Kujataani timmisartuussinerit nutaamik ingerlalerput, Qaqortumimi mittarfik nuannaarutaallunilu isumalluarnarpoq.
Matulli ammarneqartinnagit timmisartullu missinnaanngortinnagit naalagaaffimmi angallannermik nakkutilliisut Angallannermik Aqutsisoqarfik isumannaallisaanermut tunngatillugu akuersisariaqarput. Soorluttaaq naalagaaffiup mittarfiini qulimiguulinnullu mittarfinni allani taamaaliortartut.
Kujataani timmisartuussinerit nutaamik ingerlalerput, Qaqortumimi mittarfik nuannaarutaallunilu isumalluarnarpoq.
Matulli ammarneqartinnagit timmisartullu missinnaanngortinnagit naalagaaffimmi angallannermik nakkutilliisut Angallannermik Aqutsisoqarfik isumannaallisaanermut tunngatillugu akuersisariaqarput. Soorluttaaq naalagaaffiup mittarfiini qulimiguulinnullu mittarfinni allani taamaaliortartut.
Qaqortumi sunut tamanut akuersisut ilaat marluk tassaapput timmisartuussinermut nakkutilliisut Jonas Smed Sørensen aamma Mathias Niels Rydbjerg, Sermitsiap mittarfittaami naapitai.
- Aalborgip mittarfiani 7. klassimi atuarninnut atatillugu suliffimmik misiliigamali timmisartortarneq alutoriuaannarnikuuara. Suliffigilerumaarlugu taamanikkut suli naluara, Jonas oqaluttuarpoq.
Nielsip aamma ingeniøritut ilinniakkani mittarfinnut tunngatillugu atorniarlugu siumungaaq ilisimanngilaa. Aallaqqaammut suliassat allarluinnaat Trafikstyrelsenimi soqutigisarai.
– Kalaallit Nunaanni sulinissamut periarfissaqarneq suliffimmik tamatuminnga toqqaaninnut pissutaasut ilagaat. Timmisartoqarnerlu piffissap ingerlanerani nuannarilerpara, Niels oqaluttuarpoq.
Nunami takusartakkatit
Angallannermik Aqutsisoqarfiup timmisartoqarfinni nakkutilliisui assigiinngitsunik suliaqarput. Nielsip timmisartoqarfinni nakkutilliisut, imaluunniit ADR-inik taaneqartartut, suleqatigisarlugit oqaluttuaraa.
- Nunami attaveqaasersuutit pineqarput. Tassa mittarfik, qulliit nunamilu takuneqarsinnaasut tamarmik pineqarput. Aamma mittarfimmi aqutsineq, ikuallattoqassagaluarpat annaassiniartoqassagaluarpallu qatserisartut annaassiniartartullu, orsiisartut, nalunaarsuinerit allarpassuillu pineqarput.
Jonas allaffissornikkut suliassanut tamanut tunngatillugu immikkut ittumik akisussaaffeqartarpoq, taanna oqaluttuarpoq:
– Timmisartornermut atatillugu akuersissutit amerlaqaat. Tamakku tamarmik Angallannermut Aqutsisoqarfimmi allaffinni assigiinngitsuni suliarineqartarlutillu ataqatigiissaarineqartariaqarput. Ingammik mittarfiit nutaat, soorlu maani Qaqortumi, ammarneqaraangata.
Upalungaarsimaneq ingerlasoq malittarisassallu malinneqartut Angallannermut Aqutsisoqarfiup qulakkeersimanngippagu timmisartoqarfik ammarneqarsinnaanngilaq. Jonas talerperliuvoq.
Allaffissornikkut suliassanit maskiinat pissanganartut assilinissaat nuannernerummat Angallannermut Aqutsisoqarfiup biilileriffimmut qaaqquaatigut. Tassani piffissarujussuaq kingullertigut atorsimavaat.
Qaqortumi mittarfittaap ammarneqarnerani qatserisartut biiliisa mittarfittaaq Nuummullu aqqut qulliminnik siggartaatiminnillu ikitsillutik nuannersumik tikilluaqquaat.
Ajutoortoqalissagaluarpalli Greenland Airportsimi sulisut maskiinallu sukkasuumik sunniuteqarluartumillu iliuuseqarnissamut piareersimanissaat pingaaruteqarpoq.
- Mittarfinni qatserisartut biilii crashtenderinik taaneqartarput, Niels ilisimatitsivoq.
- Aap, oqaatsit timmisartornermut tunngasut atorneqartut amerlaqaat, Jonas oqarpoq.
Taakku mittarfiup ammannginnerani pisariaqartut tamaasa pissarsiarinissaat qulakkeeniarlugu ilaannikkut Qaqortumi ullormut marloriarlutik qatserisartunik sungiusartitsisarlutik oqaluttuarput.
Timmisartut orsussaata annertussusaa mittarfimmi ikuallattoqaratarsinnaaneranut sillimaniarnermi immikkut pingaaruteqarpoq.
Qatserutaasivimmiit mittarfiup nutaap tungaanut isikkiveqarpugut. Tassani soorunami aamma misileraasaqattaartoqarlunilu sungiusaqattaartoqarpoq. Suliaavoq ilungersunartoq, kisianni aamma nuannisartoqarsinnaakutsoortoq oqarfigineqarpugut.
