Kalaallit Nunaanni innuttaasut pisortanut akiitsui januaarimi 2026-imi 1.691 milliardit koruuniupput. Tamanna Aningaasaqarnikkut Ingerlatsineq pillugu Nalunaarummi, Aningaasaqarnermut Naalakkersuisoqarfimmit saqqummiunneqartumi allaqqavoq.
Akiitsut taakkua siorna piffissap taamaalineranut sanilliullugu 137 millionit koruuninik amerlanerupput.
Kalaallit Nunaanni innuttaasut pisortanut akiitsui januaarimi 2026-imi 1.691 milliardit koruuniupput. Tamanna Aningaasaqarnikkut Ingerlatsineq pillugu Nalunaarummi, Aningaasaqarnermut Naalakkersuisoqarfimmit saqqummiunneqartumi allaqqavoq.
Akiitsut taakkua siorna piffissap taamaalineranut sanilliullugu 137 millionit koruuninik amerlanerupput.
Akileraarutit innuttaasut suli tamakkiisumik akilersimanngisaat akiitsuni amerlanerpaapput. Tassa 637 millionit koruunit.
- Akileraarutit suli akilerneqanngitsut 2025-mit 2026-mut 42,8 millionit koruuninik qaffariarput.
Taakku ukiuni kingullerni akiitsut annersarisimavaat, Naalakkersuisoqarfik allappoq.
Meeqqanut akilersuutinut akiitsut akiligassaqarfigineqarnerpaanut tulliupput, 404 millionit koruuniullutik.
Siumut: Kalaallit amerlavallaat pisussaaffitsik naammassineq ajorpaat
Innuttaasut pisortanut akiitsuisa ataatsimut isigalugu ikiliartunnginnerat Siumumeersup, Erik Jensenip ilungersunartutut nalilerpaa. Taassuma oqarnera naapertorlugu innuttaasut amerlavallaartut pisussaaffitsik, tassa akiligassanut akiliisarnissaq, naammassineq ajorpaat.
- Kiisa 2 milliardit immaqa aqaguagunnguaq pallissavagut arlaatigut iliuuseqanngikkutta. Taanna inuiaqatigiittut attatiinnarsinnaanngilarput. Iliuuseqartoqartariaqartoq isumaqarpunga, Erik Jensen oqarpoq.
Pisortanut akiitsut ukiuni kingullerni ikiliartunngitsut politikkikkut akuliuffigineqarnerusariaqalernerat piffissanngortoq taanna aamma isumaqarpoq. Iliuuserineqarsinnaasullu ilaannik assersuusiorpoq.
- Partiit akunnitsinni isumaqatigiissusiortariaqarpugut. Nuna tamakkerlugu periusissiortariaqarpugut, nunatta inuiaqatigiivisa pisortanut akiitsuisa qaffakkiartorunnaarnissaannut qanoq iliortariaqarnerluta, taanna oqarpoq.
IA: Inuusuttut akiitsoqalinnginnissamik sungiusartariaqarput
Innuttaasut akiitsui allat ilaatigut tassaapput inimut attartukkamut 50 millionit koruunit, eqqagassanik eqqaanermut 32 millionit koruunit paaqqinnittarfinnullu 10 millionit koruunit.
Ane Hansen(IA), Inatsisartut Aningaasaqarnermut Akileraartarnermullu ataatsimiititaliaanut ilaasortaavoq. Taassuma innuttaasut pisortanut akiitsoqarnerulernerat akiorneqassappat meeqqat atuarfiat aallartiffiussasoq oqaatigaa.
- Inuusuttut meeqqat atuarfianit angusarlunnertik peqqutigalugu inuussutissarsiutinut ingerlaqqinngitsoortarput. Suliassaq angisooq tassaniippoq. Akiitsuninnginnissaq aamma sungiusagassaangami, Ane Hansen oqarpoq.
Taassuma Erik Jensenip politikkikkut akuleruttariaqalernermik isumaqarnera taperserpaa.
- Partiit tamatta ilutsinni oqaloqatigiissutigisariaqarparput, ajornartorsiutip taassuma milliartornissaa siunertaralugu iliuutsit suut nassaareqatigiissinnaanerigut isumaqatigiissutigalugillu, Ane Hansen oqarpoq.
