USA-p præsidentiata Donald Trumpip „inuit napparsimasorpassuit isumagineqaratik inuusut ikiorniarlugit“ umiarsuaq napparsimmaviusoq Kalaallit Nunaannut aallartinniarlugu sapaatiummat Truth Socialimi nalunaarutigaa.
- Avalareerpoq!!!" nalunaarummi "USNS Mercy"-mik, silassorissuusiaq atorlugu assiliamik assitaqartinneqartumi, allassimavoq.
USA-p præsidentiata Donald Trumpip „inuit napparsimasorpassuit isumagineqaratik inuusut ikiorniarlugit“ umiarsuaq napparsimmaviusoq Kalaallit Nunaannut aallartinniarlugu sapaatiummat Truth Socialimi nalunaarutigaa.
- Avalareerpoq!!!" nalunaarummi "USNS Mercy"-mik, silassorissuusiaq atorlugu assiliamik assitaqartinneqartumi, allassimavoq.
Kalaallit Nunaata umiarsualiviinut angivallaartoq
USNS Mercy USA-p umiarsuaasa napparsimmaviusut ilagaat, sakkutuullu Amerikamiut imarsiortut naapertorlugit 272 meterinik takissuseqarlunilu 10 meterinik itsineqarpoq.
Umiarsuarujussuuvoq.
Kalaallit Nunaanni umiarsualivinni USNS Mercymut talittarfiusinnaasutuaq tassaavoq Nuummi containerinut talittarfik, taanna 310 meterisut takitigalunilu 10,5 meterisut itissuseqarpoq.
Taamaattoqarpalli umiarsualivimmi suliassat allat akornuserneqassapput, tassami sapaatip-akunneri tamaasa ulluni arlalinni Kalaallit Nunaannut tamarmut nioqqutissanik nunamullu avammut tunisinermi suliaqartoqartarpoq.
Umiarsualiviit allat umiarsuarnik taama angitigisunik tulaffigineqarsinnaanngillat.
Tamanna Geodatastyrelsenip nittartagaani takuneqarsinnaavoq: gronlandskehavnelods.dk, tassanilu Kalaallit Nunaanni umiarsualiviit itissusaat takissusaallu tamanut saqqummiunneqarput.
Assersuutigalugu Qaqortumi talittarfiup takissusia 110 meteriinnaallunilu itissusaa 6,5 meteriuvoq. Ilulissani Tasiilamilu aamma taamaappoq. Qaanaami talittarfiup takissusia 135 meteriullunilu itissusia 7 meteriuvoq, Sisimiuni talittarfiup takissusia 180 meteriullunilu itissusia 7,8 meteriulluni.
Issittumi angalannissamut naleqqutinngitsoq
Unammillernartoq alla tassaavoq umiarsuarpassuit takornariartaatit assigalugit USA-mi umiarsuit napparsimmaviit issittumi angalanissamut naleqqulluinnannginnerat.
Tamanna umiarsuarnik imarsiornermillu immikkut ilisimasallip Danmarkimi Ingeniørforeningenimeersup Hans Otto Holmegaard Kristensenip Sermitsiamut oqaatigaa.
– Umiarsuaq napparsimmavik USNS Mercy orsussamik assartuutaanikuuvoq - karsi puttasoq sikumut qajannaallisagaanngitsoq, taamaammallu napparsimasunik sulisunillu tusindilinnik usilersorlugu Issittumi angalanissamut naleqqutinngilaq.
USA-p illersornissamut ministeriaqarfia naapertorlugu umiarsuaq napparsimasunut 1000-inut inuttanullu 1300-t angullugit amerlassuseqartunut inissaqarpoq.
Ajornartoorfimmi umiarsuaq
Hans Otto Holmegaard Kristensen naapertorlugu umiarsuaq immikkut ittumik ajornartoortoqartillugu atorneqartussaavoq, soorlu 2010-mi Haitimi nunap sajunnerata kingorna inuppassuit qimarngutsinneqarlutik Amerikamiut umiarsuaanni napparsimmavimmi nakorsartinneqarmata.
