Ippassaanikkunni suliartorlunga, raatiu “P1 Morgen” biilini tusarnaarpara.
Tasssani Danmarkimi ilaqutaariit danskit aappagu 30.000 kr. missaannik
aningaasaateqarnerulernissaq naatsorsuutigisinnaagaat oqaatigineqarpoq.
Ippassaanikkunni suliartorlunga, raatiu “P1 Morgen” biilini tusarnaarpara.
Tasssani Danmarkimi ilaqutaariit danskit aappagu 30.000 kr. missaannik
aningaasaateqarnerulernissaq naatsorsuutigisinnaagaat oqaatigineqarpoq.
Nassuiaataa ilisimaneqarluarpoq: Danmark aningaasaqarluarpoq, akissarsianik
qaffaaneq, akit akitsoriartornerisa appasinnera, akileraarutinillu apparsaanissamut
politikkikkut aalajangiussat.
Atlantikoq ikaaraanni - naalagaaffeqatigiinnerup
avannarpasinnersaani - assiliaq allarluinnaavoq. Aningaasaqarnermut
inatsisissatut siunnersuut saqqummiunneqarmat oqariartuut ersarippoq: Ukiut
qulit tulliuttut artornassapput. Danskit aningaasat pillugit oqallinneranniit
mumingarluinnaavoq.
Ilinniarsimassuseq assoroorfimmi tunngaviuvoq
Tamatuma oqaatsit issuakkat eqqarsaatigilersippai: “In times
of adversity, education is an ornament” - piffissami assoroorfimmi
ilinniarsimaneq ilorrisimaarutaannaanngilaq, nukiuvorli. Ilinniarsimaneq
inuttut pitsaaqutaannaanngilaq, kisiannili inuiaqatigiinnut tunngaviuvoq. Inuiaqatigiinni
Kalaallini amerlasuut ilinniagaqanngillat, nunarujussuarmilu inoqariaatsimi siammasissumi,
inuttut aningaasaqarnikkullu unammillernartitsivoq. Ilinniarsimassuseq pilersitsinermut,
suliffeqarnermut, piginnaasaqarnermullu pissutsinut allanngorartunut
tulluussarsinnaanermut toqqaannartumik attuumassuteqarpoq. 2025 politikkikkut
inituvoq, Inatsisartunut qinersinertaqarluni. Naalakkersuisut nutaat
imaannaanngitsunik suliassaqarput. Ilinniarsimassuseq nukingernartut ilagaat -
kisianni taannaannaanngilluaasarpoq.
Ukioq aamma attaveqaatikkut malunnartumik allannguiffiuvoq.
Annertusaanerit aammalu nutaanik sanaartornerit suliassanik pilersitsereerput,
pingaartumik kiffartuussinermi takornariaqarnermilu. Hotelit illuaqqallu
sanaartorneqarput, amerlanerit umiatsianik takornariartaatinik
aningaasaliipput, isumalluarnerlu takuneqarsinnaavoq. Qaqortumi Ilulissanilu
mittarfiit nutaat 2026-imi ammassapput, takornariaqarneq, sanaartorneq,
suliffissallu annertussasut misissuinerit tamarmik takutippaat.
Tamanna ilutigalugu Kalaallit Nunaanni pinartumik
sulisussaaleqineq piuvoq. Ukioqatigiiaarpassuit 1950-ikkornisaasut 60-ikkornisaasullu
soraarninngukaapput, innuttaasullu amerlassusaat appariartussasoq naatsorsuinerit
takutippaat. Tamatuma suliffissat amerlanerusut - sulisussalli ikinnerusut
inerneraa. Taamaammat pingaartumik sanaartornermi kiffartuussillunilu
suliffinni avataaniit suliartortut amerliartortut takuarput.
Kalaallit Nunaat allannguinersaarsuup nalaaniippoq.
Ineriartorneq periarfissanik pilersitsisoq, kisianni aamma politikkikkut
erseqqaarissunik toqqaanissamik, sinaakkusersuinissamik akisussaaffinnillu
pisariaqartitsisoq. Apeqqut tassaanngilaq allanngortoqarnera takkutissanersoq -
kisiannili aqussinnaaneripput.
Taamatut ukiumut qaangiuttumut qujallunga, aappagussamullu
ajunnginnerpaamik kissaallusi, allaaserisara ukioq manna naggataaq
naggaserpara. Ilaquttatillu juullimi pilluaritsi.
