Immiaaqqat sodavandillu Kalaallit Nunaanni tunisassiarineqartut puui akittuuteqassanngillat

Inatsisartut puut akitsuusersorneqarnissaat pillugu siunnersuutit marluk marlunngornermi oqaluuseraat.

Siunnersuutit ilaat Siumup Inatsisartuni eqimattaanit siunnersuutigineqarpoq, tassanilu immiaaqqat sodavandillu Kalaallit Nunaanni tunisassiarineqartut maqinneqartartulli puui akitsuusersorneqannginnissaat pillugu, Naalakkersuisut peqquneqarput inatsisissatut siunnersuummik saqqummiusseqqullugit.

Poortukkat pillugit akitsuutip nunaqavissut tunisassiornissaannut unammillersinnaanerannut ajoqusiisoq tunngavileriutigineqarpoq.

Aningaasaqarnermut Akileraartarnermullu Ataatsimiititaliaq isumaqatigiittoq allannguutissatut siunnersuuteqarpoq: Akitsuuteqartitsinnginneq Kalaallit Nunaata WTO-mi inatsisitigut pisussaaffii naapertorlugit ingerlanneqarsinnaappat immiaaqqat sodavandillu Kalaallit Nunaanni tunisassiarineqarlutillu maqinneqartut poortuutissanut akitsuummut ilaatinneqannginnissaat pillugu inatsisissatut siunnersuummik saqqummiusseqqullugit Naalakkersuisut peqquneqarnissaannik Inatsisartut aalajangiiffigisassaattut siunnersuut.

Siullermeerinninnermi suliarineqarnerani siunnersuut itigartinneqarnissaanik Naalakkersuisut innersuussuteqaraluartut ataatsimiititaliap allannguutissatut siunnersuutaa tapersersorniarlugu aalajangerput, taamaalillunilu siunnersuut akuerineqarpoq.

Siunnersuutip aappaat Naleqqap siulittaasuanit Pele Brobergimit saqqummiunneqarpoq, taassumalu imeruersaatit puuisa akitsuutaat atorunnaarsikkumallugu, Naalakkersuisut inatsisinik allannguinissaat kissaatigaa.

– Akitsuutip ulluinnarni pisiassat akii qaffatsittarpai. Aaqqissuussineq kisiat eqqorneqanngilaq; innuttaasut pisiniarfinni imeruersaatinik pisisut toqqaannartumik eqqorneqartarput, Pele Broberg inatsisip siullermeerneqarnerani oqarpoq.

Akitsuutit appartinneqarpata atuisunut tamakkiisumik sunniuteqarnavianngitsoq, pisiniarfinnulli iluaqutaaginnarsinnaasoq, Aningaasaqarnermut Naalakkersuisup Aqqaluaq B. Egedep (IA) tunngavilersuutigaa.

Naalakkersuisut siunnersuut itigartinniarlugu innersuussipput. Arfineq-marluk akuersillutik taasipput, 17-illu akerliullutik taasillutik, taamaasilluni siunnersuut itigartinneqarpoq.

Naleqqameersup Pele Brobergip siunnersuutaa, EMRIP-imit inassuteqaatit naapertorlugit, Kalaallit Nunaanni nunap inoqqaavi “Inuit” paasissutissat tunngavigalugit nalunaarsorneqartalernissaannik Naalakkersuisut peqquneqarnissaannik Inatsisartut aalajangiiffigisassaattut siunnersuut, Inatsisartuni aappassaaneerneqarluni ullumikkut suliarineqarpoq

- Nunap inoqqaavisa pisinnaatitaaffii qanoq illersorneqarsinnaappat kikkut pisinnaatitaaffeqartut qanorlu pineqartartut naammattumik ilisimanngikkutsigit? Pele Broberg inersuarmiit aperivoq.

FN-ip nunat inoqqaavisa pisinnaatitaaffii pillugit immikkut nalunaarusiortup 2023-mi inassuteqaataanut innersuussivoq, tassani immikkut nalunaarusiortup inassutigaa Danmark Kalaallit Nunaallu piginnaasaqarnerminni inuit pillugit paasissutissanik immikkoortiterneqartunik katersuissasut inatsisinut, politikkimut suliniutinullu tamanut tunngasunik, ilaatigut ilinniartitaanermut, peqqissutsimut, naapertuilluarnermut, arnanut meeqqanullu nunap inoqqaavinut nakuusernernut, inunnut innarluutilinnut naligiisitaanermut aamma parnaarussiviit misiligummillu iperagaasimasunut sullissinernut tunngatillugu.

