Tupaarnaq Kalaallit Nunaannut uternianngilaq: Perorsaasut atugaat ajormata uterusunngilaq

- Akissarsiat qaffanneqartuuppata inimilu ataatsimi sisamanik sulisoqalertuuppat angerlassagaluarpunga. Soorunami.

Tupaarnaq Freiberg 33-nik ukiulik, perorsaasutut ilinniarsimasoq, taama oqarpoq.

Århusimi najugaqarlunilu meeraaqqerivimmi sulivoq. Ukiut qulit matuma siorna Danmarkimut nuuppoq, tassanilu perorsaasutut ilinnialerami 2025-mi januaarimi naammassivoq.

Tupaarnaq Freiberg Kalaallit Nunaannut angerlarsertarlunilu angajoqqaaminut qaninnissani maqaasisarpaa.

- Soorunami angerlarnissaq takorloortarpara. Pinngortitamut, kalaaliminernut kulturimullu nalunngilluakkannut, taanna oqarpoq.

Akissarsialli, sulisussaaleqineq paarlattaasullu taarserartarnerat pissutigalugit uternissaminut nangaavoq.

Tunngavilersuutai assaat kissalaartut amigaataaneri pillugit Sermitsiami allaaserisani perorsaasut arlallit ajornartorsiutaannut assingupput.

Ulluinnaat eqqissiviilliornartut

Tupaarnaq Freibergip ukiuni arlalinni aasaanerani atuanngiffeqarnermini paaqqinnittarfinni assigiinngitsuni paarlatsitut ikiortitullu sulisarnini pissutigalugu Kalaallit Nunaanni paaqqinnittarfiit ulluinnarni qanoq ingerlanneqartarnerat paasisimasimavaa.

Misilittakkat taakku sunnerneqaatigeqai, tamannalu sooq perorsaasutut ilinniarsimasutut angerlarnissamut ullumikkut nangaassuteqarneranut nassuiaataavoq.

- Paarlatsit taarseraatiinnavissut tamatigut misigisarpara. Ullut tamangajaasa sulisussaaleqisoqartarlunilu akissarsiat pilerinanngillat, taanna oqarpoq.

Tupaarnaq Freiberg naapertorlugu sulisut taarseraannerat pissutigalugu ulluinnaat eqqissiviilliornartarput. Sulisulli aalajangersimasut ulapippallaartartut ulluinnarnilu ataqatigiissaarisinnaajumallutik tamaviaartariaqartut aamma maluginiarpaa.

- Kingusinnerusukkut Danmarkimi suliffimmik misiliillunga paaqqinnittarfinni paarlattaasussanik aalajangersimasunik atorfinitsitsisoqartarnera tupaallaatigaara. Tamanna eqqissisimanermik patajaannermillu pilersitsimmat iluarilluinnarpara, taanna oqarpoq.

Perorsaasut ilinniarsimasut angerlarsimaffimminnut uterniarnatik aalajangeraangata sulisussanik piginnaanngorsagaasunik pissarsiniarneq ajornakusoornerulertartoq assaat kissalaartut amigaataanerat pillugu allaaserisat nangeqattaartut takutippaat.

Nunatsinni paaqqinnittarfiit arlallit sulisussanik ilinniarsimasunik pissarsinissartik sapernartittarpaat, sumiiffiillu ilarpassuini ulluinnarni suliassat naammassineqarniassammata paarlattaasut ikiortillu pisariaqartinneqarput.

Tupaarnaq Freiberg ullut ilaanni Kalaallit Nunaannut uteqqinnissaminik suli takorluugaqarluni oqaluttuarpoq. Taannali naapertorlugu perorsaanermik suliaqartunut atugassarititaasut pitsanngorsarneqarnissaat pisariaqarpoq.

- Bachelorinngorniarlunga inaarutaasutut allaaserisara allakkakku Kalaallit Nunaanni Danmarkimilu perorsaasut ilinniagaqarsimasut akissarsiaasa assigiinngissutaat tupaallaatigaara. Taamani Kalaallit Nunaanni akissarsiat qaffanneqanngippata angerlarniarnanga eqqarsarpunga, Tupaarnaq Freiberg oqaluttuarpoq.

