Illersornissamut ministeri: Kalaallit Nunaanni sakkutooqarfilersuineq pillugu ernumassuteqarneq paasisinnaavarput

Folketingimi ilaasortap Aki-Matilda Høegh-Damip (N) illersornissamut ministeri Troels Lund Poulsen pingasunngornermi apeqqarissaarfigineqarmat apeqquteqarfigaa.

Kalaallit Nunaat sinnerlugu folketingimut ilaasortaq apeqqutinut marlunnut akissutissarsiniarpoq, taakku ima eqikkarneqarsinnaapput: Sooq Kalaallit Nunaanni illoqarfiit eqqaanni sakkutooqarfinnik nutaanik pilersitsisoqassava, aamma danskit ministeriat illersornissamut isumaqatigiissutit pillugit isumaqatigiinniarnerit matoqqatinneqarnerannut pisuua?

Aki-Matilda Høegh-Damip partiiata Naleqqap illersornissamut isumaqatigiissutit ilaatigut Nuummi sakkutooqarfiliornermut aningaasaliissuteqarnernik imaqarnera isornartorsiorsimavaa, tassani ilaatigut Issittumi Sakkutooqarfiup umiarsuaanut umiarsualivimmik kiisalu Issittumi Sakkutooqarfiup qullersaqarfianik nutaamik sanaartortoqarnissaanik qulakkeerinnittoq.

Aki-Matilda Høegh-Dam sakkutooqarfiit inuinnaat najugaqarfiata suliffiatalu eqqaani sanaartorneqartut, naak nunat tamalaat akornanni inatsisitigut aalajangersagaqaraluartoq sakkutooqarfik taamaattoq inoqarfissuarmi inissinneqassanngitsoq, pingasunngornermi ilaatigut oqaatigaa.

- Paasinninneq annertooq

Illersornissamut ministerip sakkutooqarfiup nutaap isumakuluuteqartitsisinnaanera paasivaa:

- Kalaallit Nunaanni sakkutooqarfilersuinissamut atatillugu ernumassutigineqarsinnaasut danskit naalakkersuisuisa paasilluarsinnaavaat.

- Danskit naalakkersuisuisa inuiaqatigiit kalaallit toqqissisimanissaat pingaartingaarpaat, taamaattumillu soorunami Issittoq Atlantikullu avannaa pillugit isumaqatigiissummi immikkoortumi siullermi aamma isumaqatigiissummi immikkoortumi aappaani suliniutinut atatillugu oqallinnerit ilaat eqqumaffigaat, ministeri akivoq.

Sakkutooqarfiup nunap immikkoortuani illersornissaq isumannaallisaanerlu nukittorsarnissaat siunertarigaa, aamma sorsunnermi innuttaasut attaveqaasersuutaat inatsisit malillugit saassunneqarsinnaanngitsut, ilanngullugu erseqqissaatigaa.

Taamaaliorneq silatusaarnerpa?

Aki-Matilda Høegh-Damilli Kalaallit Nunaat sineriaa taama angitigisoq illoqarfinnut ungasissumut sakkutooqarfilersuinissaq silatusaarnerussannginnersoq paaserusuppaa.

Tassani illersornissamut ministerip innersuussutigaa illersornissamut sakkutooqarneq nuna tamakkerlugu atuutissasoq: isumaqatigiissut 1 aamma 2 Naalakkersuisunit isumaqatigineqartut:

- Uannut imaanngilaq ´immaqaluunniit´. Uannut taamaattussaallunilu taamaattussaanngilaq. Nuummiissaaq, aammali Kalaallit Nunaanni sumiiffinni allani. Soorunami sumiiffiit ilaanni innuttaasoqarpallaanngitsuni soorlu Kangerlussuarmi, najuutissavagut, Troels Lund Poulsen akivoq.

Vivian Motzfeldt paasissutissanik avitseqateqarsinnaanngila?

Aki-Matilda Høegh-Damip aamma illersornissamut isumaqatigiissutit pillugit isumaqatiginninniarnernut Inatsisartut peqataatinneqartarnerat eqqartorpaa. Isumaqatiginninniarnernit paasissutissat Inatsisartunut ilaasortanut ingerlateqqinneqartarnerat Naleqqap naammaginngilluinnarpaa.

Aki-Matilda Høegh-Damip paaserusuppaa Vivian Motzfeldt paasissutissanik avitseqateqannginnissaanik illersornissamut ministerimit peqquneqarnersoq.

Illersornissamut ministeri arlaleriarluni oqarpoq isumaqatiginninniarnerit pillugit paasissutissanik allanut ingerlateqqiiumanani, taakkumi naalakkersuinikkut sulinermi qaffasinnerpaami ingerlanneqarput.

- Kalaallit Naalakkersuisui sunik oqaloqatigisimanerikka tamanut oqaluttuariumanngilakka, kisianni oqarsinnaavunga illersornissamut isumannaallisaanermullu politikkimut tunngasut pillugit politikkikkut oqaluuserinninnissara inerteqqutiginagu.

Suliaq ingerlateqqinniaraa

Aki-Matilda Høegh-Dam tusagassiuutinut nalunaarummi apeqqarissaarnerup kinguninngua saqqummiussami oqaatigaa, ministerip akissutaa akissutigineqartunit apeqqutinik amerlanerusunik pilersitsisoq:

- Ministerip oqariartuutai Naalakkersuisunit erseqqinnerusumik erseqqissaateqarnissamut tunngavissiipput. taamaattumik suliap ingerlateqqinnissaanut piareersimavunga, kalaallinut innuttaasunut aalangiisartunullu paasissutissanik paarlaateqatigiittoqannginneranut kikkiut akisussaasuunersut pillugit erseqqinnerusumik akissuteqaateqarnissaq piumasarissallugu, Aki-Matilda Høegh-Dam erseqqissaavoq.