Mersortarfik isertut akiliuteqartalernissaannik qinnuteqartoq — takornarianit soqutigineqartorujussuaq

Nuummi mersortarfik Kittat takornarissat takuniaarusuttut isernermi akiliuteqartalernissaat, kommunalbestyrelsimut qinnutigaa.

Kittat mersortarfiuvoq kommunimit ingerlanneqartoq, ilaatigut kalaallisuuliornermik ingerlatsiviusoq. Mersortarfik takornarissat angallaataannit ilaasunit annertuumik soqutigineqarpoq.

Assi: Leiff Josefsen

Thomas Munk Veirum Thomas Munk Veirum Tusagassiortoq

Saqqummersinneqarpoq 15. Juuni 2026 - 09:20

Mersortarfik Kittat takornarissanik soqutiginnittunik, ilaatigut ullormut quleriarluni takuniaatitsisarpoq. Isernermi akiliuteqartoqartalernissaanik, mersortarfik Kommuneqarfik Sermersuumut maanna qinnuteqarpoq.

Mersortarfik kalaallisuunik suliaqartarpoq, taamaalillunilu takornarissanit soqutigineqarnera annertuseriarsimalluni. Takornarissanik takuniaatitsineq ulluinnarni sulisut sulinerannut annertuumik tatisisartoq, mersorfiup pisortaa Aviaq Reimer Olsen kommunalbestyrelsimut allakkamini allappoq:

- Takornariartitsineq nalinginnaasumik ullumikkut akeqanngitsumik ingerlanneqartarpoq, tamannalu sulisunut ilungersunartuuvoq ulluinnarnilu suliarisartakkanut sunniuteqartarluni, Aviaq Reimer Olsen allappoq.

Ussassaarut

Takornarissat isernermi annikitsumik akiliuteqartalerpata, takornariartitsinermut aningaasartuutit ilai matussuserneqarsinnaassasut, aamma ingerlatsineq pitsaanerusumik oqimaaqatigiinnerusumillu ingerlanneqarsinnaalernissaat anguneqarsinnaasoq taanna isumaqarpoq:

- Isernermut akiliuteqartitsisalernermi, Kittat kulturikkut suliaqarfittut tapersersorneqassaaq, kiisalu takornariartitsinerit sulisullu ilisimasaminnik tunniussaqarsinnaassusaata pingaaruteqassusaat ersersinneqassalluni, pisortaq allappoq.

Atuartut suli akeqanngitsumik isersinnaapput

Kittat nittartagassaa ineriartortinneqarpoq, nittartakkatigullu takornariarnissamut inniminniisoqarsinnaalissasoq taanna oqaluttuarpoq.

Takornariartaatinik angalasut annermik mersortarfik takuniartarpaat, aamma pilersaarutaavoq atuarfimmiit, suliffeqarfinnit, pisortanit aallartitanit suliffimminnillu atatillugu angalasut akeqanngitsumik isersinnaanissaat.

Aviaq Reimer Olsenip takornarianut takuniaatitsisarnermut akit imatut inissinneqarnissaat siunnersuutigaa: Inersimasut (18-ileereersut): 50 kr., Meeqqat (6-17-ileereersut): 30 kr., Meeqqat (0-5-leereersut): Akeqanngitsumik.

Mersortarfiup isernermut akiliisitsisarnissaa tunngavissaqarluartoq kommunimi aqutsisoqarfik naliliivoq, aningaasaqarnermullu ataatsimiititaliap qinnuteqaat akuerereerpaa.

Kommunalbestyrelsip qinnuteqaat juunip 17-ianni ataatsimiinnermini inaarutaasumik tamanna aalajangiiffigissavaa.