Iliveqarfiit sumiiffii apeqqutaatillugit taaguuserneqassapput, niuertorlu aqquserngit ilaannut atsiunneqassaaq

Kommuneqarfik Sermersuumi Teknikkimut Avatangiisinullu Ataatsimiititap Nuummi iliveqarfiit sumiiffii naapertorlugit taaguusersorneqarnissaat pillugu siunnersuutit sapaatip-akunnerani kingullermi suliaraat.

Nunat Aqqinik Ataatsimiititaliamit saqqummiunneqartut, sumiiffiit atserneqarnissaannut siunnersuutit nunap assingani takuneqarsinnaavoq, ataatsimiititaliallu siunnersuutit akueraat.

Ataatsimiititaliap aamma innuttaasunit saaffiginnissutigineqartoq suliaraa, tassani siunnersuutigineqarpoq aqqusernup "Eqalugalinnguit“ ilaa, sanaartornermik ingerlatsisup Peter Christensenip, ukiorpassuarni Nuummi niuertup, aqqusernillu tamatuma sananeqarneranut akisussaasup, aqqanik aqqusineq taaguuserneqassasoq.

Siunnersuut naapertorlugu aqqusernup ilaa Peter Christensenip aqqusernganik taaguuteqassaaq.

Peter Christensenip ilaqutai kinguaavilu atermik siunnersuuteqarput, borgmesteriusimasullu Nikolaj Heinrichip siunnersuut allakkatigut taperserpaa.

Nikolaj Heinrichip allakkatigut tapersiinermini erseqqissarpaa Peter Christensen niuertuusoq nuimasoq ilisimaneqarluartorlu, amerlasuunik sulisitsisuusoq aamma ajunngitsuliortartoq:

- Naalagiartuartartutut ilaanni oqaluffimmut iserpunga, tassanilu nutaamik natilersuisoqarsimasoq takuara. Peter Christensen nammineq aningaasaatini atorlugit oqaluffimmi nateq nutaaq innuttaasunut tunissutigigaa paasivara, tamannalu innuttaasunit nuannarineqaqaaq, Nikolaj Heinrich Peter Christensen pillugu allappoq.

Aammattaaq Peter Christensen 1999-imi Inatsisartut nersornaasiuttagaannik sølviusumik Nersornaaserneqarpoq, imminut isumagiinnarnani aammali sulisunik amerlasuunik suliffissaqartitsisimanera pissutigalugu.

Ataatsimiititaliap atermik siunnersuut akueraat.