Atassut naalakkersuisooqatigiinnit tunuarpoq: Jens-Frederik Nielsen pakatsivoq

Atassut maanna Naalakkersuisoqatigiinniikkunnaarpoq. Partii tusagassiorfinnut taama nalunaarpoq.

Siulersuisuunerit tamarmiusut ulloq 8. november ataatsimiinnerminni tamarmik isumaqatigiipput partii Naalakkersuisunit tunuassasoq.

Taama aalajangernermi Inatsisartuni Naalakkersuisunilu ulluni kingullerni pisut tunngavilersuutigaat. Atassut isumaqarpoq Nivi Olsen KNQK-mut tunngasumi suliami akisussaaffimmik tigusilluni Naalakkersuisutut tunuarsimasariaqaraluartoq.

Naalakkersuisoqatigiilli aalajangerput Nivi Olsen suli tatigalugu, tamatumanilu Atassutip isummernera tusarnaarneqarsimanngitsoq, partii tusagassiorfinnut nalunaarummini allappoq.

Atassut isumaqarpoq naalakkersuisoqatigiit politikkikkut akisussaassuseqanngitsumik ingerlatsigut. Taamaammat Atassut naalakkersuisoqatigiinnit tunuarpoq.

Aningaasat allanut atorneqarnerat ilisimasimagaat

Suliaq uparuagaat tassaavoq Nunatta Karsiata 2025-imut naatsorsuutai Inatsisartuni oqaluuserineqarmata illuatungiliuttut tamarmiusut ilinniartitaanermut, kultureqarnermut, timersornermut ilageeqarnermullu naalakkersuisumik Nivi Olsenimik  (D) tatiginnikkunnaarlutik nalunaaruteqarmata, naalakkersuisup KNQK-mut aningaasaliinermut tunngatillugu iliuuseqarsimanera pillugu. 

Oqaluuserineqartup allagaataanni ilaatinneqarpoq Naalakkersuisut ilisimasimagaat KNQK 2025-mut aningaasaliissutinit missingersuutigineqartut akuerineqarsimasut saniatigut aningaasanik allanut atuisimasoq.

AAMMA ATUARUK

Nivi Olsenip tatiginnikkunnaarnerit marluk anigorai

Nivi Olsen Naalakkersuisoqatigiinnit suli tatigineqarluni - taakkunani Atassut ilaallutik - naalakkersuisuuginnarnissamut inissisimanissamut periarfissinneqarpoq. 

Tamatumali kingorna Atassut nalunaarpoq naalakkersuisoqatigiinniiginnarnissaq nalilersorneqaqqittariaqartoq.

Akisussaaffimmik tigusisoqanngilaq

- Ataqqeqatigiinneq aamma naapertuilluarneq atuuttariaqarnera nalilersorneqarput. Tamannali naamassineqarsimanngilaq. Akisussaaffimmik tigusisoqanngilaq aamma naliliinerput najoqqutaralugu naalakkersuinikkut peqataasinnaajunnaarnerput nalunaarutigaarput, Atassutip siulittaasuata tullia, Bentiaraq Ottosen, Facebookimini allappoq. 

Akisussaaffimmik tigusisoqannginnera pillugu allatamini itisiliivoq:

- Atassut naappertuilluartuummat ileqqorissaarnissarlu ileqqorimmagu, naalakkersuisoqatigiinnit anivugut. Pisut kingulliit inooqataaffigineqarsinnaanngillat, akisussaaffilli pineqartumut sapanginneqarpoq. Tamanna nalilersorluareerlugu aalajangiivugut.

Ulloq manna tikillugu Atassummit Maritha Broberg isumaginninnermut, suliffeqarnermut, ilaqutariinnut nunamullu namminermut naalakkersuisutut inissisimagaluarpoq. Naalakkersuisut taamaasillutik maanna ataatsimik ilanngarput.

Maritha Broberg qinigaaffimmi matumani naalakkersuisut tallimassaraat tunuartoq. Bentiaraq Ottosen (A) isumaginninnermut, suliffeqarnermut, nunamut namminermut avatangiisimullu naalakkersuisut tunuarpoq nittartakkakkut sulisussarsiortarfik pillugu isornartorsiorneqareerluni. Mads Pedersen (IA) meeqqanut, inuusuttunut ilaqutariinnullu naalakkersuisutut, inuttut nammineq peqqutini tunngavilersuutigalugit tunuarpoq. Vivian Motzfeldt (D) - taamani Siumumi ilaasortaanermi nalaani - Siumut naalakkersuisoqatigiinnit tunuarnera pissutigalugu nunanut allanut tunngasunut ilisimatusarnermullu naalakkersuisut tunuarpoq. Kiisalu Naaja H. Nathanielsen (IA), inuussutissarsiornermut, aatsitassanut, inatsisinik atortitsinermut, nukissiuutinut naligiissitaanermullu naalakkersuisutut tunuarpoq Folketingimut qinigaanini pissutigalugu.

Naalakkersuisoqatigiit ikiligaluartut Demokraatit aamma Inuit Ataqatigiit Inatsisartuni suli amerlanerussuteqarput, tassa Inatsisartuni ilaasortani 31-usuni 18-iugamik. Atassut Inatsisartuni marlunnik ilaasortaatitaqarpoq.

Jens-Frederik Nielsen: Pakatsivunga

Naalakkersuisut siulittaasuat, Jens-Frederik Nielsen (D), Facebookimi nal. 19.50 allappoq uggoralugu Atassut Naalakkersuisoqatatigiinnit tunuassallugu aalajangermat, tamatumalu qanoq ingerlanneqarsimanera pakatsissutiginerarlugu.

- Atassut nammineerluni oqaatigaa suleqatigiinnermit tunuarniarluni aalajangiineq ippassaq aalajangerneqareersoq. Taamaattumik naalakkersuisoqatigiinni suleqatigiittut naatsorsuutigisimagaluarpara tamanna pillugu ilisimatinneqarsimassasugut. Pingaartumik ullumi ataatsimoorluta 2027-mut aningaasanut inatsisissamut isumaqatigiissut atsioqatigiissutigereeratsigu.

- Uannut politikkikkut suleqatigiinneq aamma tatiginninnermik aammalu immitsinnut ammasumik pissuseqarfiginninnermik tunngaveqarpoq, pingaartumik aalajangiinerit ajornakusoortut aalajangiiffigineqartillugit. Taamaattumik ilumoorlunga pakatsissutigaara tamatumuuna taama pisoqarsimanngimmat.

Naalakkersuisut siulittaasuat allappoq Atassut suleqatigisimaneranut pingaarutilinnilu aalajangeeqataasarsimaneranut qujassuteqarluni. Inatsisartunit partiit allat assigalugit, akisussaaffimmik tigusinissani Atassummut suli saaffiginnittassalluni allappoq.

- Suliassaq siunitsinniittoq partiimit ataasiinnarmit angineruvoq, aammalu isumaqatigiinngissummit ataasiinnarmit anginerulluni. Innuttaasunut pisussaaffeqarpugut eqqissisimaneq, patajaassuseq aammalu ersarissumik siunnerfeqarneq pilersissallugit, aamma politikkikkut suleqatigiinneq ajornakusoortunngoraluaraangalluunniit.

- Sammisara allanngunngilaq. Nunarput paarissavarput, akisussaaffik tigussavarput aammalu politikkikkut sulineq eqqissisimasumik patajaatsumillu ingerlaqqissinnaanissaa qulakkiissavarput, tamannami nunatta pisariaqartippaa, Jens-Frederik Nielsen naggasiivoq.