ISSITTUMI SAKKUTUUT INUIAQATIGIINNI QAJANNAASSUSEQ PILLUGU
Issittumi tunngaviusumik ilinniarneq inuusuttunut inuiaqatigiinnullu iluaqutaavoq
Inuusuttut eqimattat marluk issittumi tunngaviusumik ilinniarfimmiinnertik Kangerlussuarmi aallaaveqartoq ingerlassimalereerpaat, 5. maj 2024-imi pilersinneqarmalli. Eqimattat taakku tamarmik ilinniakkaminnik naammassinninnerat procentinngorlugu qaffasissorujussuuvoq, tamannalu ersersitsivoq Illersornissaqarfiup ilinniagaq taanna pillugu inuusuttut soqutiginninnerat eqqorluaavissimagaat. Ilinniaqatigiit pingajui juli 2026-imi aallartissapput.
Issittumi tunngaviusumik ilinniarfiup siunertaraa kalaallit inuiaqatigiit upalungaarsimanissaannik piareersimanissaannillu nukittorsaanissaq. Ilinniartut ilinniarnerminni sakkutuujunermi piginnaasatigut piareersimanermilu suliassat iluini ilinniartinneqartarput.
Asseq: Arktisk Kommando
Issittumi tunngaviusumik ilinniarnissamut soqutiginninneq annertooq tunngavigalugu, Illersornissaqarfik inuusuttorpassuit siunissamut kissaatigisaannut eqquilluaavissimavoq.
Tamanna takutinneqarpoq uppernarsarneqarlunilu ilinniarnissamut soqutiginninnerup annertuneratigut, taassumalu qaavatigut aamma naammassinnittartut procentiisa qaffasinnerujussuatigut, nunami inuusuttunut ilinniarfinnut sanilliullugu, assersuutigiinnarlugu inuusuttut ilinniarnertuunngorniartarfiini aammalu efterskoleni ilinniarnerminnik naammassinnittut aammalu maanaannaq unitsitsisartut agguaqatigiissillugu amerlaqatigiiginnartarfianni.
Qinnuteqarfissaq 1. december
Septembarip aallaqqaataaniit novembarip tallimaata tungaanut Issittumi Sakkutooqarfimmit, Arktisk Kommandomit sineriammi sumiiffinnut assigiinngitsunut ilinnialernissamut soqutiginnittut misilitsiffigisinnaasimavaat aammalu ilinniarfiusinnaasunik pilerisaarinermi peqataalluni ilinniagassaq nittarsaattarsimavaa.
Ilinnialernissamut misilitsinnerit Maniitsumi, Paamiuni, Narsami, Nanortalimmi Tasiilamilu inuusuttunut sammisumik ingerlanneqarsimavoq. Ilinniarfissanillu nittarsaassinerni Issittumi Sakkutooqarfik ilinniarfinnik assigiinngitsunik suleqateqarluni Ilulissani, Aasianni, Sisimiuni, Nuummi Qaqortumilu nittarsaassinermik ingerlataqarpoq.
Issittumi tunngaviusumik ilinnialerniaraanni qinnuteqarnissamut killiliussaq tassaavoq 1. december 2025.
Asseq: Illersornissaqarfik
Arktisk Kommandomi pisortaq, Generalmajor Søren Andersen oqaluttuarpoq ilinniarneq suli ineriartortinneqartoq aammalu maanna dronemodulimik ilinniarfimmut ilanngussisoqartoq.
- Inuiaqatigiinni isumannaallisaaneq nukittorsarniarparput, anguniagarput tassaavoq kalaallit inuiaqatigiit isumannaallisaanermut, piareersimanermut qajannaassusermullu nukittorsarneqarnissaannut tapertaanissarput. Issittumi tunngaviusumik ilinniarfik isumaqatigiissutip ilagaa. Maanna atuartut 22-iniit 30-nut amerlinikuuagut, ilinniartitaanerlu dronemodulimik ilallugu nukittorsarparput, taamaalillutik aamma ilinniartuutigut dronenik aqutsisinnaasutut ilinniarsinnaallutik, Søren Andersen oqarpoq.
