Innuttaasunik ataatsimiititsinermi Kalaallit Nunaanni sakkutooqarnerulernera sammineqartoq
Naalakkersuisup illersornissamullu ministerip arfininngornermi politikikkut pilersaarutertik Nuummi GUX-imi naggataarpaat. Ullut nutaat aaqqiissutinik nutaanik pisariaqartitsinerat aalajangiusimavaat. Peqatigisaanilli suliap ingerlanneqarnerani Kalaallit Nunaat isiginiarneqassasoq neriorsuutigaat.
Vivian Motzfeldt Troels Lund Poulsenilu pingajussaanneerlutik ataatsimoorlutik innuttaasunik ataatsimiititsipput.
Assiliisoq: Christian Klindt Sølbeck/Ritzau Scanpix
Arfininngornermi
ualikkut innuttaasut nunanut allanut naalakkersuisumut Vivian Motzfeldtimut (S)
illersornissamullu ministerimut Troels Lund Poulsenimut (v) apeqquteqarnissamut
tullinnguupput.
Pisoq
sioqqutitsiarlugu politikerit marluk marloriarlutik tusagassiortunik
naapitsipput, ingiaqatigiillutillu Nuutoqqamit GUX Nuummut ingerlaarput.
Tassani Vivian Motzfeldtip silagissuup nalaani takkulluartoqarsimanera
nuannaarutigaa.
Inersuarmit
apeqqutit arlallit danskit Europamiullu sakkutuuisa Kalaallit Nunaanniittut
amerlassusaannut tunngapput.
– Toqqissisimannginnermik
paatsuunganermillu pilersitsipput, amerlasuullu piniarnermik
inuussutissarsiortut aarlerigaat. Innuttaasut sakkutuullu akornanni
saqitsaatsitsinaveersaarnissaq anguniarlugu suut suliniutigineqassappat,
apeqqutit ilaat taama nipeqarput.
Nunarsuarmi
pissutsit allanngortut
Politikerit
ullormi tassani siusinnerusukkut Utoqqarmiut Kangerluarsunnguanni sakkutuunut
pulaarput. Nammineq isiginninnini malillugu danskit illersornissaqarfiat
NATO-milu iligisat suliniutaasa annertusinerat eqqortuusoq, Vivian Motzfeldtip innuttaasunik
ataatsimiitsitsinermi erseqqissaatigaa.
– Pissutsit
nutaat tamatsinnut sunniisut sungiusimannginnatsigit ilumoorpoq. Nunarsuarmi
pissutsit allanngornerat sapinngisamik pitsaanerpaamik suleqatigiinnissamik
pisariaqartitsiviuvoq, innuttaasullu najuunnerunerup siunertaa
takusinnaasariaqarpaat. Kalaallit Nunaat illersorsinnaajumallugu illersuisussat
Kalaallit Nunaat ilisimasariaqarpaat, taanna oqarpoq.
Peqatigisaanik
suli innuttaasut isiginiarneqarnerat erseqqissaatigaa.
– Inoqarfiit
qimallugit piffinni aalajangersimasuni sungiusarnerit annertuut pisussaapput.
Ajornartorsiut sammisimavarput, taamaalillunilu uumasut piaqqiffiini ingerlatat
annikinnerussapput, Vivian Motzfeldt oqarpoq.
Innuttaasunik ataatsimiititsinermi, ulloq sioqqullugu aggersaavigineqartumi inissat amerlanerit inoqarput.
Assiliisoq: Christian Klindt Sølbeck/Ritzau Scanpix
Illersornissamut
ministeri Troels Lund Poulsen ima ilassusiivoq:
– Sakkutooqarnikkut
suliaqarneruneq soorunami sakkutooqarnerunermik kinguneqarpoq. Tamanna aamma
piffinni inuit najugaqarfigisaanni atuuppoq. Pissutsit atukkatta tamanna
pisariaqalersippaat. Isumatusaartumillu ingerlanniarsaraarput.
Illersornissamut
ministerip illersornissaqarfiup sulinerani Kalaallit Nunaata akuutinneqarnissaa
erseqqissaatigaa.
– Attaveqatigiinnitsinnut
susoqarneranillu oqaluttuartarnitsinnut pikkorinnerusariaqarpugut. Piffissap
ingerlanerani kalaallit innuttaasut oqaloqatigisarnerannut
pikkorissimanngilagut, ministeri nassueruteqarpoq.
Taamaammallu
assigiinngitsunik periuseqarluni suleqatigiinnerit ingerlanneqarnerat
eqqaasitsissutigaa. Arfininngornermi siusinnerusukkut politikerit taakku marluk
Issittumi tunngaviusumik ilinniartitaanerup annertusineqarnissaa, Air
Greenlandimillu nutaamik isumaqatigiissuteqarnissap ilimagineqarnera tamanut
saqqummiuppaat.
