Greenland Airportsimi milliardilikkaanik amigartoorneq: Nassuiaasariaqarpusi

Greenland Airportsimi tallimanngornermi ataatsimeersuarnermi aningaasaqarnikkut piviusoq Naalakkersuisut Inatsisartullu innuttaasunut nassuiaateqarfigisariaqargaat qulaarneqarsimavoq.

Naleqqamit Inatsisartunut ilaasortaq Jens NapãtôK’ taama oqarpoq.

Greenland Airportsip ullumi ataatsimeersuarnerani ukiumoortumik naatsorsuutit mittarfinni nalikilliliinernik katillugit 3 milliardit koruuniusunik imallit saqqummiunneqarmata NapatôK’ isornartorsiuivoq.

Nalikilliliinerit annertuut naatsorsuutinut sunniuteqarput, ukiumi angusat 2,7 milliardit koruuninik amigartooruteqarfiullutik. Ilulissani nalikilliliinerit 1,77 milliardit koruunit missaanniipput, Nuummi 824 millionit koruunit missaanniillutik Qaqortumilu 326 millionit koruunit missaanniillutik.

Taamatuttaaq ingerlatsinermut aningaasartuutit naatsorsuutigineqartumit qaffasinnerupput.

Naleqqap mittarfiit nutaaliaasut attaveqaatillu pitsaanerusut pisariaqartinneqarmata akerlerinngikkai Jens NapãtôK’ erseqqissaavoq:

Atuariuk aamma

Greenland Airports milliardinik amigartooruteqartoq - Naalakkersuisut sakkortuumik isornartorsiorneqartut

– Kisianni pisortat suliffeqarfiutaat milliardilikkaanik nalikilliliisariaqaleraangat aammalu aningaasaqarnikkut tunngavigisat naatsorsuutigineqartut attanneqarsinnaannginnerat nassuerutigineqarpat, taava sumik kukkusoqarsimanersoq Naalakkersuisut nassuiaasussaatitaapput, politikeri oqarpoq.

Siulersuisuni siulittaasoq: Aningaasanik pissarsinissaq isumalluarfiuallaarpoq

Naatsorsuutit pitsaanngitsut mittarfinnut aningaasaliissutit tunngaviunerat apeqqusertaraat taanna isumaqarpoq:

– Milliardilikkaanik aningaasaliinerit pillugit politikkikkut aalajangiisoqarnerani inuiaqatigiinnut aningaasaqarnikkut kingunerisassat pillugit misissueqqissaarnerit naammattumik nutarterneqarsimasut aammalu piviusorsiortumik nalilersorneqarsimasut saqqummiunneqarsimanngillat, Naleqqami politikkeri isornartorsiuivoq.

Nuummi Ilulissanilu mittarfiliornerit pissutigalugit angallannikkut attaveqaatit ikiliartortut angalanerillu sinerissami, nunaqarfinni isorliunerusunilu innuttaasunut amerlasuunut akisunerulersut taanna isumaqarpoq.

Greenland Airportsip aningaasaqarnikkut angusarisimasai Naalakkersuisut siulittaasuata Jens-Frederik Nielsenip (D) ullumi ataatsimeersuarnermi isornartorsiorpai.

Greenland Airportsimi siulersuisuni siulittaasoq ilimagineqartut isumalluarpallaarsimasut ilaatigut nalikilliartornerit pillugit oqarpoq, aammali mittarfiit Kalaallit Nunaanni aningaasaqarnikkut ineriartornissamut pingaaruteqartut oqarpoq:

„Kalaallit Nunaanni attaveqaasersuutinut aningaasaliissutitut ingerlajuaannarsimavoq, immaqalu suliniut aallartinnerani takusinnaasatsinnit iluanaarutiginerpaasinnaallugu eqqarsaatigalugu isumalluarpallaarnerussaaq. Aappaatigulli mittarfiit nutaat Kalaallit Nunaanni aningaasaqarnikkut siuariartornissamut aalajangiisuulluinnartut ilagigaat eqqaamassallugu pingaaruteqarpoq,“ siulersuisuni siulittaasoq Jens Wittrup-Willumsen oqarpoq.