Siullermeernerani Naalakkersuisut siulittaasuat Jens-Frederik Nielsen (D) ima oqarpoq:

- Naalakkersuisut akuersaassanngilaat innuttaasut suiaassuseq, inuiaassutsit upperisarsiornerlu tunngavigalugit immikkoortinneqartarnerat.

Siunnersuut arfinilinnik taperserneqarpoq 16-inillu akerlerineqarluni, taamaalillunilu itigartinneqarpoq.

Inatsisartunut ilaasortaq Pipaluk Lynge (IA) inuttut peqquteqarluni Inatsisartuni sulinngiffeqarpoq. Inuit Ataqatigiit allattoqarfiani pisortaq Edvard Lyberth Mørch Sermitsiamut paasissutissiivoq.
Pipaluk Lyngep sulinngiffeqarnera septembarip 22-ani aallartippoq, maannalu sapaatit akunnerisa pingajussaat ingerlalluni.
Peter Olsen Inatsisartut ukiaanerani ataatsimiinneranni sinniisussatut taamaammat aggersarneqarpoq.

Pipaluk Lynge Inatsisartunut qaqugu uteqqissanersoq suli nalunarpoq. Sulinngiffeqarneratalu qanoq sivisutiginissaa paasissutissiissutigineqarani.

Inatsisartuni ilaasortat 31-usut Inatsisartut nittartagaanni ina.gl-imi aqqi allaqqasinnaammata Pipaluk Lynge tassani ilaanngitsoq allattoqarfimmi pisortap ilanngullugu paasissutissiissutigaa. Pineqartorli sulinngiffeqartutut aamma nalunaarsorneqaqqavoq.

Inatsisartunut qaqugu suliartoqqissanersoq suli nalunarpoq.

Pipaluk Lynge Inatsisartut Nunanut Allanut Sillimaniarnermullu Ataatsimiititaliaanni siulittaasuugaluarpoq, atuuffimminiilli tunuarnini septembarip 22-ani tamanut nalunaarutigaa. Parteeqataa Nivi Rosing ataatsimiititaliami tassani maanna siulittaasuuvoq.

Pipaluk Lyngep politikkikkut piffissami sivisuumi suliaqareerluni, ilaatigut Kalaallit Nunaata USA-mut NATO-mullu attaveqarnera pillugu, siulittaasutut tunuarnissani aalajangiussimallugu Facebookimi quppernermini saqqummiussamini kingullermi allaaseraa.

Kalaallit Nunaata nammineq aalajangiisinnaassusaa sulissutigalugulu nunanut allanut sillimaniarnermullu politikkimut tunngasuni Kalaallit Nunaata, Danmarkip Savalimmiullu assigiimmik paasissutissinneqartarnissaat anguniarsimallugu ilaatigut allaaseraa.

- Naatsorsuutigineqarsinnaajuaannarpunga, tamannalu tulluusimaarutigaara, tapersersorneqarnini pillugu qujalluni allappoq.

Inatsisartut umiarsuit Kalaallit Nunaata imartaanit putsup gassiinut imermik saligut (scrubbervand) kingusinnerpaamik januaarip aallaqqaataanit aniatitsinerup, inerteqqutaalerallarnissaa pillugu siunnersuut sisamanngornermi oqaluuseraat.

Putsup gassiinut imermik saligut tassaavoq imeq mingutsitsisoq seernartulik umiarsuarnit angisuunit motoorinut aniatitsisunit aniatitanik minguiaanermi pilersartoq.

Inatsisartut putsup gassiinut imermik saliguteqartarnerup inerteqqutaalerallarnissaa akueraat, Justus Hansenilli (D) siunnersuutaanit piffissaliunneqarsimasoq allaaneruvoq.

