Folketingimi ilaasortat Atlantikup Avannaaneersut unnuk kulturisiorfimmut qaaqqusisut

Københavnimi Unnuk Kulturisiorfik 1993-imiilli ukiut tamaasa sapaatip akunnerani 41-mi tallimanngornikkut aaqqissuunneqartalerpoq, tassani kikkulluunniit illoqarfimmi sumiiffinni isertugaasuni sanaartukkanilu oqaluttuarisaanermut tunngasuni, ilaatigut Christiansborg Slotimi, 6000-init amerlanerusunillu pulaarneqartartumi, paasisassarsiortoqarsinnaasarpoq.

Kalaallit savalimmiormiullu Folketingimi aaqqissuussaannik Ukioq manna nutaatut, aaqqissuussisoqassaaq. Tamannalu Atlantikup avannaani folketingimut ilaasortanit Naaja Nathanielsenimit Inuit Ataqatigiinnit, Anna Falkenbergimit Sambandsflokkurinimit Sjúrður Skaalemillu Javnaðarflokkurinimit aaqqissuunneqarpoq.

Qittanneq, erinarsoqatigiit aamma DJ

Ilaatigut qitittartut peqatigiiffiat Fótatraðk Savalimmiormiut qitittariaasaannik takutitsissaaq. Húsakórið aamma Aavaat savalimmiormiutut kalaallisullu erinarsoqatigiissapput, The MALIKK-llu DJ-mik nipilersukkanik unnuup ingerlanerani nuannisaartitsissapput.

Aammattaaq Nordatlantens Bryggep ikiuineratigut qarasaasiaq atorlugu pisuusaartitsissummik Nuummut angalasoqarsinnaavoq.

Folketingimut ilaasortat oqaloqatigikkit

Aammattaaq Atlantikup avannaani Folketingimut ilaasortanit qulequttat sorliit sulissutigineqarnerusariaqarnersut pillugit isumassarsianik saqqummiiviginissaanut periarfissaqarpoq.

Ti, kaffi mamakujunnillu sassaalliisoqassaaq, IA-p allattoqarfia ilisimatitsivoq.

Atlantikup avannaani ilaasortat Socialistisk Folkepartip ataatsimiittarfiata quleriit aappaanniipput, matullu nalunaaqutaq 18.00-mit 23.30 tungaanut ammaanneqassallutik.

Unnuk Kulturisiorfimmi Christiansborgimi utaqqisut amerlasoorsuugajupput, taamaattumik piffissaq eqqorlugu takkunnissaq innersuussutigineqarpoq.

Nordatlantens Bryggemi unnuk kulturisiorfik

Folketingip saniatigut Nordatlantens Bryggemi aamma kalaallit kulturikkut unnuat ingerlanneqartarpoq, tassanilu saqqummersitat "Daamani - Dengang i Østgrønland" aamma "Følelsernes terræn" takutinneqartarput.

Københavnimi Unnuk Kulturisiorfik, misigissassarfiorfigineqassappat kulturpassi pissariaqartinneqassaaq, taanna pisiniarfinni 7-Eleven-ini www.kulturnatten.dk-milu pisiarineqarsinnaavoq. Københavnimi Unnuk Kulturisiorfik aaqqissuussarpassuillu pillugit www.kulturnatten.dk-mi paasisaqarnerusinnaavutit.