Illersornissamut ministeri Nuummukarpoq:  Innuttaasunik ataatsimiisitsisoqassaaq

Illersornissamut ministeri Troels Lund Poulsen (Venstre) Nuummut ullumi tikippoq. Taassuma nunanut allanut naalakkersuisoq Vivian Motzfeldt (S) ataatsimeeqatigissavaa.

Ministeri naalakkersuisorlu Nuummi innuttaasunik arfininngornermi ataatsimiisitsissapput. 

Taannali pitinnagu illersornissamut pisortaq Michael Hyldgaard peqatigalugu arfininngornerup ullaatungaani Utoqqarmiut Kangerluarsunnguanukassapput. 

Tassani erngup nukinganik innaallagissiorfiup ungasinngisaani nakkutilliinermut sungiusarneq takuniaaffigissavaat. Sakkutuut sungiusarnerat "Operation Arctic Endurance", danskinit nato-milu iligiinnit peqataaffigineqartoq qanittukkut aallartinneqarpoq. Nunatsinni attaveqaasersuutit pingaarutillit qanoq illersorneqarnissaat ilaatigut sungiusarneqarluni.

Utoqqarmiut Kangerluarsunnguani innaallagissiorfik Nuup qanittuani attaveqaasersuutinut pingaarutilinnut ilaavoq.

Ministeri naalakkersuisorlu innaallagissiorfimmut takuniaanermik nalaani tusagassiortunik malinnaasunik naapitsissapput, Nuummullu uteqqereerunik  tusagassiortunik naapitseqqinnissaat pilersaarutaavoq.