Ilulissani kinguaattoornerit amerlasinnaasut

Ilulissaniit Ilulissanullu timmisartuussinerit piffissami aggersumi kinguaattoorfiusinnaasut, Air Greenland ilisimatitsivoq.

Tamanna Greenland Airportsip Ilulissat mittarfiani juunip 15-ianniit juulip 31-ata tungaanut antennemik nutaamik ikkussuineranik pissuteqarpoq, suliallu kingunerisaanik Air Greenlandip timmisartuutai Dash 8-t piffissami tassani silaannaap qanoq issusaanut piumasaqaatit sakkortunerusut aallavigalugit timmisartuussinerit ingerlatissavaat.

Air Greenland nittartakkamini taama allappoq.

Air Greenland naapertorlugu silaannaap qanoq issusaanut piumasaqaatit sukannernerusut aallaavigalugit, silarluttoqartillugu timmisartut aallartussat mittussallu ikinnerusinnaapput, ingammik ullaakkut unnuakkullu putsernerani.

- Taamaattumik piffissami tassani Ilulissanut Ilulissanillu timmisartuussinerit kinguaattoorsinnaapput, allanngortinneqarsinnaallutik imaluunniit atorunnaarsinneqarsinnaallutik, Air Greenland allappoq erseqqissarlugulu antennemik ikkussuineq Greenland Airportsimit suliarineqarmat Air Greenlandip tamanna aqussinnaanngikkaa.

Nuummiit aallartunut siunnersuut

Air Greenland, Nuummit angalasussanut arlalitsigut innersuussivoq, tassani angallannermi pissutsit sunniuteqarsinnaasut eqqarsaatigineqarput.

Ilaatigut Air Greenlandip innersuutigaa timmisartup aallarnissaata nalunaaquttap-akunneri marluk sioqqullugu check-in-imut takkuttoqartarnissaa.

Greenland Airportsip ingerlatsinera pissutigalugu nassatat aatsaat kingusinnerusukkut tiguneqarsinnaaneri ullaakkut check-in-i utaqqinarsinnaasoq, Air Greenland ilisimatitsivoq

Air Greenlandip nittartagaani innersuussutit tamaasa atuarsinnaavatit.