Immikkut ittumik neqeroorut: Illu issunik qammagaq maanna pisiarisinnaavat

- Pineqartoq tassaavoq piginnittup nammineq piumasaa naapertorlugu neqeroorut, tamannalu nunatsinni inissianik tuniniaanermi immikkuullarilluinnarpoq.

Illunik tuniniaasartoq Larseeraq Chemnitz Nuummi illunik tuniniaasarfimmit Ukavilameersoq taama oqarpoq. Aanaap Illua, mittarfiup iliveqarfiullu akornanniittoq, Siaqqinerup eqqaaniittoq maanna tuniniarneqartoq suliffeqarfiup nalunaarutigeqqammerpaa.

- Aanaap illua inuppassuarnit ilisimaneqartoq, illut amerlanngitsut nallersinnaasaat, Nuup eqqaani pinngortitami inissisimavoq, Larseeraq Chemnitz oqarpoq.

- Illuaraq sunngiffimmi atugassatut immikkuullarissutut isigineqartoq saniatigut aamma inuussutissarsiornikkut soqutiginartumik periarfissaqarpoq. Takornarianut sumiiffimmi ilisimaneqarnerpaat ilaannik misigisaqarfigisinnaasaannut — Angallassisoqarluni angalanermi, pinngortitami misigisassarsiorluni imaluunniit unnuisarfittut — inissisimanera pissutigalugu takornariartitsisarfimmut tulluartuuvoq.

Meeqqerivik tuniniaasoq

Aanaap Illua meeqqerivimmit Mikisumit Mannguani inissisimasumit ullumikkut pigineqarpoq.

- Illuaraq 2018-imi pissarsiaraarput, Anita Devantier, siusinnerusukkut pisortaasimasoq oqaluttuarpoq.

- Meeqqat pinngortitami aneersinnaammata illuaraq nuannaarutigeqaarput – tassanilu akunnerpassuarni nuannersunik misigisaqartarpugut. Angajoqqaat aamma aserfallatsaaliuinermut akunnerpassuarnik atuisarput. Meeqqat Mikisumiileraangata angajoqqaat tamarmik ukiumut nalunaaquttap-akunneri qulit tunniuttassagaat piumasarineqarpoq. Tamanna angajoqqaatut piffissamik taasarparput – tamannalu angajoqqaarpassuit akornanni immikkut ittumik ataqatigiinnerulersitsisarpoq.

- Mittarfiulli nutaap atulernerata kingorna pissutsit ajornakusuulersimaneri nassuerutigisariaqarparput, taamaammat Aanaap Illua allamut ingerlateqqittariaqalerparput.

Aanaap Illua 2018-imi Anita Devantierip Mikisumi pisortaanerata nalaani inunnit ataasiakkaanit tuniniarneqalerpoq.

- Periarfissat ingerlaannaq takusinnaalerpakka, siulersuisunullu ornigullunga pissarsiarisariaqaripput oqarpunga. Siulersuisut tapersersorpaannga, tamannalu meeqqerivimmi sammisassaqartitsinermut iluaqutaalluinnarpoq.

Aanaat peqatigiiffiata suliaa

Aanaap Illua aanaat peqatigiiffiannit 1990-ikkut aallartinneranni sananeqarpoq. Illut qammakkat qanoq sananeqartarnersut Nuummi meeqqat misigissagaat peqatigiiffiup kissaatigaa. Illuaraq inuiattut ullorsiornermi ukiuni siullerni ornigarneqarluartarpoq, tassani aanaat peqatigiiffiat kaffillertarlutillu nerisitsisarpoq. Illuaraq katittorsiornermut aamma atorneqartarpoq.

Aanaap Illua ivigaasanik qisunnillu sanaajuvoq. Aataap Illua ujaqqanik ivigaasanik qisunnillu sananeqartussaq 1990-ikkunni aamma pilersaarutigineqarpoq, pilersaarutilli piviusunngortinneqarsimanngillat.

Sermitsiap Aanaap Illua pillugu paasissutissanik amerlanerusunik pissarsiniarluni Nuutoqaq attaveqarfigaa, taamaattorli ikiuussinnaasimanngilaq.

Taamaammat Sermitsiamik atuaasartut ilaat illuaqqamut oqaluttuassaqarunik jesper@sermitsiaq.gl-imut saaffiginninnissamut tikilluaqqusaapput.