Naalakkersuisut Kalaallit Nunaat OSPAR-ip pilersaarutaanut peqataalissasoq, tassanilu Putsup gassiinut imeq saligutaanikunik eqqaaneq inerteqqutaalissasoq decembarimi 2025-mi aalajangerput. Tamanna isumaqarpoq Kalaallit Nunaanni umiarsualivinni, nunap iluani imartami aamma nunatta imartaani putsup gassiinut imermut saligutaanikunik eqqaasarnerit inerteqqussut juulip aallaqqaataani 2027-miit atuutilissasoq.

Naalakkersuisut allannguutissatut siunnersuutaannut 21-vat akuerseqataapput. Akuersinani taasisoqanngilaq, taamaasillunilu Inatsisartut isumaqatigiinnerisigut tamanna akuerineqarpoq, putsup gassiinut imermik saligummik unitsitsigallarneq ukiuni tulliuttuni atuutissaaq.

Inatsisartut oqaluuserisassaanni siullermik aalajangerneqaraluarpoq qinikkat oktobarip arfineq-aappaanni Siumut aamma Naleqqap siunnersuutaa, tassa nalunaaquttap aalajangersarneqarnera UTC-3-mut nuutsillugulu aasaanerani nalunaaquttap nikisittarnera atorunnaarsillugu siunnersuut oqaluuserissagaat.

Oqaluuserisassanili maanna allaqqalerpoq siunnersuut ulloq 13. oktober oqaluuserineqassasoq.

Siunnersuutip kinguartinneqarnera tusareersimasorigukku kukkuneruallaanngilaq, tassami siullermiilinngilaq kinguartinneqarnera.

Siunnersuut taamaatsillugu ukiakkut ataatsimiinnermi 2025-mi siullermeerneqarpoq. Kinguaattoornerilli assigiinngitsut peqqutigalugit siunnersuutip aappassaaneerneqarnissaa upernaakkut 5. majimi oqaluuserisassanut nuutsinneqarpoq. Siunnersuutilli tunuartinneqarnissaa, ataatsimiititaliamilu pineqartumi suliarineqaqqaarnissaa partiit isumaqatigiissutigaat.

Maannalu pilersaarutaalerpoq siunnersuut 13. oktober aappassaaneerneqassasoq, 21. oktoberilu pingajussaaneerneqassalluni.

Inatsisinut ataatsimiititaliamit oqaaseqaatit siunnersuummut suli kakkiunneqarsimanngillat.

Inatsisartut ukiaanerani ataatsimiinnerat marlunngorpat oktobarip arfernaniit qulinut aallartissaaq, aqqanernut naliginnaasumik aallartittaraluarluni.

Tamanna Inatsisartut siulittaasuata Kim Kielsenip (attaviitsoq) sisamanngornermi oktobarip aallaqqaataani inersuarmiit nalunaarutigaa.

Aammattaaq Inatsisartut siulittaasoqarfiata aalajangerpaa tallimanngornermi oktobarip 9-anni ataasinngorpallu oktobarip 12-anni ataatsimiittoqassasoq.

Ataatsimiinnermi oqaluuserisassat naammassiniarlugit taamaaliortoqartartoq, Kim Kielsen oqarpoq.

Inatsisartut aalisarnermut inatsisip allanngortinneqarnissaanut siunnersuut, aalisarnermut, piniarnermut nunalerinermullu naalakkersuisumit Peter Borgimit (D) saqqummiunneqartoq pingasunngornermi septembarip 30-ani oqaluuseraat.

Allannguutissat pingaarnersaat tassaassaaq aalisarnerup piujuartitsisumik ineriartortinneqarnissaanut siunnersuisoqatigiinnik pilersitsineq, taakkualu immikkut ilisimasallit naalakkersuisunut ilaatigut aalisarnerup aningaasaqarneranut aalisarnerullu ineriartortinnissaanut siunnersortitut suleqataassapput. Aalisarnermut siunnersuisoqatigiit pioreersut ingerlaannassapput inuussutissarsiornerullu soqutigisaanik sinniisuussallutik.

Aamma umiatsiaaqqanik 6 meterit inorlugit takissusilimmik piginnittoq nammineq aalisarnermut peqataasariaqarnera atorunnaarsinneqassaaq.

IA Demokraatillu allannguutit taakku marluk iluaraat, Siumulli Naleqqallu ernummatigaat immikkut ilisimasallit qinikkanut sunniuteqarpallaalernissaat, aalisartunut inuussutissarsiortullu kattuffiinut ajoqutaasumik.

