KUNNGIP TIKERAARNISSAANUT PILERSAARUT SAQQUMMIUNNEQARTOQ
Frederik ilinniarnertuunngorniarfimmukarlunilu marloriarluni kaffisoriassasoq
Kunngi Frederik Nuummut pingasunngornermi nal. 11.30 tikissaaq, tikeraarnerani pilersaarummi takuneqarsinnaavoq. Tikeraarnermini Nuummi Maniitsumilu kaffillertunukassaaq.
Kong Frederik Kalaallit Nunaannut pingasunngorpat tikissaaq. Tallimanngorpat tungaanut tikeraaqqassaaq.
Assi: Oscar Scott Carl
Kunngip Frederiup Kalaallit Nunaannut tikeraarnera pingasunngornermi aallartissaaq, kunngikkormiullu kunngip tikeraarnissaanut pilersaarutit sukumiinerusut maanna saqqummiuteqqammerpaat.
Kunngi ilaatigut ilinniarnertuunngorniarfimmut pulaassasoq, Nuummi Maniitsumilu kaffisoriassasoq, tassani innuttaasut ilassinninnissamut periarfissaqassasut allassimavoq.
Kunngip tikeraarnera Nuup mittarfiani pingasunngornermi nal. 11.30 tikippat aallartissaaq, tassanilu Naalakkersuisut siulittaasuannit Jens-Frederik Nielsenimit (D) aamma Inatsisartut siulittaasuannit Kim Kielsenimit (S) tikilluaqquneqassaaq.
Ilinniarnertuunngorniarfimmut pulaarneq kaffisoriarnerlu
Tamatuma kingorna Hans Egedep illuani Jens-Frederik Nielsenip qaaqqusineranut ulloqeqqasioqatigiinneq pissaaq.
Nalunaaqutaq 13.30 kunngi GUX Nuummut pulaassaaq, tassanilu ilinniarfik takornariartinneqarluni ilinniartut naapissallugit.
Ilinniarnertuunngorniarfimmeeruni Kunngi Frederik Royal Greenlandimut pulaassaaq, tamatumalu kingorna Issittumi tunngaviusumik ilinniarfimmeersut naapillugillu Nuummi Issittumi Sakkutooqarfiup qullersaqarfianut pulaassaaq.
Tamatuma kingorna Katuami nal. 15.45 kaffillertoqassaaq. Innuttaasut kunngimik ilassinnissinnaassallutik:
- Kunngi kulturikkut illorsuarmi Katuami ileqquusutut kaffillertoqarneranut peqataassaaq. Kaffillerneq tamanut ammasuuvoq, tassani Kunngi Nuummi innuttaasunik naapitsinissamut periarfissaqartinneqarluni, kunngikkormiut allapput.
Pingasunngornermi pisussat Hans Egedep illuani nerersuarnermik naggaserneqassapput.
Maniitsumi kaffillerneq
Maniitsumut sisamanngorpat ingerlaqqissaaq, tassanilu kunngi nal. 11.15 Maniitsup mittarfianut tikissalluni.
Qeqqata Kommuniani borgmesterip tullianit siullermit Gideon Lyberthimit tikilluaqquneqassaaq, tamatumalu kingorna kommunalbestyrelsi ulloqeqqaqatigissallugu.
Nalunaaqutaq 12.30 kunngi illoqarfimmi takornariartinneqassaaq innuttaasunillu ilassinninnissamut periarfissaqarluni, tamatumalu kingorna suliffeqarfik Maniitsoq Lodges inuusuttunit aallarnisaasunit ingerlanneqartoq pulaassavaa.
Kunngi Maniitsup eqqaanut nunamut takornariartinneqassaaq, tassanilu pinngortitaq uumasullu pillugit paasisaqassalluni. Maniitsup katersortarfiani nalunaaqutaq 14.45 kaffillertoqassaaq.
Kangerlussuarmi ilinniartunut pulaarneq
Kunngi Frederik Kangerlussuarmut sisamanngornermi ualikkut timmisartussaaq, nal. 17.30 tikissalluni.
Tassani nal. 17.50 Kangerlussuarmi KFUM-ip sakkutuut angerlarsimaffiani innuttaasut ilassinissaannut periarfissaqassaaq.
Kangerlussuarmi Issittumi tunngaviusumik ilinniarfik kunngip tallimanngorpat nal. 09.00 pulaassavaa.
Kunngip tikeraarnera naggaserlugu tallimanngornermi nalunaaqutaq 10.00, tassani Issittumi tunngaviusumik ilinniarfiup Black Ridgemiittup tammaarsimaarfia pulaassavaa.
Tassani ilinniartut tammaarsimaffitsik takutissavaat misilittakkatillu pillugit oqaluttuassallutik.
