaffeqatigiinnerup sammivimmit allamit isigalugu ukkatarilernissaanut, qoqianngunanngitsumik. Immitsinnut ajortussarsiorfigiinnarneq iperarlugu, pissusiviusut ajattunngikkaluarlugit. Ilarpassuatta kissaatigisaattut ullugut allatut immersortariaqalerpagut. Inuiaqatigiittut paaraluta, nuannaarutissat initunerulersillugit kulturerpullu nuannareqisarput uummarsaqqillugu.

Facebookimiuna allattartoq inuunermi aqqutissat pillugit atuallattaarlugu nuannarisariga, soorlu ima allammat:

- Inuuneq ingerlajuartuuvoq aammami taamaassaaq.

Soorlulu isumalluarsaasutut:

- Qulequttap taassuma maanna nalaappaatigut, oqariartuutigalugu allannguutit pitsaasut pisussanngortut - qaa inuuniarit, allanngulaarlutit inuuninnilu piumasattut nikerialaarlutit.

Naakkittaannerooq inuup kisimiilluni ajornartorsiutiginngilaa. Aaqqissuussaanermiittorooruna. Eqqarsartungaana taamatut tarnikkut sorsuuttuarnermik nungullarsarneq naakkitaannerup arsakuinik pilersitsisartoq.

Ipeeraaniarit. Inuuninnguaq!