Illuatungiliuttut Atassutillu aamma ernummatigaat nammineq peqataanissamut piumasaqaatip atorunnaarsinneqarnerata inuit aningaasaateqarluartut sunniuteqarnerulersissinnaagai namminersortullu aalisartut sulisitsisunit sulisoqalersillugit.

Partiit tamarmik siunnersuut Aalisarnermut, Piniarnermut Nunalerinermullu Ataatsimiititaliamut ingerlateqqipput.

Ataatsimiinnermi tamanna oktobarip 21-ani aappassaaneerneqassaaq.

Aki-Matilda Høegh-Damip siunnersuutaa Inatsisartut ataasinngornermi septembarip 28-ani oqaluuseraat. Siunnersuut Kalaallit Nunaata Nunavullu akornanni pisortatigoortumik suleqatigiinnermut ataatsimoorussamik aaqqissuussinermik pilersitsinissamik siunertaqarpoq.

Partiit tamarmik isumaqatigiissutigaat Nunavup suleqatigilluarnerunissaa, partiilli Naleraq kisiat pinnagu suleqatigiinnermi aaqqissuussat pioreersut atorneqarnissaat kissaatigaat.

Kulturimut, ilinniartitaanermut, piniarnermut/aalisarnermut angallannermullu tunngasunik imaqartoq, Kalaallit Nunaata Nunavullu akornanni Memorandum of Understanding 2022-meersoq IA-p innersuussutigaa.

Suleqatigiinnerit pioreersut pisortatigoortumik ataavartumik, naalakkersuisunik inatsisartunillu ilaasortaqartumik pilersitsinissamut tunngavissiisut, Naleraq isumaqarpoq

Naalakkersuisut siunnersuut itigartippaat, naalakkersuisunik suleqateqarnerup nukittorsarneqarnissaa pillugu isumaqatigiissummik peqartoqareernera tunngavilersuutigalugu.

Siunnersuut ataatsimiititaliami suliarineqanngikkaluarluni oktobarip 15-ianni aappassaaneerneqassaaq.

Naleqqami ilaasortaq Kuno Fencker Facebookimi allappoq Naleraq partiini kisiartaalluni Nunatta Nunavullu akornanni inatsisartuni siunnersuisooqatigiinnik pilersitsinissamik tapersersuisoq, partiillu allat tamarmik Naalakkersuisullu siunnersuut akerlerigaat.

Jens-Frederik Nielsenip oqalugiarnini naggaserlugu Naalakkersuisut sinnerlugit oqariartuuteqarpoq.

- Akisussaaffimmik tigusissaagut. Kiffaanngissuseq pillugu. Meeqqavut pillugit. Aningaasaqarnerput pillugu. Nunarsuatsinni inissisimanerput pillugu. Akornatsinni immitsinnut akisussaaffimmik tigusissaagut.

Naalakkersuisuniit kissaatigaarput Inatsisartunik suleqateqarnerput pitsaasuussasoq. Sukannersumik oqallittarnissaq kissaatigaarput. Ammasumik isumaqatiginngittarnissarput kissaatigaarput, taanna oqarpoq.

- Pisinnaatilluta atituumik isumaqatigiissusiortassasugut kissaatigaarput. Nunatsinnullu siuariartortitsisussamik aalajangiisassasugut.

Maanna Nunatsinni najugaqartunut tamanna pisussaaffigigigitsik, minnerunngitsumillu meeqqanut uagutsinnit kingornussisussanut tamanna pisussaaffigigitsik taanna isumaqarpoq.

Jens-Frederik Nielsen qujallunilu oqaluttarfimmiit aqqarpoq.

Jens-Frederik Nielsenip ukiumut aggersumut pingaarnertut neriorsuutit pingasut oqaluttarfimmiit oqaatigai.

Siullertut, Naalakkersuisut qulakkiissavaat akisussaaffeqartumik aningaasaqarnikkut politiki ingerlatissallugu.

Aappaattut, Naalakkersuisut atugarissaarnermut tunngasut innuttaasut inuunerannut qaninnerusut nukittorsassavagut, innuttaasummi tassani toqqaannarnerusumik inuiaqatigiit iluanni pissutsit malugisarpaat.