- Timmissamik apuisoornermik pisuusaartitsineq misileragassat ilagaat. Tassa timmisartoq qangattalernermini milernerminiluunniit timmissamik apugaqarpat. Tassani qatserisartunut aqutsisup mittarfimmukarluni timmiaq aporneqartoq ujartussaavaa, Niels oqarpoq nangillunilu:
- Ulloqeqqasiornitsinni kukkukuup sinneri mittarfimmut ilivagut. Sapinngisamik piviusorpalaartinniarlugu aammali quianarsarniarlugu. Tassami kukkukuup saanii nanigamigit qamanngaanneersumik illariarpoq.
Anguniakkamik ataatsimoorussineq pissutigalugu sooq aalajangersimasumik iliuuseqartoqartariaqarneranik oqaloqatigiinneq ajornannginnerulersarpoq, timmisartornermik nakkutilliisut oqarput.
Danmarkimi Kalaallit Nunaannilu mittarfinnik misissuineq assigiinngissuteqarpa?
– Aap, maani inuit ilisarisimallualertaratsigit allatut misigisarpugut. Kalaallit Nunaannimi inuiaqatigiit ikitsunnguupput, maangalu tikeraaraangatta immitsinnut ilisarisimalertarpugut. Tamannattaaq nakkutilliisutut oqartussatut tikikkaangatta atuuppoq, Jonas oqarpoq.
– Isumaqataalluinnarpunga. Soorunami Danmarkimi inunnik aamma naapitsisarpugut. Kisianni Kalaallit Nunaanni mittarfimmut tamarmut attaveqarneq ajornanngitsumik ineriartortinneqarsinnaasarpoq, pisortamit terminalimi sulisunut ataasiakkaanut, taamaalilluni naapeqqikkaanni qungujulasoqartarluni, Niels oqarpoq.
Attaveqatigiilluarneq nuannersuuvoq, aammali suliffimmi iluaqutaasarpoq, nangillutik oqarput. Pingaartumik sulisut qanoq iliornissaanik assigiinngitsunik oqaluttuuttariaqaraangatsigit.
- Oqartussaasutut takkukkaangatta ilaat immaqa misilitsinnermut assingusumik annilaangasarput. Taamaammat tamatta peqataasinnaalluta misigilerumalluta ataatsimullu suliassaqartutut isigiumalluta ataqatigiinnermik ineriartortitsinissaq pingaaruteqarpoq, Jonas oqarpoq.
Nuuk immikkut eqqaamananeqartoq
Kalaallit Nunaanni mittarfiit arlaannik immikkut pingaartitaqarpisi?
– Kangerlussuaq Narsarsuarlu tikeraakulasarnikuusakka immikkut ittumik misigisaqarfigisarpakka. Tassami mittarfiit taakku aqqutigalugit Kalaallit Nunaat ilikkarpara, soorlu allarpassuit taamaaliorsimasut, Jonas oqarpoq, taannalu Namminersorlutik Oqartussani tamatuminnga suliaqartarsimavoq.
Nielsip 2024-mi mittarfimmik ammaaqqaarnini eqqarsaatigaaa. Timmisartorneq sulinermini qanoq nuannarilersimatigalugu oqaluttuaraa.
– Nuummi mittarfittaaq uummatinni immikkut inissisimajuassaaq. Utoqqaliguma taamanikkut akuerseqataaqqaarnikuullunga eqqaamassavara. Qanoq ammannginnerani angalaarfigisarsimanerlugu, kisimiillungalu mittarfimmiikkaangama qullerpassuit qanoq qaammaaritsigisarnersut, Niels oqarpoq.
Qaqortumi mittarfik apriilip 16-ani ammarneqarpoq, aallaqqaammullu Air Greenlandip timmisartuussinissaminut taamaallaat akuerineqarpoq. Kingorna akuersissuteqarnikkut Icelandairip Keflavikimut timmisartuussisarnissaa ammarneqarpoq.
Angallannermut Aqutsisoqarfiup ajorluinnartumik pisoqarsoriguni inerteqqutinik angallannermillu killilersuutinik atuutsitsilersinnaanera Nuummi mittarfimmi assersuutitut takuneqarsinnaavoq.
Tamanna uagutsinnut allanullu angalanissamut pilersaarutitsinnik akornusersorneqartunut uggornarsinnaagaluarpoq. Angalasulli Angallannermiut Aqutsisoqarfimmit akornusersorneqarnissaat kissaatigineqanngilaq. Akerlianilli, Jonas naqissusiivoq.
- Suleqatima ilaataagunarpoq taamaalluni ima oqarfigaanga: "Pappiaqqatigut Angallannermut Aqutsisoqarfik sinnerlugu sulisarpugut, kisianni timmisartumut ilaasut sinnerlugit sulisarpugut,“ Jonas oqarpoq nangillunilu:
– Uangattaaq taama isumaqarpunga. Qaqortumi sumiluunniit timmisartunut qulimiguulinnullu ikiguit toqqissisimasinnaanissat sulissutigisarparput. Tamanna suleqataaffigisinnaagakku nuannaarutigaara.
Piffissaq eqqorlugu iluatsippoq. Angallannermut Aqutsisoqarfimmit aallartitat Air Greenlandip timmisartua Dash-8 Kujataani mittarfittaamit 1500 meterisut takitigisumit isiginnaarpaat.
