Ilisimatusarfimmi ilisimatusartut 75-it allagartartaartut

Nunarput ilinniartitsisunngorlaanik, peqqissaasunngorlaanik, tusagassiortunngorlaanik, inuussutissarsiornermi aningaasaqarnermi ilisimatuunngorlaanik, upperisarsiornermi ilisimatuunngorlaanik immikkullu suliaasunik ilinniarsimasunngorlaanik 75-nik pisuunnguallatsinneqarpoq

Ilisimatusartut 75-it maanna allagartartaarsimalerput

Assi: Emil Stach

Hanna Hviid Hanna Hviid Tusagassiortoq

Saqqummersinneqarpoq 25. Juuni 2026 - 11:24

Ilisimatusarfiup ukioq manna asaanerani allagartartaartitsinerani soraarummeertut 75-it soraarummeernermut uppernarsaatitik tigullugillu maanna ilisimalikkatik, piginnaasatik isiginnittaatsitillu nutaat atorlugit inuiaqatitsinni tapiissuteqarsinnaanngorput.

Ilisimatusarfinnit aqqaneq-marluneersuupput, ilaatigut inuussutissarsiornermik aningaasaqarnermik, inuiaqatigiilerinermik inatsisilerinermillu ilisimatusarsimallutik.

Ilisimatusarfik nittartakkamini taama allappoq.

Ussassaarut

Allagartartaartitsinermi ukiuni arlalinni angusassamik toraagaqarluni suliaqarsimasimanerit aammattaarli inuunermi kapitalimik nutaamik aallartitsinerit malunnartinneqarput, allagartartaartummi maanna ilisimasatik atorlugit iliuuseqarlutillu inuiaqatitsinni tapersiisinnaanngorput.

- Nunatsinni annertuunik suliassaqarlunilu periarfissarpassuaqarpoq. Taamaammat inuit suliatigut ilisimasallit pikkorissut, tunniusimasut akissussaaffimmillu tiguserusussuseqartut atorfissaqartippagut. Taakkualu ullumi inuiaqatitsinnut ingerlateqqippagut. Ukioq manna allagartartaartut ukiuni aggersuni nunatsinni ineriartortitsinermi pingaarutilittut atuuffeqarumaarput, rektori Mari Kleist taama oqarpoq.

allagartartaartut 75-it

Aasaanerani soraarummeersitsinermi allagartartaartut ukuupput:

- Inuussutissarsiornermi aningaasaqarnermut ilisimatusarneq: bachelorit arfineq-marluk
- Tusagassiorneq: bachelorit pingasut
- Inatsisilerineq: bachelorit arfinillit kandidatillu arfineq-pingasut
- Inuiaat kulturiat oqaluttuarisaanerallu: bachelorit sisamat
- Ilinniartitsisut: bachelorit 24-t
- Nutserineq oqaluttaanerlu: bachelori ataaseq
- Inuiaqatigiilerineq: bachelori ataaseq kandidatillu arfineq-marluk
- Isumaginninnermut siunnersortit: bachelori ataaseq
- Oqaasilerineq, atuakkialerineq tusagassiuutilerinerlu: kandidatit marluk
- Peqqissaasut: bachelorit arfineq-pingasut
- Teologi: bachelorit marluk
- Almen pædagogik: kandidati ataaseq

Marlunnik nersornaasiisoqartoq

Allagartartaartitsinerup ilaattut ilinniartunut agguaqatigiissillugu qaffasinnerpaamik karakterinnattunut marlunnut akissarsititsisoqarportaaq.

Royal Arctic Line bachelorinngortumut agguaqatigiissillugu karakteriginnerpaamut nersornaasiuttagaa Mille Louise Rasmussen (Ilinniartitsisoq) tunniunneqarpoq.

Sulisitsisut kandidatinngortumut agguaqatigiissillugu karakteriginnerpaamut nersornaasiuttagaa Maliina Vahlimut (Oqaasilerineq, atuakkialerineq tusagassiuutilerinerlu) tunniunneqarpoq.

Ilisimatusarfik bacheloritut kandidatitullu ilinniagalinnik kalaallini inuiaqatigiinni assigiinngitsorpassuarnik suliaqartussanik ilisimatusartitsisarpoq. Ukioq manna naammassisut ilarpassui toqqaannartumik sulilissapput, allallu ilinniaqqinnermikkut ilisimatusarnermikkullu suliaminnik ineriartortitsinissartik ingerlatiinnassavaat.