Illersornissaqarfiup Issittumi timmisartut alapernaarsuutit nutaat isumaqatigiissutigingajalerpai

Danskit illersornissaqarfiata timmisartortitseqatigiiffik Air Greenland, Issittumi nakkutilliinermik suliaqartussaq, attartornissamut isumaqatigiissuteqarfigingajalerpaa.

Danskit illersornissamut ministeriat Jeppe Bruus (S) atorfimmi nutaami siullermeerluni ataasinngornermi Kalaallit Nunaannut tikeraarnerani tamanna ilaatigut oqaluuserineqassaaq.

- Isumaqatigiissutip tamatuma qanittukkut naammassinissaa sulissutigissavara. Air Greenlandip timmisartut Challengerit suliarisartagaasa ilaat isumagisussaavai, Jeppe Bruus Ritzauimut oqarpoq.

- Kalaallit Nunaanni pisut nakkutigiuarnissaat uagutsinnut pingaaruteqarpoq, taamaattumik timmisartumik nakkutilliisumik attartornissaq isumaqatigiinniutigileruttorparput, oqarpoq.

Illersornissamut ministeri oqarpoq sakkutuut timmisartui Challengerit „nutaanngililluinnalersut“. Taakku atorunnaariartuaassapput, nutaanillu siumaqatigiissusiortoqarpat Challengerip suliassarisarsimasai Air Greenlandip akisussaaffigilissavai.

Siusinnerusukkut allaaserineqareersutut timmisartut alapernaarsuutit Challengerit teknikkikkut iluarsaaqqinneqartarnerat aserfallatsaaliorneqartarnerallu pissutigalugit piffissap ilaani tamakkiisumik atorsinnaaneq ajorpoq.

2024-mi sakkutuut Kalaallit Nunaata qulaallugu ullut 278-it timmisartorsimapput. Tassa imaappoq agguaqatigiissillugu ullut sisamakkaarlugit nunarput qulaallugu nakkutilliisut timmisartorsinnaasarsimanngitsut, Berlingske augustimi 2025-mi allappoq.

Ukioq manna januaarimi illersornissamut ministeriaqarfik nalunaarpoq Air Greenland “nakkutiginninnermik suliassanik tigusisoqarnissaanik” isumaqatigiinniarfigineqartoq.

Issittoq pillugu politikkikkut isumaqatigiissummi aalajangerneqarpoq timmisartut Challengerit atorunnaariartuaarneqassasut, tassungalu atatillugu nunatsinni ingerlatsisut suleqatigiinneq pillugu isumaqatigiissuteqarfigineqassasut.

Jeppe Bruusip Kalaallit Nunaannut tikeraarnermini nunanut allanut tunngasunut ministeri, Mute B. Egede ataatsimeeqatigissavaa.

Illersornissamut ministerip Issittumi Sakkutooqarfiup qullersaqarfia aamma kalaallit suliffeqarfii arlallit, ilaatigut Air Greenland, pulaassavai.

- Illersornissamut ministeritut atuuffeqalerama Kalaallit Nunaannut piaartumik tikeraarnissara pingaartissimaqaara, Jeppe Bruus oqarpoq.

Jeppe Bruus juunip pingajuani illersornissamut ministerinngorpoq, nunatsinnullu tikeraajaarnera Mute B. Egedep nuannaarutigaa.

- Kalaallit Nunaanni suliffeqarfiit, Illersornissaqarfiup suliassaanik assigiinngitsutigut tapersersuisut, ataatsimeeqatigissallugit nuannaarutigaara, tusagassiuutinut nalunaarummi oqarpoq.

Illersornissaqarfiup pisortaa Michael Wiggers Hyldgaard ataasinngornermi Kalaallit Nunaannut tikeraarnermini aamma peqataassaaq.

/ritzau/