Frankrigimi naalagaaffimmi pissutsinut ministerip soraarniuteqarnera, Macronip itigartippaa

Frankrigimi naalagaaffimmi pissutsinut ministerip Laurent Nunezip akerliussutsimik takutitsisoqarnerata kingorna tunuarniuteqarnera, Frankrigip præsidentiata Emmanuel Macronip itigartippaa.

Franskit nutaarsiassaqartitsiviat AFP naapertorlugu Macronip allaffia ataasinngornermi ullaakkut nalunaaruteqarpoq.

- Naalagaaffimmi pissutsinut ministerip soraarniuteqarnini præsidentimut sapaatiummat tunniuppaa, præsidentip allaffiani nalunaarutigineqarpoq.

- Politiit sulinerat maannakkut siulersorneqartariaqarnera pissutigalugu, præsidentip tunuarniut itigartippaa.

AFP naapertorlugu politikkerit illuatungiliuttut arlallit Nunezip tunuartinnissaa piumasaraat.

Frankrigimi illoqarfinni arlalinni akerliussutsimik sapaatip-akunnerata naanerani takutitsisoqarpoq, inuuniarnermi aningaasartuutit qaffasippallaarnerat inuiaqatigiillu aaqqissuussaanerat, taakkua oqarnerattut, inuttut ingerlariaqqinnissamut toqqissisimanissamullu akornutaasoralugu.

Akerliussutsimik takutitsinerit sumiiffinni arlalinni nakuusernernik kinguneqarput, eqqissiviilliornerlu nunap ilarujussuanut siaruaateqqavoq.

Naalagaaffimmi pissutsinut ministeriaqarfik naapertorlugu inuit 2400-t missaat arfininngornermi tigusarineqarput, politiillu 1000-ingajaat ikiligaallutik.

Oqartussaasut eqqissiviilliortunut piareersimalluarsimanngitsut, Macronip oqaaseqarnermini ataasinngornermi ullaakkut nassuerutigingaa, AFP allappoq.

Aammattaaq præsidentip Nunez qinnuigaa isumannaallisaanermut pissutsinik aaqqiisoqarsinnaanera eqqarsaatigalugu nutaamik pilertortumik iliuuseqaqqullugu.

Parisip avannaani ilinniarnertuunngorniarfinni akerliussutsimik takutitsineq septembarimi aallartippoq, ilinniartitsisut najuutinngitsoortarnerat ilinniarfiullu atortorissaarutai aserfallassimasut naammaginnginnerarlugit.

Nuna tamakkerlugu naligiinnginneq, pisortat aningaasaataannik amigaateqarneq atugarissaanerlu pillugit akerliussutsimik tamatuma kingorna takutitsisoqarpoq.

Frankrigimi politiit akerliussutsimik takutitsisunut iliuuseqartarnerat pillugu siusinnerusukkut isornartorsiorneqarput. Ilaatigut akerliussutsimik oktobarip tallimaanni takutitsinermi, politiinit qaartartoq miliorujunneqartoq nukappiaqqap 15-ninik ukiullip tigunerani assaani qaarpoq.

RITZAU