Aammattaaq umiarsuaq Kalaallit Nunaannukanngilaq.
– Trumpip neqeroorutaatut allatulli eqqarsaatigilluaqqaarnagu neqeroorutaavoq. Aammattaaq Kalaallit Nunaannukaarneraaneq asuli oqalunneruvoq. Tassami Alabamami umiarsualiorfimmiippoq, Hans Otto Holmegaard Kristensen oqarpoq.
– Nunatsinni peqqinnissaqarfimmi siniffiit 500-t inorlugit ullumikkut pisariaqartikkutsigit umiarsuarmi siniffiit 1.000-t kikkunnut atussagatsigit. Tamannami tassaaginnarpoq ingattarserluni sorujussuanngortitsineq, Syddansk Universitetimi aningaasaqarnermut professori soraarneq aamma Kalaallit Nunaanni Peqqissutsimut Siunnersuisoqatigiinni siulittaasoq Kjeld Møller Pedersen oqarpoq.
Assi: Emil Helms
Umiarsuaq napparsimmaviusoq ajornartorsiutinik nutaanik pilersitsiinnassasoq
Amerikamiut umiarsuaannik napparsimmavilimmik Kalaallit Nunaannut tikisitsisoqarnissaanik isuma piviusorsiornerujartuinnartillugu neriuutissaqarpasinnginnerujartuinnartoq Syddansk Universitetimi aningaasaqarnermut professori soraarneq aamma Kalaallit Nunaanni Peqqinnissakkut Siunnersuisoqatigiinni siulittaasoq Kjeld Møller Pedersen isumaqarpoq.
– Umiarsuaq napparsimmaviusoq sumulluunniit aaqqiissutaasinnaanngilaq. Kingorna ajornartorsiutinik arlalinnik kinguneqassaaq. Inatsisitigut apeqqut eqqarsaatigeriarukkit. Kalaallit Nunaanni innuttaasutut pilatsikkumalluni Amerikami umiarsuarmut napparsimmaviusumut ikigaanni, taava sillimmasiissuteqanngikkaanni pisinnaatitaaffeqanngilaq. Taavami pilatsinnissaq umiarsuup suliarisinnaasaanit ajornakusoornerussappat, taava napparsimasoq sumut aallarunneqassava? Tamatumunnga atatillugu assigiinngitsunik ajornartorsiuteqarpoq. Qanoq kikkullu napparsimasut umiarsuarmut angallanneqassappat? Kikkut tuluttut kalaallisullu oqaluttaassappat? Pillorissaqqinneq qanoq iliuuseqarfigissavarput? Napparsimasunullu nalunaarsuiffiit peqqinnissaqarfimmi sulisunut ulluinnarni sulinermut pingaaruteqartut suneqassappat?
Isumaliutersuut piviusunngorsinnaanngitsoq
Kjeld Møller Pedersen naapertorlugu kalaallit inuiaqatigiit peqqinnissaqarfiallu pillugit ilisimasaqanngilluinnarneq præsidentip allagaani aamma erserpoq.
– Aamma ima aperisinnaavugut: – Nunatsinni peqqinnissaqarfimmi siniffiit 500-t inorlugit ullumikkut pisariaqartikkutsigit umiarsuarmi siniffiit 1.000-t kikkunnut atussagatsigit. Tamannami tassaaginnarpoq ingattarserluni sorujussuanngortitsineq, Kjeld Møller Pedersen oqarpoq, taassumalu Amerikamiut neqeroorutaat malersuinertut isigiinnarpaa.
- Isumassarsiaq taanna piviusunngorsinnaanngilaq. Isumassarsiatsialaanngitsoq inuk silassorissoq kinaluunniit oqarsinnaavoq - annikinaarlugu oqaatigalugu.
Kjeld Møller Pedersen naapertorlugu nunatsinni peqqinnissaqarfimmi ajornartorsiutaasoq tassaavoq sulisussaaleqineq sivikitsumillu sulisitsisoqartarnera. Ajornatorsiullu taanna Amerikamiut umiarsuaannik napparsimmaviusumik tikisitsinikkut aaqqinneqarsinnaanngilaq.