Pingajuattut, Naalakkersuisut nunarsuatsinni iliuuseqarsinnaassuserput nukittorsarniarparput, Nunatsinnilu ineriartornissamut sinaakkutissat pitsaanerusut pilersillugit

- Suliassat annikitsuunngillat. Kisianni suliassat taakku pisariaqarput. Maani nikorfalluta aaqqissuusseqqinnissat imaannaanngitsuusut nassuerutigerusunneruagut, aaqqiissutissat piunngitsut neriorsuutiginissaanninngaanniit, taanna oqarpoq.

Naalakkersuisut siulittaasuata USA pillugu inissisimaffittaaq avaqqussinnaanngilaa.

- Suli USA-mut akerleriinneq aaqqiivigineqanngitsoq atugaraarput. Suleqatigiissitaq sulivoq. Oqaloqatigiinneq ingerlavoq. Tamanna ajunngilaq. Oqaloqatigiinneq pisariaqarpoq. Taamaattoq oqaloqatigiittoqassappat aamma illuatungeriilluni ataqqeqatigiinneq pisariaqarpoq naatsorsuutigaaralu oqaloqatigiinneq aqqutigalugu ataatsimoorfiusumik isumaqatigiissuteqarumaartoq.

- Kalaallit Nunaat innuttaasa kalaallit pigaat. Siunissarput maani Nunatsinni aalajangerneqassaaq. Uagutsinnit, Jens-Frederik Nielsen oqarpoq.

Nunarput suleqatigiinnissamut, akersuunnikkut pinnani oqaloqatigiinnikkut ingerlanneqartoq aqqutigalugu niueqatigiinnissamut aningaasaliiffigineqarnissamullu ammasoq taanna oqarpoq.

- Taamaattoq Nunarput tuniniagaanngilaq, attartugassiaanngilaq, nunallu allamiut akornanni politikikkut pissaaneqarniuunnerannut misileraassutaanngilaq.

Naalakkersuisut siulittaarsuata qinikkat politikkikkullu aalajangersimasumik avatangiisillit eqqarsarluaqqaalaarlutik pissusilersortariaqartut qinnuigai. Aammali inuit ataasiakkaat pisumi matumani pissusilersornerat pillugu saaffigai.

- Pinngitsuusutut oqartoqarsinnaanngilaq, inuit ataasiakkaat Nunarput amerikamiut erfalasuannik qallerlugu kagiliaralugu agguluttorlugu tamanut takoqqusaartunut peqataaneq.

- Taamatut pissusilersorneq nikanarsaataavoq. Akisussaassuseqanngitsuliorneruvoq. Aamma toqqissisimannginnermik pilersitsivoq.

Jørgen Boassen, 2026-mi januaarimi USA-mi Trumpimut illersuilluni aaqqissuussisoqarmat peqataasoq, pisimasinnaavaa. Tassani kaagi Kalaallit Nunaata ilusaanik ilusiligaq Amerikamiullu erfalasuannik erfalasuligaq videoliarineqarsimasoq inuit nittartakkatigut naapittarfiini siammarterneqarpoq.

Naalakkersuisut kissaatigaarput inuiaqatigiit inuit ataasiakkaat iluatsittumik inuuneqalernissamut kiffaanngissuseqarlutik inuuffigisinnaasaannik pilersitsissasugut, Jens-Frederik Nielsen oqarpoq.

Minnerunngitsumik inuiaqatigiit pilersissavagut ikiorneqarnissamut pisariaqartitsisoqalertillugu ikiorserneqarnissamut inissaqartitsisunik.

- Pissutsit isigissagaanni, inuiaqatigiittut imminut qiviartariaqarpugut. Tassunga ilaapput meeqqat angerlarsimaffimminniit avataanut inissinneqartartut. Meeqqat angajoqqaat akisussaaffigaat, taamaattoq tamatta peqatigiilluta akisussaaffigaarput toqqissisimasumik peroriartornissamut sinaakkutissat pilersissallugit.

