Inuusuttut peqqarniisaarniartutut pasisat meeqqat qaartartunik savinillu toqunniarlugit pilersaarusiorsimasut

Nukappiaqqat pingasut ataasinngormat peqqarniisaarniartutut pasillugit tigusarineqartut, Hadstenimi Hadbjergvej 12-imut Hadstenip atuarfianut, inunnik arlalinnik, ilaatigut meeqqanik, savimmik qaartartumeeralutillu toqutsinissamik ikiliinissamillu pilersaaruteqarput.

Tamanna unnerluussummi TV 2-p pissarsiarisimasaani atuarneqarsinnaavoq.

Inuusuttuaqqat taakku pingasut, 16-inik, 16-inik 15-inillu ukiullit, "pasineqartut piareersaataasumik arlaleriarlutik iliuuseqarsimapput, politiinit tigusarineqaramik iluatsinnagit".

Internetikkut attaveqaatit assigiinngitsut atorlugit saassussinissartik pilersaarusiorsimavaat.

Unnerluussut naapertorlugu, nukappiaqqat "inuit annilaangalersinnissaat imaluunniit danskit oqartussaasui pinngitsaalillugit iliuuseqartinniarlugit iliuuseqanngitsoortinniarlugillu, imaluunniit Danmarkip tunngaviusumik aaqqissuussaanerata allanngortitsinissaa ajalusoortinnissaaluunniit" siunertaraat.

Pasineqartut pingasut taakkua arlaannaalluunniit kommunimi najugaqanngitsut, Favrskov Kommune ilisimatitsivoq. Hadsten Skole sooq saassunniarlugu pilersaarneqarsimanersoq aamma ilisimaneqanngilaq.

Nukappiaqqat pingasut tigusarineqarnerata kingorna atuarfiup ulorianartorsiortinneqarunnaarsimanera politiinit nalunaarutigineqartoq, kommunemi meeqqanut inuusuttunullu pisortaq Thomas Born Smidt marlunngornermi siusinnerusukkut oqarpoq.

Ataasinngormat ullaakkut pisoq pivoq. Nukappiaqqat marluk Østjyllandimi tigusarineqarput, pingajuallu Københavnimi.

Østjyllandimi politiit naapertorlugit tigusarinninneq Politiit isertortumik paasiniaasartui Københavnimilu politiit qanimut suleqatigalugit pivoq.

Pinerluttulerinermi inatsimmi immikkoortoq 114 naapertorlugu — peqqarniisaarniarnertut — unnerluutigineqarput, tassani inuuneq naallugu parnaarussaanermik eqqartuussaasinnaalltutik.

Tamarmik pinngitsuunerarput.

Nukappiaqqat inuusuttuunerat pissutigalugu aggustip 31-ata tungaanut tigummigallarneqarput, tassa eqqartuussinerup tullissaata tungaanut parnaarussivimmi matoqqasumiissapput. Tigumigallarneqaannassanersut eqqartuussisup aalajangissavaa.

Taakkua pingasut tamarmik eqqarsartaatsiminnik misissuiffigineqassapput.

RITZAU