Securityp killilimmik ammasarnera timmisartuussinernut kalluaaqqittoq: Angalasut 140-t missaanniittut ingerlariaqqinneq ajulersut

Nammineerlutit angalatillutit misigisimanngikkukku allat kinguaattoorlutik naammagittaalliornerat inoqatinut attaveqaatini allaaserineqartoq naammattoorsimassajunnarsivat. Nuummi mittarfimmi isumannaallisaanermik suliaqartut, aamma securitymik taaneqartartut peqqutigalugit kinguaattoortut angalasorpassuit sapaatip-akunnerini kingullerni nalaappaat. 

Tamanna aamma Air Greenlandimut ajornartorsiortitsivoq, timmisartuussinerimmi securityp ammasarfii malillugit naleqqussarneqartariaqarmata.

Sapaammi timmisartuussinerit kinguaattoornerisa kingorna Dash 8-t marluk Ilulissiartussat Ilulissanillu angalasussaraluit taamaatiinnarneqartariaqalerput.

Air Greenlandimi piujuartitsinermut attaveqaqatigiinnermullu pisortap Inga Dora G. Markussenip oqaluttuarnera naapertorlugu, securityrmiut kingusinaarnerat peqqutigalugu Nuummiit timmisartuussinissat arlallit ullaarnaniit kinguaattoorput.

- Sapaammi ullaakkut piffissaagallartillugu aallarsinnaasimagaluarutta, illoqarfiup (Ilulissat aaqq.) putsilinnginnerani missimasinnaagaluarpugut. Missinnaannginnatta Kangerlussualiartariaqalerpugut. Tassani kinguaattoornerit aallartipput. Timmisartummi Nuummiit kingusinnerusukkut angalasussaraluit piffissaatillugu utersinnaanngillat, timmisartuussinissallu tullii taamaalilluni eqqugaallutik, Inga Dora G. Markussen oqarpoq.

Sapaammi matujaartalerneq

Security sapaammi nal. 14.30 matusarpoq. Taamaattumik Ilulissanut timmisartuussinissaraluit pilersaarutaasut marluk taamaatiinnarneqartariaqalerput.

Angalasut qasserpiaat eqqugaaneri Air Greenlandimit paasissutissiissutigerusunngilaat, Dash 8-lli timmisartuussisussaraluit tamarmik ulikkaaqqammata Nuummi Ilulissanilu angalasussaraluit katillugit 140-t missaaniittut taamaatitsiinnarnernik eqqugaasimassasut naatsorsorneqarsinnaavoq.

- Angalasussaraluanut eqquinera ajuusaarnarpoq, angalanissaammi allanngortariaqalerpoq. Taamaammat angalanissanut pilersaarutinik nutaanik tunigaangatsigit sooq taama pisoqarnera nassuiaatigilluarniartarparput, Inga Dora G. Markussen oqarpoq.

Kinguaattoortoqartillugu imaluunniit timmisartuussinissanik taamaatitsiinnartoqaraangat angalasut eqqugaasut apuuffissaannut sapaammi angallanniarneqartarput. Securitylli ammasarnera naleqqussarfigineqartariaqarmat sapaammi angallassiniarneq ajornakusoortarpoq.

- Sapaat uatsinnut pingaaruteqarpoq, taamaatitsiinnarnernit eqqugaasut apuuffissaannut ullormi tassani apuunniartarpagut. Angallassinissanut pilersaarutigut sapaammi periarfissaqartitsinerusarmata. Kinguaattoorsimasut ullormi tassani apuussoriarnissaanut periarfissat eqqorneqarput. Taamaammat piffissaq manna uatsinnut imaannaanngilaq, Inga Dora G. Markussen oqarpoq. 

Securitymi sulisussaaleqineq ajornartorsiortitseqqittoq

Isumannaallisaanermi naammattunik sulisoqannginnera siusinnerusukkut ajornartorsiutaasareerpoq. Icelandairip juuni aallartilaartoq timmisartuussinissaraluani securitymi sulisussaqanngimmat taamaatiinnarpaa. 

AAMMA ATUARUK

Icelandairip timmisartuussinissani isumannaallisaanermi sulisussaqannginneq pissutigalugu taamaatikkaa

Jettime aamma eqqugaanikuuvoq. Jettimemimmi maajip naanerani ullaakkut timmisartuussinissaraluit securitymi killilimmik sullissisoqarnera peqqutigalugu  kingusinnerusumut nuunneqartariaqarnikuupput.

Ilulissani unammilligassat arlaqarput 

Securityli Air Greenlandip niaqorluutaani kisimiinngilaq.

Ilulissani antennessaq Greenland Airportsip juulip 31-ata tungaanut ikkussuummagu timmisartuussinerit sukannernerusunik piumasaqaateqarfigineqarput. Taama pisoqarnera timmisartut Ilulissani mittarfimmiit qangattarlutillu minnissaannut ajornakusoornerulersitsivoq - pingaartumik isikkivilutsillugu aamma ullaakkut unnukkulluunniit putsertillugu.

Piffissaq manna aamma angallaffiungaatsiarpoq. Ilulissanilu takornariaqarluarmat illoqarfimmi unnuiffissaasinnaasut killeqarlutik. Kinguaattoortoqartillugulu pissutsit ajornarsilluinnartarput.

- Angalaniartut ingerlariaqqinneq ajulersillugit imaluunniit unnuisariaqaleraangata Ilulissani suleqatigut ilungersunartumik inissisimalertarput, unnuiffissanimmi tunisisinnaasannginnamik, Inga Dora G. Markussen oqarpoq.

Nuup mittarfiani securityp inissisimanera pillugu Greenland Airportsimit oqaaseqartitsiniarluta attaveqarfigereerpagut.