Greenland Airports security pillugu: Ammasarfiit timmisartortitseqatigiit peqatigalugit pilersaarusiortarpagut  

Nuup mittarfiani security nunanut tamalaanut mittarfik 2024-mi ammarmalli angalasut akornanni oqallisigineqartuartarpoq. Oqallinneq juunip aallartinnerani sakkortuseriarpoq, Icelandairimmi timmisartuussinissaralua securitymi sulisut amigaataanerat pissutigalugu taamaatiinnarneqarami.

Air Greenlandip Jettime atorlugu siusissukkut maajimi aallartarneri ullup ingerlanerani kingusinnerusumut aamma  nuunneqartariaqarsimapput. Tassani aamma securitymi sulisut amigaataanerat pissutaalluni.

Kingullertut pisoq tassaavoq Air Greenlandip timmisartui marluk sapaatiummat Ilulissiartussaraluit, security nalunaaqutaq 14.45 matoreersoq aallartussanngoralurtut angumersinngitsoorlutik taamaatiinnarneqarnerat. Securityp sapaammi siusissukkut matusalernera Air Greenlandip ajuusaarutigaa, matujaartalernera timmisartuussinernik taamaatitsisoqarsimatillugu apuussiniarnernut akimmisaartitsilersimanerarlugu.

Securityp ammasarfii timmisartortitseqatigiit peqatigalugit juunimi aalajangersarneqarsimasut Greenland Airportsip maanna erseqqissaatigaa.

- Timmisartortitseqatigiit pilersaarutaat malillugit sulisut suliffissaat inississortarpagut, Greenland Airportsip pisortaanera Jens Lauridsen oqarpoq.

Taassuma aamma erseqqissaatigaa security kisimi patsisaalluni kinguaattoortoqartanngitsoq.

- Timmisartut aallassatillugit sorpassuit suliassaallutillu suleqatigiittussat arlaliusarput. Security taakkua ilagiinnarpaat. Kinguaattoortoqartillugu kinguaattoornermi peqqutaasoq ataasiinnaasanngilaq. Taamaammat security kisiat pisuutissallugu tulluarsorinngilara.

Sulisunik tatisinerorusunngilaq

Securityp kinguaattoornera peqqutaalluni sapaammi ullaakkut timmisartuussinerit kinguaattoorsimasut Air Greenlandip oqaatigaa. Timmisartoq Ilulissanut apuummat putsilereersimammat mittoqarsinnaasimanngilaq. Pisup kingorna kinguaattoornerit aallartipput.

AAMMA ATUARUK 

Securityp killilimmik ammasarnera timmisartuussinernut kalluaaqqittoq: Angalasut 140-t missaanniittut ingerlariaqqinneq ajulersut

Security sapaammi piffissaq eqqorlugu ammarsimasoq Jens Lauridsenip aalajangiusimavaa.

- Unitedip ullormi tassani piffissaq eqqorlugu aallarnera uppernarsaatissaalluarpoq. Tassani suliassat pisariunerujussuusaraluarput, securitymiinnaanngitsoq, aammali allat eqqarsaatigalugit.

Kinguaattoortoqartillugu taamaatitsiinnartoqarsimatilluguluunniit eqaatsumik aaqqiiniarneq ammaffigisarlugu taassuma aamma oqaatigaa. Securitylli ammasarneri tamatigut sivitsorneqarsinnaasanngillat.

- Sulisutta illersorneqarnissaat pisariaqarpoq, taamaattumillu ilaanni aamma naaggaartariaqartarpugut, taanna oqarpoq.

Sulisut ullaaralaakkut tallimap qeqqanut suliartortartut assersuutigai.

- Nal. 4.30 sulillutik aallartittut nal. 18.00-p tungaanut suleqqusinnaanngilagut. Nal. 18.00-p tungaanut sulissagunik ataasinngornermi sulinissaat aamma eqqarsaatigisariaqarpagut. Taamaaliussagutta nalunaaquttap akunnerini aqqanilinni eqqissisimaartussaatitaaneq unioqqutissavarput. Sulisut eqqissisimaarnissaanut periarfissiinngitsoorutta ajornartorsiut aasap ingerlanerani annerujartuinnassaaq. Taamaattumik sulisut sulinissaannut pilersaarutaat ataqqisariaqarparput, Jens Lauridsen oqarpoq.

Greenland Airports aatsaat taama amigartooruteqartigaluni 2025-mi 2,7 milliardit koruuninik amigartooruteqarpoq. Mittarfimmi securitymi sivisunerusumik ammasalissappat, sulisut amerlanerusut pisariaqartinneqassapput, tamannalu aningaasartuuteqarnerulernermik kinguneqassaaq.

- Ammanerusalissappat sulisut amerlanerusut pisariaqartissavagut. Sulisut amerlanerulissappata aningaasanik aamma atuinerusariaqassaagut. Suut tamarmik eqaannerusumik ingerlanissaat tamatta soqutigisarigipput ilisimavara.  Taamaaliornikkummi akit qaffannginnissaat angusinnaavarput.

- Naggataani akiliisussaq ataasinnaavoq, Akiliisussaq ataasiinnaavoq, tassalu sullitarput, Jens Lauridsen oqarpoq.

Suli avataanit ikiorneqartut

Nuummi mittarfiup aasaanerani  siullermeerluni ingerlatsinerani securitymi sulisut amigaatigineqarnerat, kiisalu aallartisarnerup nalaani ajornartorsiutit allat unammillernartut arlallit nalaanneqarput.

Anglasut nunatsinniittut nunattalu avataaniittut tuusintillit silap ajornera peqqutigalugu ukiup ataatsip matuma siorna nikeriaqqinneq ajuleqqapput. Nuuk taamani unnuiffissaarummat unnuiffissaaruttut allaat mittarfiup iluani unioqqutitsillutik sinnumasariaqalerlutik.

Sila ukioq manna pitsaaneruvoq. Silalu pitsaaneruinnanngilaq, securitymimi sulisut aamma amerlisimapput.

Securitymi sulisut siorna 30-t missaanniipput, ullumikkut sulisut 55-iusut. Taakkunannga sulisut qulit aqqaneq-marlullu missaaniittut Københavnip Billundillu mittarfianiit ikiuukkiartortuullutik.

Greenland Airportsip avataaniit ikiorneqarnani qaqugu ingerlatsilersinnaanera oqaatigiuminaappoq.

- Sulisut misilittagaqarlualerlutik suliassatta pitsaasumik kivitsisinnaalernissaanut piffissamik suli pisariaqartitsivugut, Jens Lauridsen oqarpoq.

Qaqugu tamanna pisinnaanersoq Jens Lauridsenip erseqqissumik oqaatigisinnaannginnerarpaa.