Danmarkimi ingerlalluarnerusoq

Tupaarnaq Freibergip Danmarkimi meeqqerivinni misilittagai perorsaasutut sulinermut isiginnittaatsianut aamma sunniuteqarput. Taanna Danmarkimi ingerlalluarnerulluni, tassani aalajaatsumik avatangiiseqarluni suliaminillu naammassinninnissamut periarfissaqarluarluni, oqaluttuarpoq.

- Assersuutigalugu ulloq naallugu sulisarlungalu sapaatip-akunneranilu nalunaaquttap-akunneri 37-it sulisarpunga. Akunneri ikittuinnaat taakku iluaqutaangaartarput. Ullormut nalunaaquttap-akunnerini arfineq-pingasuni sulisariaqarnani iluarpoq, taanna oqarpoq.

Tupaarnaq Freiberg naapertorlugu sapaatip-akunneranut ataasiaannarluni nalunaaquttap-akunnerini arfineq-pingasuni sulisarpoq, tamannalu malugineqarsinnaavoq.

„Sapaatip-akunneranut ataasiarlunga marloriarlungaluunniit paaqqinnittarfik ammassallugu nalunaaqutaq 06.30 suliartortarpunga, taavalu ulloqeqqata missaani soraartarlunga. Qasujannginnerunera timikkut malugisinnaavara. Soorunami qasusarpunga, kisianni tamanna attassinnaavara, taanna oqaluttuarpoq.

Tupaarnaq Freiberg ullumikkut Danmarkimi ingerlalluaraluarluni Kalaallit Nunaannut uternissaminik suli eqqarsaateqarpoq. Ilaquttat, pinngortitaq kulturilu suli maqaasivai.

Taannali naapertorlugu perorsaasut atugaat allanngortinneqartariaqarput. Akissarsiat pitsaanerulernissaat, sulisut amerlanerulernissaat ulluuneranilu paaqqinnittarfinni pissutsit patajaallisinneqarnissaat ilaatigut tikkuarpai.

- Kalaallit Nunaannut ullumikkut utissagaluaruma akissarsiakinnerullungalu inuuniarneq akisussaaq. Eqqarsaatigikulasarpara: Qanoq ilillunga ulluinnakka ataqatigiissassavakka? Akunnerit suliffissakka amerlanerussallutillu akissarsiakka appasinnerungaatsiassapput, Tupaarnaq Freiberg oqarpoq.

Siunnersuut tapersersoraa

Taamaammat meeqqerivinni inimi ataatsimi sulisut sisamaasalernissaannut Inatsisartut siunnersuutaat tapersersorpaa.

- Isumaqataangaarpunga, inernissaalu pissanganarpoq. Iluaqutaassasoq qularutiginngilara. Assersuutigalugu ataaseq napparsimalerpat suli pingasut inimi sulissapput, taanna oqarpoq.

Siunnersuut Inatsisartuni akuerineqarpoq, maannalu Naalakkersuisut periarfissat sukumiinerusumik misissussavaat.

- Inimi perorsaasut oqaloqatigiilluarsinnaassallutillu tapersersoqatigiittarniassagamik minnerpaamik marluusariaqartut isumaqarpunga, Tupaarnaq Freiberg oqarpoq.

Kalaallit Nunaannukarnissani suli eqqarsaatigisarpaa. Ulluinnarni Nuummi Sisimiuniluunniit najugaqarnissani, ilinniakkanilu atorlugu meeqqanut toqqissisimanartunik avatangiiseqartitsillunilu isumassuinissani takorloortarpaa.

Suli angerlarnissamik takorluugaqarpoq. Suliffeqarnermili atugassarititaasut allanngortinnagit takorluuiinnarallarpoq.

- Ullut ilaanni angerlarusuppunga. Kalaallit Nunaanni meeqqat sullillugillu allanngueqataarusuppunga. Kisianni angerlassagumapitsannguisoqaqqaartariaqarpoq, taanna oqarpoq.