Arnat assammik arsartartut nunanut allannut unammisartuisa sungiusaasuat Jakob Larsen Folketingimut ilaasortanngunngitsoorpoq.
1.200-nik qinerneqarpoq, Fynimilu partii siuariaraluartoq parteeqataa ilinniartoq 24-nik ukiulik Anastasia Milthers 2.400-ngajannik qinerneqarluni ilaasortanngorpoq.
Arnat assammik arsartartut nunanut allannut unammisartuisa sungiusaasuat Jakob Larsen Folketingimut ilaasortanngunngitsoorpoq.
1.200-nik qinerneqarpoq, Fynimilu partii siuariaraluartoq parteeqataa ilinniartoq 24-nik ukiulik Anastasia Milthers 2.400-ngajannik qinerneqarluni ilaasortanngorpoq.
Qinerneqarnerpaamut tulliulluni angusarissaartoq
Jakob Larsenilli sinniisutut siullertut inissippoq, Anastasia Milthersilu sulinngiffeqassagaluarpat ilaasortanngussalluni.
– Timersortartuugaama normu 2-nngornera ajuusaarutigaara, aammali parteeqatara Anastasia Milthers sinnerlugu nuannaarlunga. Fynimi ilaasortaatitaqarneq 2022-mi annaasarput uterteqqinniarlugu marluulluta anguniagaraarput, tamannalu iluatsillugu. Nuanneqaaq, Jakob Larsen oqarpoq.
Aamma qineqqusaarnerup nukinnik atuinartup qaangiunnera iluaqutitaqarpoq.
- Assammik arsarneq ilaquttakkalu aallussinnaaleqqippakka, taakkumi piffissami kingullermi takorpiarnikuunngilakka.
Kalaallit Nunaat qineqqusaarutigigaa
Jakob Larsen qinersinerup aqaguani partiip siulittaasuata Martin Lidegaardip politikkimik aallussiinnaqqullugu kajumissaarlugu sianerfigitissimmalluni oqaluttuarpoq. Partii kisiartaalluni maannamut naalagaaffeqatigiinnerup eqqarsaatigeqqinnissaanut sulissuteqarusuppoq.
"Danmark, Kalaallit Nunaat Savalimmiullu nutaamik qanimut suleqatigiinnissamut periusissarsisariaqarput, pisariaqassappallu naalagaaffeqatigiinneq atorunnaarsillugu", qineqqusaarnermi oqariartuutigineqarpoq.
Jakob Larsenip taamatut eqqarsartaaseqarneq Radikale Venstremut kajungilissutigaa.
– Partii Kalaallit Nunaannut pimoorussivoq. Aammali Fynimi qinersisartut naalagaaffeqatigiinneq soqutigivallaanngikkaat maannakkut paasivara. Radikalit pingaarnertut anguniagaat qinerneqartarput. Taamaattumik Kalaallit Nunaat pingaarnertut qineqqusaarutigigaanni qinigaanissaq naatsorsuutigineqarsinnaanngilaq, Jakob Larsen oqarpoq, qineqqusaaqqissanerlunilu ukiuni tulliuttuni eqqarsaatigissanerarlugu.
– Politikkikkut suliaqartut amerlasuut ilisarisimalerpakka, politikkilu pillugu ilisimasaqarnerulerlunga. Aamma qanoq qineqqusaartoqartarnersoq ilikkarpara allaallu TikTokimi profileqalerlunga. Inuilli nittartakkatigut attaveqatigiittarfii unitsikkallalaartariaqarpasippakka, Jakob Larsen oqarpoq.
Radikale Venstre Folketingimi qulinik ilaasortaatitaqalerput, kingullermik qinersinermit pingasunik amerleriarlutik.