Ilinniartitaaneq imminermini qaammatit arfinillit missaanni sivisussuseqarpoq, ingerlaqqiffiusunillu ilinniarnissamut periarfissanik arlalinnik ammaassisarpoq. Ilinniaqqinnissamut periarfissat ilaatigut illersornissaqarfimmi, politiini imaluunniit piareersarnermut tunngasunik ilinniartitaanerni atorneqarsinnaapput, aammali ilinniartitaanerit assigiinngitsut innuttaasunut sammisut ammaassinnaavai.
Holdip tullianut, juulimi 2026-mi aallartittussanut ilinnialernissamut qinnuteqarniaraanni qinnuteqarnissamut killiliussaq decemberip aallaqqaataaniippoq.
Arktiske Rangers
Issittumi tunngaviusumik ilinniarsinnaalernerup saniatigut suliniutit nutaat pilersaarusiorneqarput. Isumaqatigiissuteqartummi isumaqarput innuttaasut sumiiffimmiittut periarfissaqartillugu suliassanik kivitseqataasinnaassasut.
Maannakkut suliniutit arlallit ingerlapput, Issittumi Sakkutuut pisortaat, generalmajor Søren Andersen, piviusunngortinnissaannut qilanaarpoq:
- Arktiske Rangers pilersinnissaat misissorlugulu nalilersorparput, Canadami assingusumik aaqqissuussaq isumassarsiorfigalugu assingusumik aaqqissuussinissaq siunertaralugu. Imaaliallaannaq nalilissagaanni Kalaallit Nunaanni Arktiske Rangersit sineriammi kangerlunnilu aammalu nunaqarfinni isorliunerusunilu pilersinnissaat periarfissaqarluartoq matumani eqqarsaatigineqarpoq, Søren Andersen oqarpoq.
Canadian Rangers naalagaaffiup killeqarfiinik illersuinissamut peqataapput Canadap avannarpasissuani, ilaatigut illersornissaqarfiup ingerlatsineri tapersersorlugit, annaassiniarnermut piareersarnermullu suliassanut peqataasarlutik, sakkutuunik allaneersunik issittup atugassarititai pillugit inuilaarsuarmilu ajornartoornermi iliuuserisinnaasat pillugit ilinniartittarpaat, minnerunngitsumillu nunagisaminni sillimaniarnermut upalungaarsimanermullu tapersersortaasarput.
Kalaallit Nunaata Alapernaatsuisa nukarlilerneqarnissaat (juniorkorps)
Kalaallit Nunaata Alapernaatsui pilersinneqarput 2021-mi Arktisk Kommandop isumassarsiaanik. Alapernaatsut Issittumi Sakkutuut nakkutiginninneranut tapertatut eqqarsaatigineqarlutik pilersitaapput.
Taakku nalinginnaasumik innuttaasuupput, inuiaqatigiinni nukittorsaanissamut peqataasut, ilaatigut pinngortitami angalaarnerminni isumannaallisaanermut nakkutiginninnermullu alapernaarsueqataasarput.
Mobilapp atorlugu Arktisk Kommando-p ulloq unnuarlu nakkutilliisoqarfiata ingerlatsivianut toqqaannartumik nalunaaruteqarsinnaapput, pinngortitami allannguutit takunnissimatillutik, soorlu immap avatangiisaanut mingutsitsineq, ajunaartoqartillugu ajutoortoqartillugulu annaassiniartoqarnissaanik aallartitsisinnaapput imaluunniit allamiut nalinginnaanngitsumik pasinarsinnaasumillu sineriammiittut pillugit nalunaaruteqartarsinnaallutik.
Issittumi Sakkutooqarfiup qullersaqarfiani pisortaq, generalmajor Søren Andersen Kalaallit Nunaata Alapernaatsuisa ataani juniorkorpsimik pilersitsinissaq kissaatigaa:
- Juniorkorpsimik maani Kalaallit Nunaanni peqarnissarput kissaatigaarput, taanna Canadami rangersiniit isumassarsiaavoq, taakkua juniorkorpsimik peqarput nalinginnaasumik 12-18 akornanni ukiulinnik.
- Tassami sapinngisamik siusissumik meeqqat inuusuttullu tunngaviusumik piginnaasaqalernissaat soorlu assersuutigalugu nunap assinginik sumiissusersiutinillu atuineq, pinngortitami isumannaatsumik angalaneq, ikiueqqaarneq annaassiniarnermilu piareersimaneq, sumiiffimmi avatangiisinik paasinninneq, inuiaqatigiinni nukittunerulersitsissaaq, Søren Andersen naqissusiivoq.