- Meeraq angerlarsimaffimminiit avataanut inissinneqaraangat, taamatut aalajangiisarneq imaannanngitsorsuuvoq. Ilaannikkulli pisariaqartarpoq. Meeqqamut iluaqutaanerusussaq salliutinneqartuaannartassaaq. Meeraq angerlarsimaffimmiitinneqartassanngilaq persuttaaffiusartumi, nakuuserfiusumi atornerluiffiusumi sumiginnaaffiusumilu. Poortornagu tamanna oqaatigisariaqarpoq. Taamaattoq aamma poortornagu nassuerutigisariaqarparput meeqqanik angerlarsimaffiit avataannut inissiisarnerit amerlavallaarujussuartut.

Politikkikkulli aaqqiissutaasinnaasunik eqqaasaqanngilaq.

Peqqinnissaqarneq eqqarsaatigalugu isumaqatigiissummik annertusisamik pilersitsisoqassasoq Naalakkersuisut sulissutiginiarpaat.

- Peqqinnissaqarfipput tatineqarsimavoq. Tamanna nalunngilarput. Atorfinitsitassarsiornerit imaannaanngittaqaat. Sulisut arpasukaarlutik sulisariaqartarput utaqqisarnerillu sivisuallaartarput. Napparsimasut amerlavallaat nalornillutik inuusariaqartarput, uffa erseqqissumik pineqarnissartik pisariaqartinnerpaallugu.

- Tamakkua ammasumik eqqartortariaqarpagut, Jens-Frederik Nielsen oqarpoq.

Atorfinitsitassarsiornerit sulisunillu atorfimminniiginnartitsisarnissaq nukittorsartariaqarpagut. Suliffiullu iluani qaffakkiartorsinnaaneq periarfissagissaarnerutittariaqarparput. Nappaassuarmut kræftimut tunngasuni tulleriiaarinerusumik periuseqarluni suleriaaseqarnissaq qulakkeertariaqarparput, misissueriaatsit katsorsaariaatsillu sukkanerusumik ingerlanneqartalissapput.

Tarnikkut nappaatit timikkut nappaatitulli pimoorutsigalugit iliuuseqarfigisassavagut.

- Peqqinnissaqarfik pitsaasoq katsorsaanermut tunngassuteqaannanngilaq. Toqqissisimasuunissamut aamma tunngassuteqarpoq. Napparsimasoq toqqissisimasoq. Ilaqutariit toqqissisimasut. Aamma inuiaqatigiit toqqissisimasut.

Ulluinnarni inuuniarnermi aningaasartuutit qaffakkiartuinnartut Jens-Frederik Nielsenip nassuerutigaa.

- Ilaqutariippassuit tamanna ulluinnarni inuunerminni malugillualereerpaat pisiniarfinni nioqqutissanik pisiniaraangamik.

- Nunarsuatsinni niuerniarfiit maanngaanniit aqussinnaanngilagut. Ukarainemi sorsuttut maanngaanniit aqussinnaanngilagut. USA-p, Israelip Iranillu akornanni eqqissiviilliortut maanngaanniit aqussinnaanngilagut. Inuussutissat akii nunanit allaneersut maanngaanniit aalajangiiffigisinnaanngilagut.

- Taamaattoq qanoq iliuuseqarsinnaanerluta akisussaaffimmik tigusisinnaavugut.

Suliniutit pissakinnerusunut tunngasut Naalakkersuisut sulissutigiumaaraaat taassuma oqaatigaa. Soraarninngorsimasut. Aningaasarsiakinnerusut. Ilaqutariit meerartallit.

Aningaasat ataasiaannakkamik tunniussassat pissutsit tamakkerlugit aaqqiivigisinnaanngikkaat kisianni maannangaaq pissutsinut tigussaasumik ikiuutissatut atorneqarsinnaasut taassuma nassuerutigaa.

Naalakkersuisut siulittaasuat inbuiaqatigiinni ineriartorneq eqqartorlugu nangippoq.

– Ilinniarneq pingaaruteqarluinnarpoq. Taamaattumik meeqqat atuarfiat nukittorsarneqaqqillunilu aaqqissuunneqartariaqarpoq. Naalakkersuisuni naatsorsuutigilluinnarparput meeqqat atuarfiat pillugu inatsisip malunnaatilimmik allannguivigineqarnissaa pillugu siunnersuuterput Inatsisartut ataatsimiinneranni matumani akuerineqarumaartoq, taanna oqarpoq.

