Iliuuserisimasavut pillugit immitsinnut nalilersornissatsinnut pissutissaqarpugut: Grønlands Revisionip kukkussutigisimasai hundredemillionilikkaajupput

Greenland Airportsip ukiumoortumik nalunaarusiaa juunimi 2026-mi ataatsimeersuarnermi, akuersissutigineqartinnagu Grønlands Revisionimit kukkunersiortinneqarpoq.

Taamaakkaluartoq ingerlatseqatigiiffiup aningaasanik kaaviiaartitsinerani kukkunerit annertuut marluk millionilikkuutaanik pingasoqinnik kisitsisitallit arajutsineqarput.

Kukkunerit taakku marluk annertuut Ilulissat mittarfissaanut naalagaaffiup tapiissutaasa 400 millionit koruunit kukkusumik nalunaarsorneqarnerannit aallaaveqarput. Greenland Airportsip aningaasanik qanoq ingerlaartitsisimanerannik qanorlu atuisimaneranik kukkusumik tamatuma kingunerisaanik nalunaarusiortoqarpoq.

Qanoq ililluni taama pisoqarsinnaava?

– Uaguttaaq taama immitsinnut aperivugut. Oqaatigiuminaappoq sunarpiaq pissutaalluni taamannak kukkusoqarsimanera. Kisianni Iliuuserisimasavut pillugit immitsinnut nalilersornissatsinnut pissutissaqarpugut, Per Jansen oqarpoq, taanna Grønlands Revisionimi pisortaavoq suleqatini Anders Lau Nielsen peqatigalugu ukiumoortumik nalunaarusiamik tamatuminnga kukkunersiuisuuvoq.

– Isumaqataalluinnarpunga. Soorunami tamanna takusinnaasimasariaqaraluarparput, aammami 400 millionit koruunit amerlassusii ilisimaneqarluarput. Aningaasat ingerlaarnerannik naatsorsuusiaq misissornerani tamanna paasilertupallassinnaasimassagaluarparput, Anders Lau Nielsen ilassusiivoq.

Aningaasat 400 millionit koruunit Ilulissani mittarfiliornermut naalagaaffiup tapiissutai utertinneqarsinnaanngitsut ingerlatseqatigiiffiup aningaasanik ingerlatitseqqittarneranut naatsorsuutaani Greenland Airportsip taarsigassarsiaanut ilanngunneqarput.

Kukkussutip aappaa tapiissutinut tassunga tunngavoq. Greenland Airportsip taakkua ilaat 364 millionit koruunit 2025-mi isertitassatut naatsorsuutigaat. Taakku nutaamik isertutut nalunaarsorneqanngillat, taamaattumillu naatsorsuutiniit peerneqassallutik.

Tamannali nalunaarsuiffimmi kukkusumi inissinneqarpoq, taamaattumillu kukkusoqarneratigut ingerlatseqatigiiffimmut aningaasarsiorluarnertut isikkoqalersitsivoq. Kukkussutilli iluarsineqareerpat kisitsisit 145 million koruuninik amigartooruteqarnermit 219 million koruuninik iluanaaruteqarnermik kinguneqarput.

Kisitsisit taakku ingerlatseqatigiiffiup sinneqartoorutaanut amigartoorutaanullu paarlaanneqassanngillat. Ingerlatseqatigiiffiup aningaasanik isaatitsisimanera imaluunniit aningaasanik ukiup ingerlanerani ilanngaateqarsimanera, kisitsisit taakkua takutippaat.

Greenland Airports 2025-mut ukiumoortumik nalunaarusiamik nutaamik, nassiussinngilaq. Ingerlatseqatigiiffik ilisimatitsivoq kukkunerit 2026-mut ukiumoortumik nalunaarusiami, aaqqinneqarlutillu allanneqassasut.

Greenland Airportsip Grønlands Revisionillu naqissuserpaat aningaasat amerlasuut annertuumik kukkunerugaluartut, nammineq aningaasaatinut imaluunniit aningaasanik iluanaarutinut ataatsimut isigalugit ineriartornermut sunniuteqarnavianngitsut. Tamanna tunngavigalugu isumaqarput ukiumoortumik nalunaarusiamik, allamik suliaqartoqarnissaa akuersisoqarnissaalu pisariaqanngitsoq.

Suleqatigiinneq ingerlaannassasoq Greenland Airports-imit uppernarsarneqarpoq:

– Grønlands Revision suli tatigaarput. Aap, kukkuneq aamma taakkua takusinnaasimasariaqaraluarpaat, soorlu uaguttaaq takusinnaasariaqarsimagaluaripput. Kukkunersiuisunulli misigisarput tamakkiisumik isigalugu ajunngilluinnarpoq, aningaasaqarnermut pisortaq Per Stjærnholm Trærup oqarpoq.