Ingerlatsivik: Aningaasat ima amerlatigisut kommuninut agguaanneqassapput

Illoqarfiit pingaarnersaata kommuniani sapaatip-akunnerani matumani Aningaasaqarnermut Inuussutissarsiornermullu Ataatsimiititaq ataatsimiissaaq, tassanilu ingerlatsivimmit politikerit aningaasat qanoq amerlatigisut Kommuneqarfik Sermersuumit kommuninut allanut nuunneqarnersut paasitinneqassapput.

Aningaasat katillugit 2026-mi 425,9 million koruuniussasut, ingerlatsivik naliliivoq.

Kommuninit atugarissaarnerusunit kommuninut atugarliornerusunut aningaasanik nussuisoqartassasoq, politikkikkut aalajangerneqarpoq. Ingerlatsivik naapertorlugu Kommuneqarfik Sermersooq kisiartaalluni kommuninut allanut nussuisarpoq, aningaasanillu nussuineq tamakkiisumik ersarissumik takuneqarsinnaanngilaq.

Kommunit naligiissaarinerisa politikkikkut iluarsineqarnissaat oqallisigissagaanni maannakkut agguataarineq eqqarsaatigalugu aalajangiisoqarnissaa pingaaruteqartoq, ingerlatsivik politikkerinut allappoq.

Taamaattumik Kommuneqarfik Sermersuumi aningaasatigut agguataarnerit pingaarnerit “ersarinnerpaallu” ingerlatsiviup naatsorsorpai.

– Kommunit tapiissutinik agguaassinerat “takuneqarsinnaanngitsut” Nukissiorfiit, KNI-p Tusassillu akilersuineranni pisunik naatsorsuiffiullunilu misissuisoqassanngilaq, ingerlatsivik ataatsimiititaliamut allappoq.

Takussutissami takuneqarsinnaavoq agguaassineq ingerlatsivik naapertorlugu, Namminersorlutik Oqartussat ukiumut kommuninut tapiissutigisartagaat aqqutigalugit pisoq, tassani Kommuneqarfik Sermersooq innuttaqassusaanut sanilliullugu annertunerusumik pissarsinngilaq.

Assersuutigalugu inuttut akileraarutitigut naligiissaarinermut tunngatillugu malittarisassat naapertorlugit kommunit nunap inuisa agguaqatigiissillugu isertitaasa 115 procentiinit amerlanerusunik isertitallit aaqqissuussinermut tapiissuteqartarput.

Kommunit nuna tamakkerlugu agguaqatigiissillugu isertitaqarnerup 90 procentianit ikinnerusunik isertitallit aningaasanik tapiiffigineqartarput.. Kommuneqarfik Sermersuumi ingerlatsivik naapertorlugu Kommuneqarfik Sermersooq kisiartaalluni inuttut akileraarutitigut naligiissaarinermut tapiissuteqartarput.

Ingerlatsiviup naatsorsuinerat sukumiinerusumik sapaatip-akunnerani matumani kingusinnerusukkut ataatsimiinnermi oqaluuserisassani atuarneqarsinnaavoq.