Naalakkersuisut siulittaasuata inuiaqatigiinni ineriartorneq eqqartorlugu nangippoq.

– Ilinniarneq pingaaruteqarluinnarpoq. Taamaattumik meeqqat atuarfiat nukittorsarneqaqqillunilu aaqqissuunneqartariaqarpoq. Naalakkersuisuni naatsorsuutigilluinnarparput meeqqat atuarfiat pillugu inatsisip malunnaatilimmik allannguivigineqarnissaa pillugu siunnersuuterput Inatsisartut ataatsimiinneranni matumani akuerineqarumaartoq, taanna oqarpoq.

Nuna najorusupparput imminnut pilersorsinnaasut amerliartuinnartut najugarisinnaasaat, kikkullu tamarmik tapersersoqatigiinnissaannut inissaqartitsisoq, Jens-Frederik Nielsen oqarpoq.

Atugarissaarnissamulli akornutaassanngilaq.

– Aamma nunami pilersitassatsinni kinaluunniit kiserliortussanngorlugu qimassanngilarput.

– Arlarput nappaammik eqqorneqarpat, ikiorserumallugu naapinneqartassaaq. Ikiortariallit ikiussavagut.

– Meeraq toqqissisimanani alliartortinneqartoq, inersimasunit iliuuseqarumasunit orninneqartassaaq. Utoqqaq inuunini sivisooq atorlugu inuiaqatigiinnik napatitseqataasimasoq, ataqqinnittumik kiinnerfigineqartassaaq. Inoqativut innarluuteqartut peqatigiinnitsinnit ajattorneqartassanngillat, akuutinneqarnissaminut piviusorsiortumik periarfissinneqartassaaq.

Unikkallartoqareersoq ataatsimiinneq aallarteqqinneqarpoq, Naalakkersuisullu siulittaasuannit Jens-Frederik Nielsenimit ammaanersiornermi oqalugiaat tullinnguuppoq.

Innuttaasut naalakkersueqataanerat oqaluuseralugu oqalugiaatini aallarnerpaa:

– Tamat oqartussaaqataanerat pappialamik taasiviinnaanngilaq, partiinut kisimi tunnganngilaq oqalugiarnermullu aamma kisimi tunnganngilaq, Jens-Frederik Nielsen oqarpoq nangillunilu:

– Tamat oqartussaaqataanerat tassaavoq inuit akornanni isumaqatigiissuteqartarneq, pissaaneqarneq ilumut unammillerneqarsinnaasartoq, aalajangiiffigisimasat oqallisigineqarsinnaaffiat nunalu ingerlanneqassasoq innuttaasunut ataqqinninneq aqqutigalugu. Tamanna tulluusimaarutissaraarput. Mianerissavarput. Aamma pisussaannartut isigisassarinngilarput.

Akerliussutsimik takutitsisut Inatsisartut ataatsimiittarfiata silataani katersuupput, politikerillu taakku ilassiniarlugit unikkallarput.

Inuit 25-it missaanniipput.

Akerliussutsimik takutitsisut Danmarkimi meeqqat kalaallinik angajoqqaallit amerlanerujussuai pillugit akerliussitsimik takutitsipput.

- Meeqqagut angerlartinneqarlik, taakku nilliapput.

Akerliussutsimik takutitsisut oqaaseqartuat politikerit pinngitsaaliilluni arsaarinnittarnerit spiralilersuisimanermut suliatut inatsisitigullu ataataqanngitsut pillugit suliatut pimoorutsiginngikkaat naammaginagu oqarpoq.

Naalakkersuisut kingusinaannginnerminni iliuuseqarnerusariaqarput, akerliussutsimik takutitsisoq oqarpoq.

Naalakkersuisoq Mariane Paviasen Jensen (IA) Naalakkersuisut sinnerlugit akerliussutsimik takutitsisunut oqalugiarpoq.

Mariane Paviasen akerliussutsimik takutitsisunik ataasinngorpat naapeqateqarnissaminut qilanaarluni ilaatigut oqarpoq.

Politikerit anillallutik akerliussutsimik takutitsisut naapinniassammatigit ataatsiminneq unitsikkallarneqarpoq.

Ataatsimiinneq nal. 11:45 aallarteqqinneqassaaq