Folketingimi ilaasortaanikoq siunnersuisartunngortoq
Folketingimi ilaasortaanikoq Aaja Chemnitz siunnersuisarfimmi Inuvami suleqataalerpoq.
- Kalaallit Nunaanni aamma Danmarkimi amerlasuunik attaveqaateqarpunga, taamaasillunga Kalaallit Nunaanni aamma Danmarkimi taakkulu akornanni, kisianni aamma EU-mi siunissamilu USA-mi inuussutissarsiornermi sammisat annertunerulernissaannut politikkikkut kissaatigisat pillugit tapertaaqataarusuppunga, Aaja Chemnitz atorfittaani pillugu oqarpoq.
Foto: Sebastian Elias Uth/Ritzau Scanpix
Inuit Ataqatigiit sinnerlugit Folketingimi ukiorpassuit ilaasortaanikup Aaja Chemnitzip siunissami suleriniarnini nalunaarutigaa.
Aaja Chemnitz siunnersuisarfimmi Inuvami Kalaallit Nunaata Danmarkillu akornanni
inuussutissarsiornikkut suleqatigiinnissap ikorfartorneqarnissaa siunertaralugu atorfinippoq.
USA-p præsidentiata tatisinera pissutaalluni Kalaallit Nunaanni inuiaqatigiinnut annertunerusumik aningaasarsiornissamut
periarfissiigaluartoq maannamut angusat malunnarsimanngitsut nalunaarummi aamma tikkuarneqarpoq.
- Annertunerusumik aningaasarsiornissamut
periarfissaq maangaannartissinnaanngilarput, oqarpoq.
Inuva Kalaallit
Nunaanni avataanilu inuussutissarsiornermik ingerlatsisunut, Kalaallit Nunaanni
annertunerusumik inuussutissarsiornermi suliniuteqarnissamut tapertaanissamut
soqutiginnittunik, ineriartortitseqataanissamik siunertaqartoq tusagassiuutitigut nalunaarummi allaqqavoq.
Inuussutissarsiornermik
inerisaaneq Kalaallit Nunaata aningaasaqarneranut atugarissaarneranullu
pingaaruteqarluinnassasoq Aaja Chemnitz isumaqarpoq:
- Kalaallit Nunaanni aamma Danmarkimi
amerlasuunik attaveqaateqarpunga, taamaasillunga Kalaallit Nunaanni aamma
Danmarkimi taakkulu akornanni, kisianni aamma EU-mi siunissamilu USA-mi
inuussutissarsiornermi sammisat annertunerulernissaannut politikkikkut kissaatigisat
pillugit tapertaaqataarusuppunga. Isumaqarpunga tamatta inuussutissarsiornermik
siuarsaassalluta soqutigisaqartuusugut, oqarpoq.
Aaja Chemnitz Kalaallit Nunaat sinnerlugu Folketingimut 2015-imiit 2026-p tungaanut ilaasortaavoq. Marsip qinersinissaq sioqqullugu qineqqusaaqqinniarani nalunaarutigaa.
